ROMA 3 - WUKE SUSI WATTI'U AL᷊AL᷊USASSA

¹ Amungkangngu aroddi, apa auntunganne maola'a taumatan Yahudi? Wuṛṛu apa lai auntunganne tuttuṛṛutta atorannu sunatta?

² Natantunna manambo auntunganne! Paarorone, ana waugu ete su taumatan Yahudi Ruata nanantillu manga wisaran Duata.

³ Arawe ereapa amungkangngu sambageanganna taumatan Yahudi tawe tumuṛṛutta? Apa ana waugu Ruata tawe umakkanna?

⁴ Natantuna tawe! Ana waugu nasemakke manungku Ruata sidutu atonna, salaiwe al᷊awo'u taumata mammahia. Sulal᷊ummu Wuke Susi uawoṛṛetta, “Ṛinone i'o aatialanna atonna sulal᷊ummu apa apan iwabbisaranu, wuṛṛu i'o maauntungnga su tempo i'o parikisanna.”

⁵ Arawe amungkangngu taṛṛinon Duata lembon nilumiatta'e, ana waugu i ite ma'ola'a pasasal᷊a, apa sarun iwisaran kite? Manungku Ruata wengkolla amungkangngu i tou maṛṛuumanni ite? (Atonna aiwal᷊o indi maṛṛia'a su taumata.)

⁶ Atonna-tonna tawe! Ana waugu amungkangngu Ruata tawe atatul᷊ida, ereapa i Tou wotongnge mamarikissa runia indi?

⁷ Arawe amungkangngu manga inolaanna apan nassal᷊a, apa apan naṛṛino su ola'u Ruata lembon lumiatta'a ma'oman sara i Tou raloanna, anio taumata apan ma'ola'a al᷊al᷊eo udde ta'e iapaasal᷊a ere taumata marosa?

⁸ Wuṛṛu anio i ite tawe wotongnge mabbisara, “Mappianne i ite ma'ola'e al᷊al᷊eo tadea'u lumiatta'e apapia?” Atonna pia manga taumata apan mangngadio'a si ya'u ringannu mabbisara manungku i ya'u suete nabbisara aroddi. Manga taumata ereudde ṛinone iṛṛuumannu Ruata.

Tawedu saran sangkatou apan tinumuṛṛutta apulun Duata

⁹ Ei, apa i ite taumatan Yahudi mappianne wuassu taumatan walahanna waine? Mangke tawe! Ere suete ta'u niwisara manungku mawae taumatan Yahudi ara'e walahanna waine, sarangkanambone udde tatahuanannu rosa.

¹⁰ Ere uawoṛṛetta sulal᷊ummu Wuke Susi, “Tawe saran sangkatou apan naṛṛino,

¹¹ tawe saran sangkatou apan maasunna wuṛṛu tawe saran sangkatou apan massubba Ruata.

¹² Anambon taumata nangindauten watanganne wuassu Ruata; sarangkanambone nial᷊iwunete. Tawe saran sangkatou apan ma'ola'a apapia; saran sangkatou tawe!

¹³ Tonggol᷊anni mangitou naal᷊ihida ere lal᷊abinganna apan wawu'anna. Manga awusu wuṛṛu wahia mangngelekka wuassu lila mangitou, wuṛṛu wiwikki mangitou mapaasabangngu aal᷊uandaga, ere wisan atoanna.

¹⁴ Moṛṛongngi mangitou napenen wawontoga wuṛṛu wawansaga.

¹⁵ Lempangngi mangitou mal᷊ihakka amungkangngu inai mannansara wuṛṛu mamate taumata.

¹⁶ Ananawo wuṛṛu asasusa, iaasi'i mangitou su al᷊awo'u tampa.

¹⁷ I mangitou wuta su ola'u lal᷊annu al᷊al᷊uassa,

¹⁸ wuṛṛu tawe massubba Ruata.”

¹⁹ Orassa indi i ite masingkata manungku sarangkanambone apan uawoṛṛetta sulal᷊ummu titan agama Yahudi, udde hunane su manga taumata apan paparentannu tita udde. Ringannu aroddi tawe saran sangkatou wotongnge maasimbakka wuṛṛu ahewallu runia indi wotongnge iapaasal᷊an Duata.

²⁰ Ana waugu tawe saran sangkatou apan wotongnge maaukka apia ringannu Ruata ana waugu taumata udde tuttuṛṛutta manga inolaanna sulal᷊ummu titan agama. Arawe tita udde tumba'u mammasingkata su taumata manungku taumata udde marosa.

Ereapa Ruata mamalan taumata maaukka apia ringanni Tou

²¹ Arawe orassa indi Ruata buatte namantingiddu lal᷊anne ereapa taumata maaukka ringanni Tou; wuṛṛu lal᷊anne udde tawe sul᷊ungnge ringannu titan agama Yahudi. Manga Wuken Musa wuṛṛu Wuken Manga Nabi mabal᷊o lai olangnge udde,

²² manungku Ruata ta'e mangngonggolu tempone su taumata maaukka ringanni Tou, tumba'u amungkangngu taumata mangngimanna Mawu Yesus Kristus. Ruata na'ola'a indi hunane su anambon taumata apan mangngimanna si Kristus, ana waugu tawe paṛṛalanne:

²³ Anambon taumata narosate wuṛṛu marauten Duata apan sarun manal᷊amatta si mangitou.

²⁴ Tumba'u ana waugu darangngun Ruata nionggola ringannu tawe bawal᷊inne, paa'aukku taumata ringannu Ruata maola'a mapia lai; lal᷊anne eteudde; taumata niapaal᷊iu Mawu Yesus Kristus wuassu rosa.

²⁵ Ruata nanantillu Mawu Yesus tadea'u ringannu papate-Ne udde taumata iapaal᷊iatta'a mapallosa wuassu pasasal᷊a amungkangngu i mangitou mangngimanna si tou. Ruata na'ola'a aroddi ana mapaal᷊iatta'u atatul᷊ide. Ana waugu su tempo nal᷊iu Ruata buatte nanabare manga rosan taumata, na'oman sara i Tou tate naṛṛuumanni mangitou.

²⁶ Arawe orassa indi i Tou mammangalo rosa ana mapaal᷊iatta'u atatul᷊idda. Ringannu olangnge aroddi i Tou mapaal᷊iatta'a manungku watangan-Ne tawe bahiane; wuṛṛu anambon taumata mangngimanna Mawu Yesus, nareengnga taumata apan naaukke apia ringannu Ruata.

²⁷ Ana waugu udde tate lai pangaiananne i ite mamunga. Anio aroddi? Ana waugu i ite tuttuṛṛutta apa apan uawoṛṛetta sulal᷊ummu titan agama Yahudi? Wal᷊ine, Arawe ana waugu i ite mangngimanna.

²⁸ Ana waugu pangudusanne arendi: Taumata isaggo uaaukka apia ringannu Ruata, wal᷊inewe ana waugu i tou tuttuṛṛutta apa apan uawoṛṛetta sulal᷊ummu titan agama Yahudi, ewe'e ana waugu i tou mangngimanna Mawu Yesus Kristus.

²⁹ Ara'e Ruata udde, tumba'u Ruatan taumatan Yahudi. Wal᷊inewe i Tou Ruatan walahanna waine lai? Ore atonna i Tou Ruatan walahanna waine lai!

³⁰ Ana waugu Ruata tumba'u sambau. Ete i Tou apan namalan taumatan Yahudi maaukka apia ringannu Ruata ana waugu i mangitou mangngimanna. Wuṛṛu ete i Tou lai apan namala manga taumatan walahanna waine maaukka apia ringannu Ruata, udde lai ana waugu i mangitou mangngimanna.

³¹ Apa indi atappasanne manungku amungkangngu i ite mangngimanna Mawu Yesus, i ite tumal᷊iudde titan agama Yahudi? Atonna-tonna tawe! Ewe'e ringannu pangangimanni ite udde, i ite mangngaregan tita udde.