ROMA 14 - WUKE SUSI WATTI'U AL᷊AL᷊USASSA

Imbaṛṛangnga mapaasal᷊an tuṛṛangngu

¹ Taumata apan pangangimanne ta'e mattul᷊ungnga ṛinone sengkamanna ringannu mapia su wallattu manga tuṛṛangnga. Arie pattatiakka ringanni tou su ola'u pangangimanne.

² Pia taumata mangngimanna manungku i tou wotongnge umanna al᷊awo'u anna. Arawe pia lai taumata waine apan lome pangangimanne; i tou mammendama manungku i tou tumba'u wotongnge mabbiakku sayore.

³ Taumata apan u'anna tawe mamile, arie mangadio'a taumata apan u'anna tumba'u anna buatte tinantunne; wuṛṛu taumata apan tumba'u u'anna anna buatte tinantunne, arie lai mapaasal᷊an taumata apan u'anna alawo'u anna, ana waugu Ruata suete nanarimmatti tou.

⁴ Isai tuṛṛangnga, na'oman sara tuṛṛangnga mamarikissa allangngu taumata waine? Mawae ete allangnga udde nema'a ara'e dirumarisikka, udde singkaten mawune. Wuṛṛu atonna allangnga udde sarun dumarisikka matul᷊ida, ana waugu Mawu wotongnge mapararisikki tou matul᷊ida.

⁵ Pia taumata mammendama sambau allo apan apianne wuassu manga allo waine, arawe pia lai taumata waine mammendama manungku manga allo udde uasul᷊ungnga. Wala'e sambau-sambau manantunu apulu naungnge sassane.

⁶ Taumata apan tumba'u mappaattu manga allo apianne, taumata udde ma'ola'a aroddi ana waugu ipangaddata Mawu. Taumata apan u'anna al᷊awo'u anna, ma'ola'a aroddi ana waugu ipangaddata Mawu, ana waugu i tou maadiangkamanna Ruata ana waugu pabbawiakka udde. Aroddi lai taumata apan tumba'u u'anna anna suete nipilene, taumata udde lai mangadatta Mawu wuṛṛu u'al᷊iomanna su Ruata.

⁷ Tawe saran sangkatou wuassi ite apan mabbiakka hunane su watanganni ite sassane, wuṛṛu tawe saran sangkatou apan mate hunane su watanganne sassane.

⁸ Amungkangngu i ite mabbiakka, i ite mabbiakka hunane su Mawu. Wuṛṛu amungkangngu i ite mate, i ite lai mate hunane su Mawu. Nariaddi wiakka ara'e nate, i ite udde tatahuanannu Mawu.

⁹ Kristus natete wuṛṛu nabbiakke apia. Ana waugu udde i Tou naola'a Mawu manga taumata wiakka wuṛṛu lai manga taumata apan natete.

¹⁰ Nariaddi, manga tuṛṛangnga! Apa hunane mapaasal᷊an tuṛṛangngu apan su pangangimanna sambau? Wuṛṛu apa hunane tuṛṛangnga mangngadio'a si tou? I ite sarangkanambone sarun sumaruanna Ruata tadea'u parikisanna.

¹¹ Sulal᷊ummu Wuke Susi uawoṛṛetta, “Mangke atonna,” wisaran Mawu, “sangkatou-sangkatou sarun massubba su saruang-Ku; wuṛṛu sangkatou-sangkatou sarun manga'u manungku ete i Ya'u Ruata.”

¹² Nariaddi i ite sambau-sambau ṛinone pia sasimbakka su ola'u al᷊awo'u inolaanni ite su Ruata.

Imbaṛṛangnga mangal᷊iwun tuṛṛangngu

¹³ Ana waugu udde arie i ite mapaasal᷊an sangkatou ringannu sangkatou. Arawe padea'e tadea'u i yamiu tawe ma'ola'a inolaanna apan ma'aola'a tuṛṛangngu su pangangimanna sambau awono'anna wuṛṛu marosa.

¹⁴ Ana waugu i ya'u uaaukke ringannu Mawu Yesus, ne i ya'u mangke mangngimanna manungku tawe saran sambau anna apan maarosa; arawe olangnge udde maarosa sangkatou taumata, amungkangngu taumata udde massunna manungku udde maarosa.

¹⁵ Arawe amungkangngu ringannu apa apan aannanannu, sangkatou tuṛṛangnga su pangangimanna sambau niapaasusa naungnge, ne tuṛṛangnga tawe nappaamattu paddarame. Amungkangngu Kristus buatte nate ana waugu sangkatou taumata, arie mamalan taumata udde mal᷊al᷊eo ringannu apa iwabboonu.

¹⁶ Ana waugu udde arie mamalan sarannapa apan mapia si yamiu, sunnannu taumata waine lal᷊eo.

¹⁷ Ana waugu amungkangngu Ruata mangatokku pabbawiakku sangkatou, apa apan wotongnge annananni tou ara'e inumanne, tawe tumanin mahuna. Ahunanne eteudde manungku taumata udde tuttuṛṛutta apulun Ruata, maapendamma al᷊al᷊uassu naungnga wuṛṛu mannengkamma al᷊al᷊uassa apan nionggolu Ghaṛṛahon Ruata.

¹⁸ Taumata apan mangngimbe Kristus olangnge aroddi, taumata udde maal᷊uassa naungngu Ruata, wuṛṛu aadatannu taumata waine.

¹⁹ Ana waugu udde pandumanni ite ṛinone sidutu su manga inolaanna apan mandantan paddarame wuṛṛu uatatul᷊ungnga.

²⁰ Ariewe, ana waugu hatton anna, i'o manggohakku apa apan buatte nimmanara Duata. Al᷊awo'u anna udde wotongnge iwo'o; arawe amungkangngu anna iwabboonu udde maarosa taumata waine, i'o nassal᷊ate.

²¹ Mappianne ariete pa'inassa ṛemessa ara'e ma'inumma anggore ara'e ma'ola'a manga inolaanna, amungkangngu inolaanna udde maarosa tuṛṛangngu apan su pangangimanna sambau.

²² Wala'e apa apan pangimanannu udde, olaanna su saruannu Ruata hunanu sassane. Taumata apan tawe pinangiananne ipamendama pasasal᷊a, su apa apan sassunnane naṛṛino taumata udde su lal᷊umanna'a.

²³ Arawe taumata apan uapapaddua umanna, wua'udde umanna anna udde, taumata udde iapaasal᷊an Duata; ana waugu taumata udde tawe tinumuṛṛutta apulun naungnge su ola'u apa apan naṛṛino wuṛṛu apan nassal᷊a. Wuṛṛu manga al᷊awo'u inolaanna apan niola'a tawe ringannu pangangimanna eteudde rosa.