ROMA 12 - WUKE SUSI WATTI'U AL᷊AL᷊USASSA

Mabbiakka hunan Duata

¹ Manga tuṛṛangnga! Ruata tumaniten mapia si ite. Ana waugu udde ya'u sumal᷊ande si yamiu ringannu ahewallu naungnga tadea'u i yamiu manantillu wadangngi yamiu maola'a sambau sasamba apan wiakka su Ruata sassane wuṛṛu maal᷊uassa naung-Nge. Patataṛṛamawunu su Ruata ṛinone lai aroddi.

² Imbaṛṛangnga mattanno apulun dunia indi. Wala'e Ruata mandiaddi ririnu maola'a wakku, tadea'u i yamiu pia awawal᷊u. Ringannu aroddi yamiu wotongnge maasingkata apulun Duata – eteudde apa apan mapia wuṛṛu apan maal᷊uassa naung-Nge wuṛṛu apan nasuungnga.

³ Ruata buatte nangonggolu al᷊amatta si ya'u. Ana waugu udde i ya'u manantiro su tuṛṛangnga sarangkanambone; imbaṛṛangnga mamendama ririnu mattanggaṛṛana wuassu apan ṛinone. Ṛinone i yamiu mattiala watanganni yamiu ringannu awawawon naungnga; sangkatou-sangkatou mattiala watanganne tumuṛṛuttu asingkata apan suete nionggolu Ruata si tou ana waugu mangngimanna Mawu Yesus.

⁴ Wadangngi ite manambo wageangnge. Manga wageangnge udde pia manarane sambau-sambau.

⁵ Aroddi lai matataṛṛino si ite. Salaiwe i ite sarangkanambone manambo, arawe i ite naola'a wadangnga sambau ana waugu i ite su sambau ringanni Kristus. Wuṛṛu i ite sambau-sambau uaaukka su sambau ringannu waine maola'a wageangnga wuassu wadangnga sambau.

⁶ I ite sambau-sambau pia asingkattu manara apan uapapaṛṛala. Manga al᷊amatta udde nionggolu Ruata si ite tumuṛṛuttu darangngu-Ne. Ana waugu udde i ite sarun mappaattu asingkatta udde. Taumata apan pia asingkatta mamasingkatu Watti'a wuassu Ruata rinone mabbatti'u watti'a wuassu Ruata udde, tumuṛṛuttu atatohassi tou sassane.

⁷ Taumata apan pia asingkatta ipantul᷊ungngu taumata waine, ṛinone atonna-tonna mantul᷊ungngu taumata waine. Taumata apan pia asingkatta mannantiro, ṛinone i tou atonna-tonna mannantiro.

⁸ Taumata apan pia asingkatta mangngonggolu sasasa su taumata waine, ṛinone atonna-tonna mangonggolu sasasa su taumata waine, taumata apan pia al᷊amatta mantul᷊ungngu taumata waine ringannu darotongnge, ṛinone ma'ola'a udde ringannu naungnga mawawo wuṛṛu mal᷊uassa. Taumata apan pia asingkatta mammiaṛṛa'a, ṛinone atonna-tonna mammiaṛṛa'a. Taumata apan pia al᷊amatta mamasilon darangngune su taumata waine, ṛinone ma'ola'a ringannu naungnga mal᷊uassa.

⁹ Pandangngute ringannu ahewallu naungngu. Paaraua'a al᷊al᷊eo, wuṛṛu pa'ola'e apapia.

¹⁰ Ṛinone manga tuṛṛangnga uararangngu sangkatou ringannu waine wuṛṛu uaa'akkanna ere manga taumata apan uasangkatuṛṛangnga sulal᷊ummu amonanna sambau, wuṛṛu ṛinone i yamiu ual᷊al᷊iu ṛoro mangonggolu addatta.

¹¹ Pammanarate ringannu maṛṛimadda. Arie mangkete wolo'a. Pammanara su Mawu ringannu atatohassa wuassu Ghaṛṛahon Ruata.

¹² Ṛinone i yamiu mangngantimma Mawu ringannu mal᷊uassa, paasabare sulal᷊ummu asasusa, wuṛṛu paaṛṛimadda umal᷊iomanna.

¹³ Patatul᷊ungnga mapaasuungngu hausannu manga taumatan Saṛṛani waine wuṛṛu sal᷊ohoiwe manga tuṛṛangnga su pangangimanna sambau apan ta'e awaganannu, ringannu naungnga mal᷊uassa sulal᷊ummu wal᷊enu.

¹⁴ Paddorongke su Ruata tadea'u i Tou mangal᷊amatta manga taumata apan maṛṛagissa si yamiu. Ore, paddorongke Ruata mangal᷊amatta si mangitou, arie pangane.

¹⁵ Lalluasse su sambau ringannu manga taumata apan lulluassa, wuṛṛu luaite ringanni mangitou apan lulluai.

¹⁶ Pabbiakke su paddarame sangkatou ringannu waine. Imbaṛṛangnga mamunga, arawe sul᷊unga'a ririnu ere taumata apan manarane mawawo su aellegu awadaalla. Arie mamendamma ririnu apandeanne wuassu ṛinone.

¹⁷ Amungkangngu taumata mandal᷊eo si'o, arie wal᷊isannu al᷊al᷊eo. Ola'e apa apan mapia su aellegu awadaalla.

¹⁸ Wuassu sambaanu padea'a mabbiakka su paddarame ringannu taumata nambo.

¹⁹ Manga tuṛṛangku! Arie saran paassa i'o mangune, wala'e Ruata maṛṛuumanna. Ana waugu sulal᷊ummu Wuke Susi uawoṛṛetta, “Ete i Ya'u apan mabbal᷊issa, i Ya'u sarun maṛṛuumanna, unnu wisaran Mawu.”

²⁰ Arawe amungkangngu seenu mal᷊unussa, i tou onggol᷊e n anna, wuṛṛu amungkangngu i tou marou, painuma'a i tou. Ana waugu ringannu na'ola'a aroddi, tuṛṛangnga namansili si tou.

²¹ Arie mapaawalan ririnu iapiddu al᷊al᷊eo, arawe ṛinone i yamiu mapaanawon kal᷊al᷊eo ringannu apapia.