ROMA 11 - WUKE SUSI WATTI'U AL᷊AL᷊USASSA

Apapia naungngu Ruata su walahannu Israel

¹ I ya'u maiwal᷊o: Apa Ruata suete nandammen walahan-Ne sassane? Atonna tawe! I ya'u sassane sangkatou taumatan Israel papapulunni Abraham, wuṛṛu wuassu ṛuanganni Benyamin.

² Tawe! Ruata tawe nandammen walahan-Ne apan buatte nipile-Ne ro'en paarorone. Manga tuṛṛangnga masingkata apa apan uawoṛṛetta sulal᷊ummu Wuke Susi su ola'i Elia, su tempo i tou nangalaen hatton taumatan Israel su Ruata, Elia nabbisara,

³ “Mawu, manga taumata buatte namate manga nabi-Nu wuṛṛu naṛṛimunsa'a manga tampam pangangadoannu sasambanu Mawu. Ete ya'u sassane nallambe wuṛṛu i mangitou lai maapulu mamate si ya'u.”

⁴ Apa sasimbakku Ruata si Elia? Ruata sinumimbakka, “I Ya'u buatte nanantangngu pitu ṛiwu su atoune hunane su riri-U sassane. Taambe saran paassa i mangitou nassubba paal᷊uanni Baal.”

⁵ Aroddi lai orassa indi: Pia sire pira manga taumata apan buatte nipilen Duata ana waugu al᷊aman-Ne.

⁶ I Tou namile si mangitou ana waugu pinangianannu al᷊aman-Ne wuṛṛu wal᷊ine ana waugu pinangiananne pallal᷊agun mangitou. Ana waugu amungkangngu pamamilen Ruata udde pinangiananne wuassu pallal᷊agun taumata, ne al᷊amattu Ruata udde wal᷊inewe al᷊amatta apan tutune.

⁷ Nariaddi, ereapate? Walahanna Israel tawe naasomba apa apan radeaanni mangitou. Naasomba udde tumba'u sire pira taumata wuassu ammul᷊anna adio'a apan buatte nipilen Duata. Ingana'a waine sarangkanambone nabbal᷊i mal᷊awangnga su wawaggo Ruata.

⁸ Ana waugu sulal᷊ummu Wuke Susi uawoṛṛetta arendi, “Ruata na'ola'a naungnga wuṛṛu ṛingiddi mangitou nabbal᷊i maattika; wuṛṛu na'oman sara orassa indi mata mangitou tawe maasilo wuṛṛu tal᷊inga mangitou tawe maaringikka.”

⁹ Daud nabbisara lai, “Wala'e manga andeangngi mangitou maola'a wal᷊ati'a si mangitou sassane, wuṛṛu maola'a loṛṛangnga, tampa mangitou manawo wuṛṛu maṛṛimunsa'a!

¹⁰ Wala'e mata mangitou maddanduma tadea'u i mangitou tawe maasilo; wuṛṛu wala'e i mangitou maola'a al᷊udungnga sarangkal᷊o'engnge.”

¹¹ I Ya'u maiwal᷊o apia; Su tempon taumatan Yahudi nanawo, apa udde mariaddi tadea'u i mangitou maṛṛimunsa'a? Atonna-tonna tawe! Arawe ana waugu i mangitou marosa, ne walahanna waine naasomba asasal᷊amatta, na'oman sara taumatan Yahudi tawe mal᷊uassa su walahanna waine udde.

¹² Ana waugu walahannu Yahudi nassal᷊a wuṛṛu maddiri tumuṛṛutta apulun Duata, ne manga walahanna waine nial᷊amatannu Ruata. Nangillembo lai amungkangngu paa'aukku walahannu Yahudi ringannu Ruata maola'a mapia; ne maggewal᷊anna lai al᷊amatta apan sarun ionggolu Ruata!

Asasal᷊amattu walahanna waine apan wal᷊ine Yahudi

¹³ Arawe orassa indi mappianne i ya'u mabbisara su manga tuṛṛangnga apan wal᷊ine Yahudi! Al᷊annune indi, naola'a rasul su walahanna wal᷊ine Yahudi, i ya'u lembo mangngarega manara'u.

¹⁴ I Ya'u mangngantimma, i ya'u wotongnge mapaal᷊apputu naungnga lal᷊eo su walahannu sassane, tadea'u ringannu lal᷊anne udde i ya'u wotongnge manal᷊amatta sambageanganna wuassi mangitou.

¹⁵ Ana waugu i mangitou tawe tinarimmattu Ruata, ne paa'aukku runia ringannu Ruata naola'e apia; nangillembo lai amungkangngu i mangitou tinarimmattu Ruata! Udde nassul᷊ungngu ere taumata nate nabbiakka apia!

¹⁶ Amungkangngu roti sampaddi apan paarorone buatte nionggola su Ruata, udde atappasanne rotine sarangkanambone udde nionggola su Ruata lai. Wuṛṛu amungkangngu ṛamuttu alu udde lai pussa'an Duata udde atappasanne manga rannane lai pussaa-Ne.

¹⁷ Sangkawageanganna wuassu manga rannang alu zaitun – eteudde manga taumatan Yahudi – niattibba. Wuṛṛu su lanna'u attibba udde nireeta rannan kalu zaitunna lul᷊u, eteudde manga tuṛṛangnga apan wal᷊ine Yahudi. Tuṛṛangnga nireeta isudde tadea'u tuṛṛangnga maattemma al᷊awo'a apan mapia wuassu pabbawiakku ṛimuudu manga taumatan Yahudi.

¹⁸ Ana waugu udde ariete i yamiu mangngadio'a si mangitou apan buatte nitonto ere ranna udde. I yamiu ṛinone mannaungnga manungku i yamiu tumba'u rannane. Wuṛṛu wal᷊ine ranna apan mangngonggolu anna su ṛamunne, ewe'e ṛamutta apan mangngonggolu anna su rannane.

¹⁹ Arawe i'o sarun mabbisara, “Ore, arawe manga ranna udde nitonto tadea'u i ya'u wotongnge ireeta su alune!”

²⁰ Udde mangke atonna. Arawe i mangitou niramme ana waugu i mangitou tawe mangimanna, arawe tuṛṛangnga tinarimmatta ana waugu tuṛṛangnga mangimanna. Nariaddi imbaṛṛangnga tuṛṛangnga mamunga ana waugu udde; arawe ṛinone i'o pia apendamma mata'utta.

²¹ Ana waugu amungkangngu Ruata tawe umakkannu taumatan Yahudi iramme ere manga ranna tutune udde, arie passunna manungku i Tou mappau mandammenu!

²² Nariaddi isindi i ite naasilo aroddi apiane Ruata wuṛṛu aroddi aattike lai i Tou. I Tou maṛṛagissa su saruanni mangitou apan marosa, arawe naungngi Tou masaṛṛionto'a si'o – sambal᷊iate i'o sidutu mabbiakka wuassu darangngu-Ne. Amungkangngu tawe, i'o lai sarun iramme.

²³ Wuṛṛu su ola'u manga taumatan Yahudi udde, amungkangngu i mangitou mawal᷊u wuassu pallal᷊agu tawe mangngimanna, i mangitou sarun itarimmata apia; ana waugu Ruata pia taṛṛino manarimmatti mangitou apia.

²⁴ Tuṛṛangnga apan wal᷊ine wuassu walahannu Yahudi udde, naal᷊ihida rannan alu zaitun apan lul᷊u. Ei, amungkangngu i'o uatata'ae sulal᷊ummu pallal᷊agunu, wotongnge ireeta su alu zaitun tutune, lembonete manga taumatan Yahudi apan nisumandingnga su manga rannan alu zaitun tutune udde. Natantunna malluasanne Ruata mamelengngi mangitou su punnu alun zaitunni mangitou sassane.

Darangngun Duata su anambon taumata

²⁵ Manga tuṛṛangnga! I ya'u mangantimma yamiu arie mamendamma manungku yamiu masingkaten sarangkanambone. Ana waugu pia sambau apan ipaapulun Duata, arawe taambe niasingkatannu taumata. Wuṛṛu i ya'u maapulu i yamiu maasingkata; eteudde indi: Sangkawageanganna wuassu taumatan Yahudi apan mal᷊awangnga, arawe pallal᷊agu mangitou udde tumba'u ma'oma su tempone, napawe anambon taumata apan wal᷊ine Yahudi apan rudanta ringannu Ruata udde natimute.

²⁶ Ete aroddi anambon taumatan Yahudi sarun masal᷊amatta. Ana waugu sulal᷊ummu Wuke Susi uawoṛṛetta arendi, “Ratun Punnu Sal᷊amatta sarun rumanta wuassu Sion; I Tou sarun manubbussa anambon al᷊al᷊eon papapulunni Yakub.

²⁷ I Ya'u sarun mangonggolu paaire indi si mangitou su tempo i Ya'u mangampungnga manga rosan mangitou.”

²⁸ Ana waugu taumatan Yahudi maddiri manengkamma Watti'u Al᷊al᷊uassa wuassu Ruata, ne i mangitou naola'a seettu Ruata; wuṛṛu udde maola'a auntungannu manga tuṛṛangnga apan wal᷊ine Yahudi. Arawe ana waugu buatte nipilen, ne manga taumatan Yahudi sidutu raddanguannu Ruata ana waugu iupungngu al᷊amona mangitou.

²⁹ Ana waugu amungkangngu Ruata mamile taumata wuṛṛu mangal᷊amatta taumata udde, Ruata tawe mangul᷊e apia apa apan buatte niolang-Nge.

³⁰ Dorone i yamiu maddiri tumuṛṛutta Ruata. Arawe orassa indi Ruata buatte napaal᷊iatta'a manungku i yamiu nal᷊iute wuassu pasasal᷊a, ana waugu taumatan Yahudi maddiri tumuṛṛutta.

³¹ Aroddi lai su manga taumatan Yahudi udde. Orassa indi i mangitou maddiri tumuṛṛutta Ruata, tadea'u i yamiu iapaal᷊iatta'a manungku i yamiu nal᷊iute wuassu passasal᷊a. Arawe i mangitou lai sarun iapaal᷊iu wuassu passasal᷊a.

³² Ana waugu Ruata suete namalan taumata paparentannu lal᷊awangnga, tadea'u i Tou wotongnge mapaal᷊iatta'u darangngu-Ne si mangitou sarangkanambone.

Daralo su Ruata

³³ Ala atonna Ruata! Wahewalla atonna apapande-Ne wuṛṛu asingka-Ne! Isai wotongnge maasingkata al᷊awo'u manga laṛṛawen-Ne? Isai wotongnge maasunna manga olangnge i Tou mammanara?

³⁴ Sulal᷊ummu Wuke Susi uawoṛṛetta arendi, “Isai wotongnge maasingkata ṛingiṛṛannu Mawu? Isai wotongnge manantiro si Tou

³⁵ Isai buatte nangonggolu sarannapa su Mawu na'oman sara i tou wotongnge madorongnga wawal᷊inne?”

³⁶ Ruata apan nandiaddi sarangkanambone. Sarangkanambone udde wuassu Ruata wuṛṛu udde lai hunane su Ruata. Paddalote Ruata ma'oman sarangkal᷊o'engnge! Amin.