REENGANNA 9 - WUKE SUSI WATTI'U AL᷊AL᷊USASSA

Ramean Paskah aruane

¹ Su wul᷊anna paaororone sulal᷊ummu tonna aruane napawe walahannu Israel nanantangngu Mesir, Mawu nabbisara si Musa su wadda'u Sinai.

² Unnu Mawu,

³ “Su allo apul᷊one appata wul᷊anna indi, manattakka su tempo matannallo umattuppa, taumatan Israel ṛinone maddamea Paskah tumuṛṛuttu atoranna apan buatte tinantunna.”

⁴ Ne i Musa nandolokku walahannu Israel maddamea Paskah.

⁵ I mangitou naddamea su wadda'u Sinai tempo wawallo allone mapul᷊o appata wul᷊anna paarorone. Al᷊awo'a apan niola'i mangitou uasul᷊ungnga ere nirolokku Mawu si Musa.

⁶ Arawe su wallati mangitou pia manga siri pira taumata ma'arantinna ana waugu buatte namita asuangnga, na'oman sara tate wotongnge mallaghun Paskah su allo udde. I mangitou udde inaite simemaruanna si Musa wuṛṛu si Harun,

⁷ wuṛṛu nabbisara, “Yami indi ma'arantinna ana waugu buatte namita asuangnga. Arawe anio yami ṛinone iṛṛae ma'oman sara tawe wotongnge mangonggolu sasamba su Mawu suadio'a ringannu manga tuṛṛangngi yami?”

⁸ I Musa sinumimbakka, “Paṛṛadote asuene ma'oman sara i ya'u maasomba tatantiro wuassu Mawu.”

⁹ Mawu nandolokki Musa

¹⁰ niapawal᷊o su walahannu Israel, “Amungkangngu su wallati yamiu ara'e papapulunnu piaddu ma'arantinna ana waugu buatte nangindingnga winal᷊unanna ara'e tantal᷊anna sulal᷊ummu amatanna marau, i tou lai ṛinone mallaghu Paskah su Mawu.

¹¹ Arawe ramea udde ṛinone olaanna sambul᷊anna sal᷊immurine, eteudde su ṛabbi allo appul᷊one appata sul᷊alummu wul᷊anna aruane. Laghua'e allo udde ringannu uminassa Domban Paskah wuṛṛu roti apan tawe ragine wuṛṛu sayore mapetta.

¹² Imbaṛṛangnga manantangngu manga apa wuassu anna udde maddatingngu tiṛṛabbi marua allone, wuṛṛu imbaṛṛangnga saran sambau wuassu duṛṛin binatangnga apan nionggola si Ya'u. Laghua'e Paskah udde tumuṛṛuttu al᷊awo'u atoranne.

¹³ Arawe taumata apan tawe maarantinna wuṛṛu tawe lai sulal᷊ummu amatanna marau, sidutu wolo'a mallaghu Paskah, tate lai Ta'u ireengnga maola'a walahang-Ku, ana waugu i tou tawe nangonggolu sasamba si Ya'u su tempo apan buatte tinantunna. Taumata udde ṛinone mamasanna pangillul᷊eannu rosane.

¹⁴ Amungkangngu su wallati yamiu pia sangkatou raho apan ma'apulu mallaghu Paskah, i tou ṛinone mallaghu tumuṛṛuttu anambon atoranna wuṛṛu apan buatte tinantunna. Tita udde maṛṛia'a su anambon taumata, mawae ete taumatan Israel aroddi lai su taumata raho.”

Winabbawa apan pia asasemakke

^15-16 Su tempo Rasannu Mawu niapararisikka, nirumantate winabbawa wuṛṛu nanaappa Rasanna udde. Su tempo ṛabbi maddatingngu marua allo winabbawa udde ellehanna naal᷊ihidda putungnga.

¹⁷ Suapan winabbawa udde rumuitta, taumatan Israel manggohakku paddasananni mangitou, ana see mangingkatta. Wuṛṛu suapan binabbawa udde umonto'a, su tampa udde i mangitou maddasanna apia.

¹⁸ Wuassu parenta Mawu walahannu Israel udde nanggohakku rasanna wuṛṛu wuassu parenta Mawu lai i mangitou mapararisikka apia. Su al᷊annune winabbawa udde su wowon Dasannu Mawu, i mangitou sidutu uatana'a isudde.

¹⁹ Amungkangngu winabbawa udde mal᷊annu isudde su wowon Dasanna, i mangitou tuttuṛṛutta atorannu Mawu wuṛṛu tawe mangingkattu tampa udde.

²⁰ Arawe masokka lai tumba'u manga pira allo winabbawa su wowon Dasanna udde. Salaiwe ereapa lai, tumba'u parenta Mawu manantunni mangitou matana'a su sambau tampa ara'e mangingkatta.

²¹ Masokka lai winabbawa udde tumba'u matana'a wuassu wawallo ma'oman sara marua allo, wuṛṛu su tempo winabbawa udde rumuitta marua allo, i mangitou mangingkatte lai. Walate winabbawa udde rumuitta, mawae allo ara'e ṛabbi, i mangitou mangingkatta.

²² Su al᷊annune winabbawa udde su wowon Dasannu Mawu, tanne al᷊annune dua allo, sambul᷊anna, santonna ara'e lumebbe, al᷊annune udde lai i mangitou uatana'a su tampa udde. Amungkangngu winabbawa udde rumuitta, wakkute udde i mangitou mangingkatta.

²³ I mangitou uatana'a su sambau tampa wuṛṛu mangingkatta su tampa waine, udde wuassu parenta Mawu apan nionggola si Musa.