REENGANNA 8 - WUKE SUSI WATTI'U AL᷊AL᷊USASSA

Ola'u mangaddon sol᷊o

^1-2 Mawu nabbisara si Musa, “Wal᷊oa'a si Harun manungku su tempo i tou mande'omma sol᷊o su leddan sol᷊o udde, i tou ṛinone mande'omma mapia-pia tadea'u maasemakka saruannu leddan sol᷊o udde.”

³ I Harun tinumuṛṛutta apa apan nirolokku Mawu. I tou nande'omma manga sol᷊o udde uasaruanna wageangngu monane wuassu leddan sol᷊o.

⁴ Tampan sol᷊o udde, maddatingngu al᷊iu rosone wuṛṛu manga wunga lal᷊ogakke niola'a wuassu wul᷊awanna nisassalla, tumuṛṛuttu tul᷊addane apan niapasilo Mawu si Musa.

Patatenegu manga taumatan Lewi

⁵ Mawu nabbisara si Musa,

⁶ “Ṛaea'e manga taumatan Lewi wuassu taumatan Israel waine wuṛṛu amata'e lal᷊aghu pangangukkassa si mangitou

⁷ ringannu olangnge indi: saṛṛanite i mangitou ringannu ua'e hunan lal᷊aghun pamamaresi wuṛṛu doloṛṛae i mangitou mangiṛṛi ahewallu watanganne wuṛṛu mabbansalla laubbi mangitou. Ringannu aroddi i mangitou nawaresite.

⁸ Ana see i mangitou doloṛṛa'a mangal᷊appa sambau sapi esakka saṛṛen tumuwo ringannu sasamba ia'imbe wuassu taponna apan nilo'annu lana. Ana see i'o ṛinone manganu sapi esakka waine maola'a sasamba ipangampungnga rosa.

⁹ Wua'udde ammul᷊a'e anambon ṛuangannu Israel wuṛṛu doloṛṛa'e taumatan Lewi dumarisikka su saruannu Rasang-Ku.

¹⁰ Taumata sarangkanambone ṛinone mangandangngu lima mangitou su wowon pua manga taumatan Lewi,

¹¹ ana see i Harun ṛinone mangonggolu manga taumatan Lewi udde maola'a sambau sasamba apan niṛṛae wuassu manga taumatan Israel si Ya'u, tadea'u i mangitou wotongnge mattaṛṛamawu si Ya'u.

¹² Ana see taumatan Lewi ṛinone mangandangngu lima mangitou su wowon pua darua sapi esakka udde; iapa sambau ṛinone ionggola maola'a sasamba aampungnga rosa, wuṛṛu sambau lai maola'a sasamba itattambunna. Ringannu lal᷊aghu udde taumatan Lewi na'ukkassa.

¹³ Ṛaea'e manga taumatan Lewi si Ya'u wuṛṛu doloṛṛa'e i mangitou mangimbe si Harun wuṛṛu al᷊aṛṛanangnge.

¹⁴ Ringannu lal᷊aghu udde i yamiu naṛṛae manga taumatan Lewi wuassu taumatan Israel waine, tadea'u maola'a pussa'a-U.

¹⁵ Napawe i'o buatte na'ola'a lal᷊aghu pananantillu manga taumatan Lewi udde, i mangitou piate taṛṛino mammanara sulal᷊ummu Rasang-Ku.

¹⁶ I Ya'u buatte na'ola'a si mangitou ipangganti anambon ana'a esakka pahul᷊un Israel; nariaddi i mangitou tumba'u niṛṛae si Ya'u.

¹⁷ Su tempo i Ya'u namate anambon ana'a pahul᷊u su Mesir, ana'a pahul᷊u wuassu suapan amonannu Israel wuṛṛu suapan binatangnga apan niasungkangnga paarorone buatte Ta'u niola'a pussa'a-U apan niṛṛae.

¹⁸ Orassa indi maola'a hahantin anambon ana'a esakka pahul᷊un Israel, i Ya'u manganu manga taumatan Lewi,

¹⁹ wuṛṛu manga taumatan Lewi udde Ta'u itantilla si Harun wuṛṛu al᷊aṛṛanangnge, tadea'u wotongnge mammanara hunan taumatan Israel sulal᷊ummu Rasang-Ku. See lai tadea'u i mangitou madorongnga aampungnga si Ya'u hunan balahannu Israel tadea'u balahanna udde tawe aemaannu asasilaka amungkangngu i mangitou rumanta tumaniten marani watukku tampa apan na'ukassa udde.”

²⁰ Ana waugu udde i Musa, i Harun wuṛṛu anambon taumatan Israel nangonggolu taumatan Lewi su Mawu, ere buatte nirolokku Mawu si Musa.

²¹ Manga taumatan Lewi udde na'ola'a lal᷊aghu pamamaresi watanganne wuṛṛu nabbansalla laubbi mangitou, ana see i Harun nanantilli mangitou maola'a sambau sasamba apan niṛṛae su Mawu. I tou lai nallaghu pamamaresi si mangitou.

²² Taumatan Israel tinumuṛṛutta al᷊awo'u parenta Mawu si Musa su ola'u taumatan Lewi. Ringannu aroddi taumatan Lewi naasomba taṛṛino mammanara sulal᷊ummu Rasannu Mawu su al᷊ungngu piaṛṛa'i Harun wuṛṛu al᷊aṛṛanangnge.

²³ Mawu nabbisara si Musa,

²⁴ “Suapan taumatan Lewi apan uukke ruan pul᷊o l᷊ima su tonnane ire'e, ṛinone mapaamattu manarane sulal᷊ummu Rasang-Ku,

²⁵ wuṛṛu su uukka liman pul᷊o su tonnane i tou tate iapamanara.

²⁶ Wua'udde i tou wotongngete massumbala taumatan Lewi waine apan mammanara sulal᷊ummu Rasang-Ku, arawe allo-allo i tou tate mammanara. Etearoddi olangnge mangatokku manara manga taumatan Lewi.”