REENGANNA 7 - WUKE SUSI WATTI'U AL᷊AL᷊USASSA

Sasamba manga piaṛṛa'angnge

¹ Su tempo i Musa nuddusse napararisikku Rasannu Mawu, Rasanna udde ringannu al᷊awo'u saranapane nitenega ringannu sarangkanambone niwuṛṛannu lanan lal᷊aghu. Aroddi lai niolangnge su mezbah wuṛṛu al᷊awo'u saranapane.

² Ana see manga piaṛṛa'u Israel, eteudde manga timmadu ṛuanganna apan niaṛṛiaannu manara mandeengngu taumata,

³ mangonggolu sasamba su saruannu Mawu annummu wau roda wuṛṛu mapul᷊o dua sapi; suapan ruan katou piaṛṛangnge mangonggolu sambau roda, wuṛṛu sangkatou-sangkatou sapi sambau. Napawe i mangitou buatte nangonggola,

⁴ Mawu nabbisara si Musa,

⁵ “Sengkampe manga aonggola udde, tadea'u ipangapiddu Rasang-Ku; tantil᷊a'e sarangkanambone udde su taumatan Lewi ana waugu udde manaran mangitou.”

⁶ Ana see manga roda wuṛṛu manga sapi nitantilli Musa su taumatan Lewi.

⁷ Roda darua wuṛṛu sapi appatta nionggola su taumatan Gerson,

⁸ appatta roda wuṛṛu sapi ual᷊u nionggola su taumatan Merari, nassul᷊ungngu manara apan a'olaanni mangitou su al᷊ungngu piaṛṛa'i Itamar, ana'i Imam Harun.

⁹ Arawe manga taumatan Kehat tawe nanengkamma roda ara'e sapi wuassi Musa, ana waugu manga saranapa na'ukkassa apan maola'a manara mangitou, ṛinone pasannananni mangitou su wambangnga.

¹⁰ Manga piaṛṛa'a uaapiddu sasamba ipaddamea patatenegu mezbah. Napawe i mangitou nasaddiate mangapiddu aonggoli mangitou su saruannu mezbah,

¹¹ Mawu nabbisara si Musa, “Wal᷊oa'e si mangitou manungku mamiallo su al᷊annune mapul᷊o dua su allone sangkatou su wallatu manga piaṛṛangnge udde ṛinone mangonggolu sasambane udde maola'a lal᷊aghun patatenegu mezbah.”

^12-83 Sangkatou-sangkatou uaapiddu sasambane tumuṛṛuttu atokke indi: Allo Ṛuanganna Piaṛangnge 1 I Yehuda I Nahason ana'i Aminadab 2 I Isakhar I Netaneel ana'i Zuar 3 I Zebulon I Eliab ana'i Helon 4 I Ruben I Elizur ana'i Syedeur 5 I Simeon I Selumiel ana'i Zurisyadai 6 I Gad I Elyasaf aba'i Rehuel 7 I Efraim I Elisama ana'i Amihud 8 I Manasye I Gamaliel ana'i Pedazur 9 I Benyamin I Abidan ana'i Gideoni 10 I Dan I Ahiezer ana'i Amisyadai 11 I Asyer I Pagiel ana'i Okhran 12 I Naftali I Ahira ana'i Enan Sasamba mangitou sambau-sambau eteudde: sambau lama'a sal᷊a'a awakkanne 1.5 su kilone wuṛṛu sambau baskom sal᷊a'a awakkanne 800 gram, tumuṛṛuttu timbanganna apan ipappaatta su Rasannu Mawu. Tampa darua udde napene niloṛṛoannu taponna lal᷊oannu lana maola'a sasamba ia'imbe. Wal᷊ine wua'udde lai sambau lama'a wul᷊awanna awakkanne 110 gram lal᷊oṛṛoannu amania; sambau sapi esakka saṛṛen tumuwo, sambau domba esakka wuṛṛu sambau ana'u domba uukke santonna maola'a sasamba itattambunna, see lai sambau ambinga esakka maola'a sasamba ipangampunga rosa; sapi darua; domba esakka lima, ambinga esakka lima, wuṛṛu lima domba uukke santonna maola'a sasamban paddarame.

Allo Ṛuanganna Piaṛangnge

^84-88 Sasamba apan niapiddu siri mapul᷊o dua piaṛṛangnge udde ipattenegu mezbah wuṛṛu reenganne sarangkanambone: – mapul᷊o dua lama'a sal᷊a'a wuṛṛu mapul᷊o dua baskom sal᷊a'a apan awakkanne sarangkanambone 27.6 su kilone – mapul᷊o dua lama'a wul᷊awanna apan awakkanne sarangkanambone 1.32 su kilone, napene lal᷊oṛṛoannu amania – mapul᷊o dua sapi esakka, mapul᷊o dua domba esakka, wuṛṛu mapul᷊o dua ana'u domba uukke santonna, suadio'a ringannu sasamba ia'imbe maola'a sasuung sasamba itattambunna – mapul᷊o dua ambinga maola'a sasamba aampungnga rosa – ruan pul᷊o appata sapi esakka, annummu pul᷊o domba esakka, annummu pul᷊o ambinga, wuṛṛu annummu pul᷊o ana'u domba uukke santonna maola'a sasamban paddarame.

⁸⁹ Suapan i Musa sumutta sulal᷊ummu Rasannu Mawu, maggahatto Mawu, i tou ma'aringikka tingikku Mawu apan mabbisara si tou wuassu wowon lal᷊uubbu Wantallu Pa'aire su wallatu darua paal᷊uannu mala'ekatta.