REENGANNA 36 - WUKE SUSI WATTI'U AL᷊AL᷊USASSA

Wageangngu manga wawine apan buatte na'awingnga

¹ Manga tembonannu amonanna sulal᷊ummu amonanni Gilead, ana'i Makhir, eteudde pulunni Manasye, ana'i Yusuf, inaite sinumaruanna si Musa wuṛṛu manga piaṛṛangnge waine.

² Unni mangitou, “Mawu nandolokki yamiu niapatahia leta'a udde su taumatan Israel ringannu lal᷊anne ia'undi. I Tou lai nandolokki yamiu nangonggolu leta'a pussa'an tuṛṛangngi Zelafehad su al᷊aṛṛanangnge wawine.

³ Arawe ṛinone naunganna manungku napawe i mangitou ma'awingnga ringannu sangkatou esakka wuassu ṛuanganna waine, leta'i mangitou manawo su lima ṛuanganna udde. Ringannu aroddi leta'a apan buatte nitantunna maola'a wageangnge yami sarun mahaingnga.

⁴ Sulal᷊ummu Tonna Pamamelenganna, su tempon anambon darotongnga apan buatte niwal᷊u'a iapawelengnga su tatahuanne paarorone, leta'u manga ana'i Zelafehad wawine udde sidutu sarun maola'a pussa'an manga awingngi mangitou, na'oman sara ṛuanganni yami niahaingannu leta'a udde.”

⁵ Ana see i Musa namasingkatta su walahannu Israel parenta indi wuassu Mawu, “Wisara manga taumata papapulunni Yusuf udde atonna,

⁶ wuṛṛu ana waugu udde Mawu nabbisara manga ana'i Zelafehad wawine wotongnge ma'awingngi sai-sai apan ipaapulun mangitou, sawal᷊iate ṛuanganne uasul᷊ungngi mangitou.

⁷ Leta'a pussa'a suapan taumatan Israel sidutu maola'a wageangngu ṛuanganne.

⁸ Suapan bawine apan uatahuanna leta'a pussa'a suwallatu sambau ṛuanganna su lalummu walahannu Israel, ṛinone ma'awingngu taumata sulal᷊ummu ṛuanganna udde lai. Ringannu aroddi suapan taumatan Israel sarun maatahuanna leta'a pussa'an iupungngu al᷊amonane,

⁹ na'oman sara leta'a pussa'a udde tawe ma'ingkatta wuassu ṛuanganna sambau watukku ṛuanganna waine. Suapan ṛuangannu walahannu Israel sidutu sarun maatahuanna leta'a pussaane sassane.”

^10-11 Nariaddi uasul᷊ungngu parentan Mawu si Musa, siri lima ana'i Zelafehad wawine udde, eteudde i Mahla, i Tirza, i Hogla, i Milka wuṛṛu i Noa na'awingngu manga taumata apan ta'e tuṛṛangnga wuassu iamangnge.

¹² I mangitou na'awingngu manga taumata wuassu manga ṛuanganna sulal᷊ummu ṛuanganni Manasye, ana'i Yusuf. Ringannu aroddi leta'a pussa'a mangitou sidutu maola'a pussa'a ṛuangannu walahannu iamangngi mangitou.

¹³ Eteudde manga atoranna wuṛṛu manga tita apan nionggolu Mawu su walahannu Israel si Musa, su tempo walahannu Israel uatana'a su ratakku Moab su wiwikku Sal᷊ukku Yordan maranin Soan Yerikho.