REENGANNA 34 - WUKE SUSI WATTI'U AL᷊AL᷊USASSA

Manga passarannu wanua udde

^1-2 Mawu nangonggolu manga parenta indi si Musa hunan balahannu Israel, “Tate mal᷊annu lai yamiu sarun sumutta su wanua Kanaan, wanua apan Ta'u ionggola si yamiu maola'a leta'a pussa'a. Indiwe manga passarannu wanuanu udde.

³ Su timukka, passaranna udde manattakka wuassu wadda'u Zin rumurukka su Edom. Su ra'i passaranna udde manattakka wuassu pentakku timukku Tahal᷊oangnga Nate,

⁴ mabbeṛṛo watukku timukka mattuddan Lal᷊annu Akrabim wuṛṛu masal᷊a watukku Zin maddatingngu Kades-Barnea su timukka. Wua'isudde mabbeṛṛo watukku pal᷊onna ma'oman sara Hazar-Adar, wuṛṛu masal᷊a watukku Azmon.

⁵ Isudde mabbeṛṛo watukku wawal᷊anna su passarannu Mesir wuṛṛu muddussa su Tahal᷊oangnga Tangngane.

⁶ Tahal᷊oangnga Tangngane maola'a passarannu wanuanu su samba'an baṛṛatta.

⁷ Su sawannakka, passaranna udde manattakka wuassu Tahal᷊oangnga Tangngane mattudda watukku Wowon Hor

⁸ wuṛṛu wua'isudde watukku Lal᷊annu Hamat, ana see masal᷊a watukku Zedad

⁹ wuṛṛu watukku Zifron wuṛṛu muddussa su Hazar-Enan.

¹⁰ Su ra'i passaranna udde manattakka wuassu Hazar-Enan watukku Sefam.

¹¹ Wua'isudde sumossoka watukku Ribla su samba'an da'in Ain, ana see masal᷊a watukku manga wuidda su apannu ra'in Danon Galilea,

¹² wua'udde watukku timukka su al᷊o'engngu Sal᷊ukku Yordan maddatingngu Tahal᷊oangnga Nate. Eteudde wanuanu tumuṛṛuttu manga passaranna apan uapal᷊iwutta.”

¹³ I Musa nabbisara su walahannu Israel, “Eteudde leta'a apan sarun sengkamanni yamiu ringannu iundi, leta'a apan tumuṛṛuttu parentan Mawu ṛinone tahianna su ṛuanganna sio mattangnga ṛuangannu su walahannu Israel.

¹⁴ Manga ṛuanganni Ruben wuṛṛu i Gad wuṛṛu sambageanganna wuassu ṛuanganni Manasye buatte nanengkamma wageangngi mangitou, wuṛṛu leta'a udde lai buatte nitahia su manga amonanni mangitou.

¹⁵ Leta'a pussa'a mangitou udde su samba'an da'in Sal᷊ukku Yordan, maranin soa Yerikho.”

Manga piaṛṛa'a apan niapamanara mattahia leta'a udde

¹⁶ Mawu nabbisara si Musa,

¹⁷ “Apan mattahia leta'a udde suwallati yamiu eteudde i Imam Eleazar, wuṛṛu i Yosua ana'i Nun.

¹⁸ Ta'ea'a lai sangkatou piaṛṛa'a wuassu walahanna passambau iapal᷊al᷊ima si Eleazar wuṛṛu si Yosua mattahia leta'a udde.”

^19-28 Arannu manga taumata udde eteudde: Ṛuanganna Piaṛa'a I Yuda i Kaleb ana'i Yefune I Simeon i Samuel ana'i Amihud I Benyamin i Elidad ana'i Kislon I Dan i Buki ana'i Yogli I Manasye i Haniel ana'i Efod I Efraim i Kemuel ana'i Siftan I Zebulon i Elisafan ana'i Parnah I Isakhar i Paltiel ana'i Azan I Asyer i Ahihud ana'i Selomi I Naftali i Pedael ana'i Amihud

Ṛuanganna Piaṛa'a

²⁹ Eteudde arannu manga taumata apan nirolokku Mawu niapatahia leta'a pussa'a su balahannu Israel su Kanaan.