REENGANNA 33 - WUKE SUSI WATTI'U AL᷊AL᷊USASSA

Amamatta wuassu Mesir watukku Moab

¹ Napawe walahannu Israel nanantangken Mesir, sulal᷊ummu atokke tumuṛṛuttu ṛuangannu sambau-sambau su piaṛṛa'i Musa wuṛṛu i Harun, i mangitou niumotongnga si manga pira tampa.

² Mawu nandolokki Musa niapawoṛṛettu arannu manga tampa apan niotonganni mangitou.

³ Walahannu Israel nanantangngu Mesir su allo mapul᷊o l᷊ima wul᷊anna paarorone, massallo napawe Paskah paarorone nal᷊iudda. Sulal᷊ummu lu'addu Mawu i mangitou nanantangngu soan Rameses, aellehannu walahannu Mesir,

⁴ apan tantal᷊anna mallabbingngu manga ana'i mangitou pahul᷊u apan buatte nipaten Mawu. Ringannu inolaanna udde, Mawu napal᷊iatta'a manungku i Tou mattohasanna wuassu manga mongannu Mesir.

⁵ Napawe walahannu Israel nanantangngu Rameses, i mangitou naddasanna su Sukot.

⁶ Ana see i mangitou inaite apia wuṛṛu naddasante su Etam, su wiwikku wadda'a.

⁷ Wua'isudde i mangitou nabelengnga watukku Pi-Hahirot, su samba'an da'i Baal-Zefon, ana see naddasanna maranin Migdol.

⁸ Wua'udde i mangitou nanantangke Pi-Hahirot, nilumiu tahal᷊oangnga wuṛṛu sinumutta su wadda'u Etam; napawe tallute allo u'amatta, i mangitou naddasanna su Mara.

⁹ Isudde i mangitou nanassukku amatanna wuṛṛu naddasanna su Elim; isudde pia mapul᷊o dua al᷊imatan kua'e wuṛṛu pitun pul᷊o punnu alu kurma.

¹⁰ Wua'udde i mangitou nanantangngu Elim wuṛṛu naddasanna maranin Eṛṛangngu Suez.

^11-14 Wua'udde i mangitou naddasanna su wadda'u Sin, ana see su maranin Dofka, wua'udde su Alus, wuṛṛu wua'udde su Rafidim, arawe isudde tawe ua'e inumanna.

^15-37 Wuassu Rafidim i mangitou nasal᷊a watukku Wowon Hor wuṛṛu naddasanna su manga tampa indi: wadda'u Sinai, Kibrot-Taawa, “Labbingngu Awawal᷊iu”, Hazerot, Ritma, Rimon-Peres, Libna, Risa, Kehelata, Wowon Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, wadda'u Zin, wuṛṛu Wowon Hor, su passarannu leta'u Edom.

^38-39 Ringannu parentan Mawu, Imam Harun sinuma'a su Wowon Hor. Isudde i tou nate su allo paarorone wul᷊anna al᷊imane su tonna aiappatu pul᷊one napawe ṛuangannu Israel nanantangngu Mesir. Su tempo nate, uukki Harun 123 su tonnane.

⁴⁰ Tantal᷊anna udde ratun banua Arad, su Leta'u Negeb, Kanaan Timukka, naasomba watti'a manungku ṛuangannu Israel tantal᷊anna mattuda watukku wanuane.

^41-49 Sulal᷊ummu amatanna Wuassu Wowon Hor su ratakku Moab, taumatan Israel naddasanna su manga tampa indi: Zalmona, Funon, Obot, lanna'u Abarim su leta'u Moab, Dibon-Gad, Almon-Diblataim, Wowon Abarim maranin Wowon Nebo, wuṛṛu su ratakku Moab su wiwikku Sal᷊ukku Yordan, maranin Soan Yerikho, su wallatu Bet-Yesimot wuṛṛu Wawal᷊annu Sitim.

Manga parenta tantal᷊anna taambe nilumewessa Sal᷊ukku Yordan

⁵⁰ Su ratakku Moab udde, su wiwikku Sal᷊ukku Yordan, maranin soan Yerikho, Mawu nangonggola si Musa

⁵¹ manga parenta indi su walahannu Israel, “Amungkangngu i yamiu lumewessa su Sal᷊ukku Yordan inai sumutta watukku wanua Kanaan,

⁵² i yamiu ṛinone mallimbuakka anambon tumana'u wanua udde. Ṛimunsa'e anambon paal᷊uanni mangitou wuassu watu wuṛṛu atta'a see lai manga tampa patataṛṛamawuanni mangitou.

⁵³ Leta'a udde ṛinone aṛṛoanni yamiu wuṛṛu wanuanni yamiu, ana waugu udde Ta'u ionggola si yamiu.

⁵⁴ Wua'udde ṛinone tahianni yamiu maola'a pussa'a manga ṛuangannu ringannu lal᷊anne iundi. Su ṛuanganna apan bahewalla ṛinone lai ionggoli yamiu wageangnge apan bahewalla, wuṛṛu su ṛuanganna maradio'a, wageangnge lai addio'a.

⁵⁵ Arawe amungkangngu tumana'u wanua udde tawe limbuaṛṛanni yamiu, manga taumata apan sidutu uatana'a isudde sarun mapaasusanu ere anne su matanu wuṛṛu ere larangnga su leddanu. Ne ete i mangitou udde mamangalo si yamiu.

⁵⁶ Amungkangngu i yamiu tawe mallimbuakka si mangitou, i Ya'u sarun mamate si yamiu ere lai Ta'u niṛṛiinna su saruanni mangitou.”