REENGANNA 32 - WUKE SUSI WATTI'U AL᷊AL᷊USASSA

Manga walahannu Israel su samba'a ra'i Sal᷊ukku Yordan

¹ Manga ṛuanganni Ruben wuṛṛu i Gad uatahuanna manambo winatangnga. Napawe i mangitou naasilo aroddi apiane leta'u Yaezer wuṛṛu leta'u Gilead pabbuwunanna winatangnga,

² i mangitou inaite sinumaruanna si Musa, si Imam Eleazar, wuṛṛu manga piaṛṛangnge waine su Israel.

^3-4 Unni mangitou, “Leta'u manga soan Atarot, Dibon, Yaezer, Nimra, Hesybon, Eleale, Sebam, Nebo wuṛṛu Beon apan niatanaanten taumatan Israel ringannu aakkannu Mawu, tumaniten mapia pabbuwunanna winatangnga,

⁵ yami sumal᷊ande tadea'u leta'a udde ionggola si yami maola'a pussa'an kami. Ariete mandolokki yami mangingkatta su samba'an Sal᷊ukku Yordan.”

⁶ Sasimbakki Musa, “Ṛatadde i yamiu mappulu matana'a isindi, arawe manga taumata sambalahannu inai mapapangalo?

⁷ Anio i yamiu mammata'utta walahannu Israel inai lumewessa Sal᷊ukku Yordan wuṛṛu sumutta su wanua apan nionggolu Mawu si mangitou?

⁸ Manga iamangngu inolaanne aroddi lai, su tempo i ya'u nandolokki mangitou watukku Kades-Barnea niapapal᷊intaddu wanua udde.

⁹ I mangitou na'omate su wawal᷊annu Eskol wuṛṛu naasilote lai leta'a udde. Arawe su tempo i mangitou nabelengnga, i mangitou namata'utta walahannu Israel sumutta watukku wanua apan nionggolu Mawu si mangitou.

^10-11 Ne Mawu nasa'ute su tempo udde na'oman sarai i Tou nabbisara, ‘Manga taumata udde tawe tumuṛṛutta si Ya'u. Ana waugu udde i Ya'u massalu manungku wuassu wallati mangitou apan uukke datua pul᷊o ire'e su tempo i mangitou nanantangngu Mesir, taweddu maasutta watukku wanua apan buatte pina'ire-U si Abraham, si Ishak wuṛṛu si Yakub.’

¹² Anambon taumata niaṛṛinoannu ṛuumanna udde tabbene i Kaleb ana'i Yefune, taumatan i Kenas, wuṛṛu i Yosua ana'i Nun, ana waugu itarua sidutu matuṛṛutta su Mawu.

¹³ Mawu nasa'u su walahannu Israel na'oman sara i Tou namalan mangitou lullallele su wadda'a appatu pul᷊o su tonnane al᷊annune na'oman sara anambon taumata apan buatte nilumawangnga si Tou nate abbi.

¹⁴ Lumawangnga ere manga iamangngu! I yamiu atonna ammul᷊annu manga taumata marosa apan ma'ola'a asasa'un Mawu nangillembo su walahannu Israel!

¹⁵ Amungkangngu i yamiu mabbal᷊i'a tumal᷊iudda Mawu, ne ahewallu walahanna indi sarun iwalan Tou lembon mal᷊annu lai su wadda'a, wuṛṛu ete i yamiu nandantan papate si mangitou!”

¹⁶ Ana see manga taumatan i Ruben wuṛṛu manga taumatan i Gad udde nangundanin i Musa wuṛṛu nabbisara, “Mappianne yami malliu ṛorote ma'ola'a tanda'u manga domban kami, wuṛṛu manga soa apan pia darandungnge su ana'a wuṛṛu awingngi yami.

¹⁷ Yami sarun mandiahite inai mapapangalo suadio'a ringannu manga tuṛṛangngi yami. Yami sarun mamiaṛṛa'u pangalo udde wuṛṛu mangapiddi mangitou sumutta su wanua apan maola'a pussa'an mangitou. Tantal᷊anna udde ana'a wuṛṛu awingngi yami wotongnge matana'a isindi, su manga soa pia darandunge, mal᷊annabba wuassu pangalon tumana'u soa indi.

¹⁸ Yami sarun tawe mapul᷊e watukku wal᷊en kami tantal᷊anna taumatan Israel taambe naasomba leta'a maola'a pussaane.

¹⁹ Yami tawe manengkamma saran addio'a wuassu letai mangitou su samba'an Sal᷊ukku Yordan, ana waugu buatte nanengkamma wageangngi yami isindi, su samba'an da'i Sal᷊ukku Yordan.”

²⁰ Sasimbakki Musa, “Amungkangngu i yamiu atonna-tonna nariahite inai mapapangalo ana waugu Mawu,

²¹ wuṛṛu sarangkanambone su wallati yamiu apan botongnge mapapangalo lumewesse Sal᷊ukku Yordan, wuṛṛu su al᷊ungngu piaṛṛa'u Mawu mallimbuakka si mangitou,

²² na'oman sara wanua udde sumallunga si Tou, ne i yamiu wotongngete mapul᷊e, ne i yamiu nal᷊iute wuassu manaranu su saruannu Mawu wuṛṛu su saruannu manga uṛṛangngu, wuṛṛu Mawu sarun mangonggolu leta'a su samba'an da'i indi maola'a pussaanu.

²³ Arawe paanaunge, amungkangngu i yamiu tawe nanipussapa'airenu, i yamiu na'ola'a rosa su saruannu Mawu wuṛṛu sarun iṛṛuumanna ana waugu rosanu udde.

²⁴ Roote pandarisikku manga soa wuṛṛu manga tanda'u dombanu, wuṛṛu imbaṛṛangnga maabul᷊i manipussa paaire apan buatte pina'iren kamiu udde!”

²⁵ Ana see manga taumatan i Gad wuṛṛu manga taumatan i Ruben nabbisara, “Tuangnga, yami sarun tumuṛṛutta sarangkanambone apan irolokki Tuangnga.

²⁶ Ana'a awingngi yami wuṛṛu winatangnga sapi see lai domban kami sarun matana'a isindi, su manga soan Gilead.

²⁷ Arawe yami indi nariahite inai mapapangalo su al᷊ungngu piaṛṛa'u Mawu. Yami sarun lumewessa Sal᷊ukku Yordan wuṛṛu mapapangalo ere buatte niapasingkati Tuangnga.”

²⁸ Ne i Musa nangonggolu parenta indi si Imam Eleazar, si Yosua wuṛṛu manga piaṛṛa'u Israel,

²⁹ “Amungkangngu manga taumatan i Gad wuṛṛu manga taumatan i Ruben maddaringikka parentan Mawu wuṛṛu lumewessa su Sal᷊ukku Yordan inai mapapangalo, wuṛṛu amungkangngu wuassu sasumbalan mangitou i yamiu maapangaṛṛo wanua udde, ne leta'u Gilead ṛinone ionggoli yamiu si mangitou maola'a pussa'a mangitou.

³⁰ Arawe amungkangngu i mangitou maddiri lumewessa su Sal᷊ukku Yordan inai mapapangalo suadio'a ringanni yamiu, ne i mangitou ṛinone manengkamma tahia leta'a pussa'a su wanua Kanaan ere lai yamiu.”

³¹ Sasimbakku manga taumatan i Gad wuṛṛu manga taumatan i Ruben, “Tuangnga, yami sarun tumuṛṛutta parentan Mawu.

³² Su al᷊ungngu piaṛṛa'u Mawu yami sarun lumewessa watukku wanua Kanaan inai mapapangalo, arawe antimanna leta'a su samba'an da'in Sal᷊ukku Yordan indi sidutu maola'a pussa'an kami.”

³³ Wua'udde i Musa nanantilla su manga ṛuanganni Gad wuṛṛu i Ruben wuṛṛu su sambageanganna ṛuanganni Manasye ahewallu leta'u i Sihon, ratun i Amori, wuṛṛu wageangngi Og, ratun Basan, nasutta manga soa wuṛṛu leta'a maranine.

³⁴ Ruanganni Gad napararisikku apia soan Dibon, Atarot, Aroër,

³⁵ Atarot-Sofan, Yaezer, Yogbeha,

³⁶ Bet-Nimra, wuṛṛu Bet-Haran eteudde manga soa pia darandungnge wuṛṛu maola'a manga tatanda'u domba.

³⁷ Ruanganni Ruben napararisikku apia manga soa Hesybon, Eleale, Kiryataim,

³⁸ Nebo, Baal-Meon, wuṛṛu Sebam. Manga soa apan niapararisiki mangitou apia udde nihantianni mangitou aranne.

³⁹ Amonanni Makhir, ana'i Manasye, pamangalo'e leta'u Gilead, ana see i tou nangaṛṛo wuṛṛu nallimbuakka manga taumatan Amori apan utana'a isudde.

⁴⁰ Ana waugu udde i Musa nangonggolu leta'u Gilead udde su amonanni Makhir, wuṛṛu i mangitou namanuate isudde.

⁴¹ I Yair, wuassu ṛuanganni Manasye, namangalo wuṛṛu nangaṛṛo manga pira ampungnga ana see nisaggo mangitou “Manga ampungngi Yair”.

⁴² I Nobah namangalo wuṛṛu nangaṛṛo Kenat suadio'a ringannu manga ampungnga maranine, ana see nisaggo Nobah, tumuṛṛuttu aranne sassane.