REENGANNA 31 - WUKE SUSI WATTI'U AL᷊AL᷊USASSA

Pangalo wawal᷊issa su taumatan Midian

¹ Mawu nabbisara si Musa,

² “Pabbal᷊isse pangalon taumatan Midian ana waugu sarangkanambone apan buatte niola'i mangitou su saruannu walahannu Israel. Wua'udde i'o sarun mate.”

³ Ne i Musa nabbisara su walahannu Israel, “Pandiahite inai mapapangalo; i yamiu ṛinone mamangalo taumatan Midian tadea'u mapaamattu ṛuumannu Mawu si mangitou.

⁴ Wuassu suapan ṛuangannu Israel, i yamiu ṛinone manaddia saṛṛiwu su atoune tantara inai mapapangalo.”

⁵ Ne nipilete saṛṛiwu su atoune wuassu suapan ṛuanganna, nareengnga sarangkanambone mapul᷊o dua su ṛiwune tantara apan nasaddiate mapapangalo.

⁶ I Musa nandolokki mangitou mapapangalo suadio'a ringanni Pinehas ana'i Imam Eleazar. I Pinehas uaapiddu manga saranapa na'ukassa wuṛṛu manga trompeta maola'a manga tatialan parenta.

⁷ Ere su parentan Mawu si Musa, taumatan Israel mamangalo taumatan Midian wuṛṛu namate anambon taumata esakka

⁸ nasutta siri lima ratun Midian, eteudde i Ewi, i Rekem, i Zur, i Hur wuṛṛu i Reba. I Bileam ana'i Beor nate lai nipate.

⁹ Manga taumatan Israel nanametta manga wawine wuṛṛu al᷊aṛṛana'u Midian, wuṛṛu nangaṛṛo al᷊awo'u winatangnga apapadul᷊iananne, wuṛṛu al᷊awo'u pa'a'alan mangitou.

¹⁰ Manga soa wuṛṛu manga paddasananni mangitou nisoṛṛobba.

¹¹ Wua'udde manga taumatan Israel nanganu anambon apan niaṛṛo udde, nasutta manga taumata nisametta wuṛṛu winatangnga papadul᷊iananne,

¹² ana see niapidda si Musa wuṛṛu si Imam Eleazar wuṛṛu su anambon taumatan Israel. Su tempo udde i mangitou tantal᷊anna maddasanna su ratakku Moab, su wiwikku Sal᷊ukku Yordan, maranin soan Yerikho.

Tantaran Israel nabelengnga

¹³ Ne i Musa, i Imam Eleazar wuṛṛu anambon piaṛṛa'u taumatan Israel wal᷊ine sinumabbangke wuassu paddasananna manansomakka tantaran Israel.

¹⁴ I Musa nandona manga piaṛṛangnge, manga tembonannu tantara, wuṛṛu tembonannu mapapangalo apan wakkute nawelengnga wuassu nappapangalo.

¹⁵ Unni tou si mangitou, “Anio i yamiu namalan bawine nambo udde wiakka?

¹⁶ Wal᷊inewe manga wawine udde tinumuṛṛutta tatantiron Bileam, na'oman sara nassalo'u taumatan Israel su Peor ana see nanantangngu Mawu? Wuṛṛu eteudde nandatan asasusa su al᷊aṛṛana'u Mawu!

¹⁷ Ne, orassa indi patete manga al᷊aṛṛana'a esakka wuṛṛu al᷊awo'u wawine apan wal᷊ine maṛṛuala.

¹⁸ Arawe anambon bawine apan ta'e maṛṛuala wotongnge iapidda maola'a awingngi yamiu.

¹⁹ Wuṛṛu i yamiu sarangkanambone apan buatte namate taumata ara'e nangindinga asuangnga ṛinone matana'a su liuddu paddasananna al᷊annune pitu allo. Su allo atallune wuṛṛu allo appitune i yamiu wuṛṛu anambon bawine apan niasametti yamiu ṛinone ma'ola'a lal᷊aghun pangangukassa wadangnga.

²⁰ Suapan samparassa laubba wuṛṛu al᷊awo'u saranapa wuassu pisi, wambul᷊un ambinga ara'e alu, ṛinone lai iapaasusi.”

²¹ Wua'udde i Imam Eleazar nabbisara su manga taumata apan wakkute nabelengnga wuassu pangalo udde, “Indiwe manga atoranna apan nionggolu Mawu si Musa.

^22-23 Al᷊awo'u saranapa apan tawe matutungnga, eteudde wul᷊awanna, sal᷊a'a, witu'a, atta'a, tima mawira wuṛṛu tima ma'itumma, ṛinone iapaasusi ringannu olaanna sulal᷊ummu putungnga. Wua'udde manga saranapa udde ṛinone iapaasusi lai ringanu ua'en lal᷊aghu tadea'u tawe maarantinna lai. Anambon saranapa waine apan botongnge matutungnga iapaasusi lai ringannu ua'en lal᷊aghu pangangukassa.

²⁴ Su allo appitune i yamiu ṛinone mabbansalla laungngu, wakkute udde i yamiu tate maarantinna, wuṛṛu wotongngete sumutta sulal᷊ummu paddasananna.”

Pattatahia saranapa niaṛṛo

²⁵ Mawu nabbisara si Musa,

²⁶ “I'o wuṛṛu i Imam Eleazar, suadio'a ringannu manga piaṛṛangnge waine wuassu taumatan Israel, ṛinone mandeengngu anambon saranapa niaṛṛo, nasutta manga taumata niasametta wuṛṛu winatangnga wawuwunanna.

²⁷ Saranapa niaṛṛo udde ṛinone tahianni yamiu darua apan uasul᷊ungnga anambone; sambageanganna onggol᷊a'a su manga tantara apan buatte napapangalo, wuṛṛu sambageanganna lai onggol᷊a'a su ṛuanganna lambene.

²⁸ Su aonggola apan niṛṛae si Ya'u, Mawu, wuassu wageangngu manga tantara udde ṛinone Ta'u anuanna sambau wuassuapan lima ṛasutta – mawae wuassu manga taumata nisametta, ara'e lai wuassu sapi, keledai, domba wuṛṛu ambinga.

²⁹ Tantil᷊a'e udde si Imam Eleazar maola'a sasamba apan niṛṛae si Ya'u, Mawu.

³⁰ Wuassu wageangnge apan nionggola su ṛuangannu Israel, ṛinone i'o manganu sambau wuassuapan liman pul᷊o mawae wuassu manga taumata nisametta, aroddi lai wuassu sapi, keledai, domba wuṛṛu ambinga. Tantil᷊a'e sarangkanambone udde su taumatan Lewi apan uapadul᷊i Rasang-Ku.”

³¹ I Musa wuṛṛu i Eleazar na'ola'a ere buatte niparentan Mawu.

^32-35 Wal᷊ine wuassuapa apan buatte nianu manga tantara hunan mangitou sassane, saranapa niaṛṛo udde sarangkanambone: 675.000 domba wuṛṛu ambinga, 72.000 sapi, 61.000 keledai wuṛṛu 32.000 wawine maṛṛuala.

^36-40 Sambageanganna wuassu reenganna udde ionggola su tantara ringannu anambone indi: 337.500 domba wuṛṛu ambinga, wuṛṛu wuassu reenganna udde 675 su waune maola'a aonggola niṛṛae su Mawu; 36.000 sapi, 72 su waune aonggola niṛṛa'e su Mawu; 30.500 keledai, 61 maola'a aonggola niṛṛae su Mawu; 16.000 wawine maṛṛuala, 32 su atoune maola'a aonggola niṛṛae su Mawu.

⁴¹ Ana see i Musa nanantillu aonggola niṛṛae udde si Imam Eleazar maola'a sasamba su Mawu, ere buatte nirolokku Mawu.

^42-46 Wageangngu tumanangnge anambone uasul᷊ungngu wageangngu tantara; 337.500 domba wuṛṛu ambinga, 36.000 sapi, 30.500 keledai wuṛṛu 16.000 wawine maṛṛuala.

⁴⁷ Ere buatte nirolokku Mawu, i Musa nanganu sambau wuassu liman pul᷊o su atoune taumata nasametanna wuṛṛu winatangnga papadul᷊iananna, ana see nitantilla su manga taumatan Lewi apan mammanara su Rasannu Mawu.

⁴⁸ Wua'udde manga piaṛṛangnge apan buatte namiaṛṛa'u tantaran Israel sinumaruanna si Musa

⁴⁹ wuṛṛu nabbal᷊o, “Tuangnga, yami buatte nandeengngu manga tantaran kami. Inauranna reenganni mangitou nasuungnga, taweddu sangkatou apan nawul᷊i.

⁵⁰ Ana waugu udde yami nangapidu manga lal᷊ogakka wul᷊awanna, hal᷊angngu ta'iakka, hal᷊angngu ledda, sinsingnga, ngante-ngante wuṛṛu wul᷊ele apan buatte nianu sangkatou-sangkatou. Sarangkanambone indi itantiili yami su Mawu maola'a sasamba kami, tadea'u i Tou sidutu ual᷊u'adda si yami.”

⁵¹ Ana see i Musa wuṛṛu i Imam Eleazar nanengkamma wul᷊awanna udde, sarangkanambone buatte niola'a lal᷊ogakka.

⁵² Aonggolu manga piaṛṛa'u tantara udde awakkanne maranin rua ṛasutta su kilone.

⁵³ Arawe manga tantara udde sangkatou-sangkatou buatte nanganu saranapa niaṛṛo udde tahuananni mangitou sassane.

⁵⁴ Ne i Musa wuṛṛu i Imam Eleazar nangapiddu wul᷊awanna udde watukku Rasannu Mawu tadea'u Mawu mallu'adda walahannu Israel.