REENGANNA 30 - WUKE SUSI WATTI'U AL᷊AL᷊USASSA

Atoranna su ola'u riandi

¹ I Musa namasingkattu manga atoranna indi su manga piaṛṛa'u walahannu Israel.

² Amungkangngu sangkatou esakka maddiandi ara'e ma'ire ringannu riandi ringannu sasalu su Mawu, na'oman sara i tou uanaungnga watanganne aiitannu sambau riandi, i tou ṛinone ma'ola'a apa apan pina'irene udde, wuṛṛu tawe wotongnge mamahia.

^3-4 Amungkangngu sangkatou maṛṛuala apan uatana'a su wal᷊en iamangnge maddiandin Mawu, wuṛṛu uanaungnga watanganna aiitannu sambau riandi, wuṛṛu iamangnge naungnge mal᷊uassa su tempo naaringikka olangnge udde, ne maṛṛuala udde ṛinone manipussa riandi wuṛṛu pa'aire udde.

⁵ Arawe amungkangngu su tempo naaringikka olangnge udde iamangnge tawe mal᷊uassa naungnge, ne maṛṛuala udde aiitannu riandine wuṛṛu pa'airene. Mawu sarun mangampungnga si tou ana waugu i tou nisingaddu iamangnge.

^6-7 Amungkangngu sangkatou wawine apan taambe na'awingnga maddiandi ara'e watanganne aiitannu riandi, tanne udde niṛṛingidda asuene ara'e tumba'u niola'a aroddi, ne i tou aiitannu riandi ara'e pa'aire udde. Amungkangngu su allo addantane i tou naawingnga, i tou sidutu aiitannu riandi wuṛṛu pa'airene udde, sambal᷊iate awingnge mal᷊uassa naungnge su tempo naaringikka olangnge udde.

⁸ Arawe amungkangngu awingnge su tempo naaringikka naningaddi tou, ne i tou tawe aiitannu riandine wuṛṛu pa'airene udde. Mawu sarun mangampungnga si tou.

⁹ Amungkangngu sangkatou wawine wal᷊u apan buatte sinindoanna maddiandi ara'e ma'ire ipangiitta watanganne, i tou aiitannu riandi ara'e pa'aire udde wuṛṛu ṛinone olaanni tou.

¹⁰ Amungkangngu sangkatou wawine apan buatte na'awingnga na'olaa'a riandi ara'e pa'aire apan maaiitta watanganne,

¹¹ i tou ṛinone manipussa al᷊awo'u apan niariandine udde, sambal᷊iate awingnge naungnge mal᷊uassa su tempo i tou naaringikka olangnge udde.

¹² Arawe amungkangngu su tempo naaringikka olangnge udde awingnge naningaddi tou, ne wawine udde tate aiitannu riandi ara'e pa'airene. Mawu sarun mangampungnga si tou, ana waugu i tou nisingaddu awingnga.

¹³ Awingnge pia taṛṛino maapulu ara'e mapaaddon al᷊awo'u riandi ara'e pa'aire apan niola'u awingnge wawine.

¹⁴ Arawe amungkangngu su tempo naaringikka olangnge udde awingnge esakka naungnge mal᷊uassa, wawine udde ṛinone mangamattu riandine ara'e pa'airene. Awingnge esakka maapulun riandi ara'e paaire udde ana waugu naungngi tou mal᷊uassa su tempo i tou naaringikka.

¹⁵ Amungkangngu su allon sal᷊immurine awingnge esakka nangaddon riandi ara'e paairen awingnge, ne awingnge esakka udde ṛinone mamasanna pasasal᷊a ana waugu pananingadda udde.

¹⁶ Eteudde manga atoranna apan nionggolu Mawu si Musa su ola'u riandi wuṛṛu pa'aire apan niola'u sangkatou maṛṛuala apan uatana'a su wal᷊en iamangnge, ara'e niola'u sangkatou wawine apan buatte na'awingnga.