REENGANNA 3 - WUKE SUSI WATTI'U AL᷊AL᷊USASSA

Al᷊aṛṛana'i Harun

¹ Eteindi amonanni Harun wuṛṛu i Musa su tempo Mawu nabbisara si Musa su puiddu Wowon Sinai.

² I Harun pia sire appata ana'a esakka: i Nadab iapa pahul᷊une, wua'udde i Abihu, i Eleazar wuṛṛu i Itamar.

³ I mangitou nitenega mabbal᷊i imam ringannu lal᷊aghu nallal᷊innu lana su wowon puane.

⁴ Arawe i Nadab wuṛṛu i Abihu nate su wadda'u Sinai, su tempo itarua nisumaruanna Mawu ringannu putungnga apan ipappalli. Itarua tawe naasomba ana'a. Nariaddi tantal᷊anna i Harun ta'e wiakka, i Eleazar wuṛṛu i Itamar mammanara naola'a sangkatou imam.

Manga taumatan Lewi nita'e mangimbe manga imam

⁵ Mawu nabbisara si Musa,

⁶ “Doloṛṛa'e ṛuangannu Lewi rumanta sumaruanna, wuṛṛu pilete i mangitou mabbal᷊i mangangimben i Harun.

⁷ I mangitou mammanara su Rasang-Ku wuṛṛu ṛinone mangimbe manga imam see lai anambon walahanna ringannu manara mangitou su Rasang-Ku udde.

⁸ Manara i mangitou eteudde mallu'adda anambon saranapan Dasang-Ku wuṛṛu mammanara su Rasang-Ku udde maola'a hahanti manga taumatan Israel.

⁹ Wuassu walahannu Israel, tumba'u ṛuanganni Lewi apan Ta'u niapamanara sidutu maola'a mangangimben i Harun wuṛṛu papapulunne.

¹⁰ Arawe i Harun wuṛṛu al᷊aṛṛanangnge ṛinone iapamanaranu maola'a imam; wal᷊ine wuassi mangitou, isai-sai apan ma'anamma mappaamattu manara udde ṛinone iṛṛuumanna pateanna.”

¹¹ Mawu nabbisara si Musa,

^12-13 “Orassa indi manga taumatan Lewi nipile-U mabbal᷊i pussaa'-U. Su tempo i Ya'u namate anambon ana'a pahul᷊un balahannu Mesir, Ta'u niṛṛae anambon ana'a esakku Israel wuṛṛu anambon ana'u winatangnga apan paarorone niasungkangnga. Sarangkanambone udde pussaa-U. Maola'a hahantin manga ana'a pahul᷊un Israel, i Ya'u manganu taumatan Lewi huna-U; i mangitou sarun mabbali pussaa-U. Ete i Ya'u Mawu.”

Pandareengngu taumatan Lewi

¹⁴ Su wadda'u Sinai Mawu nandolokki Musa

¹⁵ niapaola'a daftar'u manga taumatan Lewi tumuṛṛuttu ṛuanganna wuṛṛu amonanne sambau-sambau; suapan ana'a esakka apan uukke sambul᷊anna ire'e ṛinone iwoṛṛetta aranne.

¹⁶ Ana see i Musa tinumuṛṛutte parentan Mawu udde.

^17-20 I Lewi pia sire tallu ana'a esakka; i Gerson, i Kehat wuṛṛu i Merari. I mangitou uddewe al᷊amonan manga ṛuanganna apan isassago tumuṛṛuttu aranni mangitou. I Gerson naasomba darua ana'a esakka; i Libni wuṛṛu i Simei. I Kehat naasomba sire appata ana'a sakka; i Amram, i Yizhar, i Hebron wuṛṛu i Uziel. I Merari naasomba darua ana'a esakka; i Mahli wuṛṛu i Musi. I mangitou udde al᷊amona wuassu manga amonanna apan isassago tumuṛṛuttu aranni mangitou.

²¹ Amonanni Gerson pinaammul᷊annu amonanni Libni wuṛṛu amonanni Simei.

²² Reengannu esakka su ṛuanganni Gerson apan uukke sambul᷊anna ire'e apan nawoṛṛetta eteudde 7.500 su atoune.

^23-24 I Elyasaf ana'i Lael uatembonanna ṛuanganna udde. Sulal᷊ummu paddasanannu taumatan Israel, ṛuanganna udde namile tampa su samba'an baṛṛatta su liuddu Rasannu Mawu.

²⁵ Sulal᷊ummu mallu'adda Rasannu Mawu, i mangitou niapal᷊u'adda Rasanna wuṛṛu tataamme, mal᷊aṛṛenessa su ngara sasuttanne,

²⁶ senggotu rallakka apan uapal᷊iwutta Rasanna wuṛṛu mezbah, wuṛṛu lal᷊indumma ngaran pasallanganna udde. I mangitou lai niapamanara su al᷊awo'u manara apan pia aukku manga saranapa udde.

²⁷ Ṛuanganni Kehat pinaammul᷊annu manga amonanni Amram, i Yizhar, i Hebron wuṛṛu i Uziel.

²⁸ Esakka apan uukke sambul᷊anna ire'e wuassu ṛuanganna udde sarangkanambone 8.600 su atoune. I mangitou niapamanara mallu'adda manga saranapa su Rasannu Mawu.

^29-30 I Elisafan ana'i Uziel uatembonanna ṛuanganna udde. Sulal᷊ummu paddasananna, ṛuanganna udde namile tampa su samba'an timukku Rasannu Mawu.

³¹ I mangitou niapamanara mallu'adda Wantallu Pa'aire, medda, leddan sol᷊o, manga mezbah, manga saranapa apan ipappaatu manga imam su Wabbo'a Susi, wuṛṛu pampele apan uasara Wabbo'a Na'ukkassa. I mangitou niapamanara al᷊awo'u manara apan pia aukke ringannu manga saranapa udde.

³² Tembonannu ṛuanganni Lewi eteudde i Eleazar, ana'i Harun. I Tou uariaga manga taumata apan mammanara su Wabbo'a Na'ukkassa.

³³ Ṛuanganni Merari nipa'ammul᷊annu amonanni Mahli wuṛṛu amonanni Musi.

³⁴ Manga esakka apan uukke sambul᷊anna ire'e wuassu ṛuanganna udde sarangkanambone 6.200 su atoune.

³⁵ I Zuriel ana'i Abihail uatembonanna ṛuanganna udde. Sulal᷊ummu paddasananna, ṛuanganna udde namile tampa su samba'an sawannakka wuassu Rasanna Mawu.

³⁶ I mangitou niapamanara uariaga manga aola'u Rasanna udde, manga sal᷊aba'u, diṛṛine, rapappakke, wuṛṛu anambon saranapa se'e al᷊awo'u manara apan pia aukke ringannu manga saranapa udde.

³⁷ See lai su wowon manga diṛṛi, manga apampakke, manga pasa'a wuṛṛu manga tal᷊i ipaatta su rallaku liudde.

³⁸ Sulal᷊ummu paddasananna, i Musa wuṛṛu i Harun see al᷊aṛṛanangnge ṛinone mamile tampa su saruannu Rasannu Mawu, su samba'an da'i. I mangitou niapamanara mallaghun patataṛṛamawun balahannu Israel su Wabbo'a Na'ukkassa. Wal᷊ine wuassi mangitou, isai-sai apan ma'annamma ma'ola'a manara udde ṛinone iṛṛuumanna pateanna.

³⁹ Anambon esakka sulal᷊ummu ṛuanganni Lewi apan uukke sambul᷊anna ire'e apan niwoṛṛetti Musa tumuṛṛuttu ṛuangannu sambau-sambau wuassu parentan Mawu, sarangkanambone 22.000 su atoune.

Taumatan Lewi nabbal᷊i pinallanna'a manga ana'a esakka pahul᷊un Israel

^40-41 Mawu nabbisara si Musa, “Anambon ana'a esakka pahul᷊un Israel uddewe pussaa-U. Woṛṛeta'e manga aranni mangitou apan uukke sambul᷊anna ire'e. Arawe maola'a lal᷊anna'i mangitou, i Ya'u mamasingkatta manungku anambon taumatan Lewi maola'a pussaa-U. Ete i Ya'u Mawu! Wuṛṛu winatangngu taumatan Lewi lai Ta'u iapasingkatta maola'a lal᷊anna'u anambon binatangnga apan paarorone niasungkangnga su wallatu winatangngu walahannu Israel.”

⁴² I Musa tinumuṛṛutta sarangkanambone apan nirolokku Mawu; i tou namoṛṛettu manga arannu ana'a esakka pahul᷊une

⁴³ apan uukke sambul᷊anna ire'e. I mangitou sarangkanambone 22.273 su atoune.

⁴⁴ Ana see Mawu nabbisara si Musa,

⁴⁵ “Ṛaea'e manga taumatan Lewi Huna-U maola'a lal᷊anna'u anambon ana'a esakka pahul᷊un Israel; see lai winatangngu taumatan Lewi maola'a lal᷊anna'u winatangngu taumatan Israel.

⁴⁶ Ana waugu manga ana'a pahul᷊un Israel 273 su atoune mannamboanna wuassu reengannu taumatan Lewi, ne lebbene udde ṛinone tubbusanni yamiu.

⁴⁷ Suapan ana'a, ṛinone tubbusanni yamiu ringannu lima bau roitta sal᷊a'a tumuṛṛuttu arega apan ipappaatta su Rasang-Ku;

⁴⁸ onggol᷊a'e roitta udde i Harun wuṛṛu al᷊aṛṛanangnge.”

⁴⁹ I Musa tinumuṛṛutta parentan Mawu udde.

⁵⁰ I tou nanganu 1.365 roitta sal᷊a'a,

⁵¹ wuṛṛu roitta udde tinantilla si Harun wuṛṛu al᷊aṛṛanangnge.