REENGANNA 28 - WUKE SUSI WATTI'U AL᷊AL᷊USASSA

Manga sasamba apan uata'a

¹ Mawu nandolokki Musa

² niapasingkatta su walahannu Israel manungku i mangitou ṛinone manutukka ringannu maadunna tadea'u suapan tempo apan tinantunna, ionggola manga sasamba erenai anna apan ma'al᷊uassa naungngu Mawu.

³ Indiwe sasamba apan ionggola su Mawu; Su sasamba mamiallo, darua ana'u domba esakka uukke santonna wuṛṛu tawe sangkule,

⁴ sambau maola'a sasamban marua' allo wuṛṛu sambau lai maola'a sasamban bawallo.

⁵ Suadio'a ringannu ana'u domba udde ṛinone ionggola sangkilo taponna lal᷊o'annu sanlitere lanan zaitun apan apianne.

⁶ Eteudde sasamba itattambunna uata'a apan paarorone nionggola su Wowon Sinai. Hal᷊urune ma'al᷊uassa naungngu Mawu.

⁷ Suadio'a ringannu ana'u domba udde ṛinone ionggola lai sanlitere ua'en anggore apan iwokka su wowon mezbah.

⁸ Ana'u domba sasamba wawallo ṛinone ionggola ringannu olangnge apan uasul᷊ungnga ere sasamban marua'allo, lal᷊apirannu ua'en anggore. Hal᷊urun sasamba itattambunna udde ma'al᷊uassa naungngu Mawu.

Sasamba su allon Sabat

⁹ Su allon Sabat ṛinone ionggola darua ana'u domba esakka uukke santonna wuṛṛu tawe sangkule, darua sukilone taponna lal᷊o'annu lanan zaitun maola'a sasamba ia'imbe wuṛṛu sasamba ua'en anggore.

¹⁰ Sasamba itattambunna udde ṛinone ionggola suapan allon Sabat maola'a tatamban sasamba miallo-miallo suadio'a ringannu ua'en anggore.

Sasamba su allo paarorone suapan bul᷊anna

¹¹ Su panattaṛṛannu suapan bul᷊anna ṛinone ionggola su Mawu sasamba itattambunna darua sapi esakka wakku, darua domba esakka, pitu ana domba esakka uukke santonna, sambau-sambau tawe sangkulle.

¹² Maola'a sasamba ia'imbe ṛinone ionggola taponna apan nilo'annu lanan zaitun; tatallu su kilone taponna hunan suapan sambau sapi esakka; darua su kilone taponna hunan domba esakka,

¹³ wuṛṛu sangkilo taponna huna sambau ana'u domba esakka. Sasamba itattambunna udde maola'a sasamba a'annananna, wuṛṛu hal᷊urune ma'al᷊uassa naungngu Mawu.

¹⁴ Suadio'a ringannu sasamba itattambunna udde ṛinone ionggola lai sasamba ua'en anggore, anambone darua su literene hunan sambau sapi esakka, wuṛṛu sanlitere hunan sambau ana'u domba esakka, wuṛṛu sanlitere hunan sambau ana'u domba. Eteudde atoranna su ola'u sasamba itattambunna apan ṛinone ionggola su allo paarorone suapan bul᷊anna su al᷊o'engngu tonna.

¹⁵ Maola'a tatambane su sasamba itattambunna udde mamiallo ringannu sasamba ua'en anggore, ṛinone i yamiu mangonggolu lai sambau ambinga esakka maola'a sasamba ipangampungnga rosa.

Sasamba su Ramean Doti tawe Ragine

¹⁶ Su allo appul᷊one appata wul᷊anna paarorone, eteudde allon Paskah Mawu.

¹⁷ Allo manansunna, eteudde allo appul᷊one lima, manattakke Ramean Doti tawe Ragine, wuṛṛu su al᷊annune pitu allo i yamiu tawe wotongnge umanna roti apan niola'a nappaattu ragi.

¹⁸ Su allo paarorone su ramea udde i yamiu ṛinone ma'ola'a ammulu patataṛṛamawu, wuṛṛu imbaṛṛangnga mammanara mawakkata.

¹⁹ Onggol᷊a'e su Mawu sasamba itattambunna erenai darua sapi esakka wakku, sambau domba esakka, wuṛṛu pitu ana'u domba esakka uukke santonna, sambau-sambau tawe sangkulle.

²⁰ Onggol᷊a'a lai sasamba ia'imbe apan itattita, ereinai taponna lal᷊o'annu lanan zaitun; tatallu su kilone taponna hunan suapan sambau sapi esakka, wuṛṛu darua su kilone hunan domba esakka,

²¹ wuṛṛu sangkilo hunan sambau ana'u domba esakka.

²² Onggol᷊a'a lai sambau ambinga esakka maola'a sasamba ipangampungnga rosa. Ringannu olangnge aroddi yamiu na'ola'a lal᷊aghu pamamappassa rosan taumata.

²³ Anambon sasamba udde maola'a tatamban sasamba su wiasane marua'allo.

²⁴ Ringannu olangnge udde lai yamiu ṛinone mangonggola su Mawu sasamba itattambunna al᷊annune pitu allo. Sasamba udde maola'a tatambane su sasamba itattambunna mamiallo ringannu sasamba ua'en anggore. Hal᷊urun sasamba udde ma'al᷊uassa naungngu Mawu.

²⁵ Su allo appitune i yamiu ṛinone ma'ola'a ammulu patataṛṛamawu wuṛṛu tawe wotongnge mammanara mawakkata.

Aonggola su Andeangngu Pangangitinga

²⁶ Su allo paarorone su Andeangngu Pangangitinga, allo wahewa nal᷊iudde pitun kamisa, su tempo i yamiu mangonggolu gandumma wakku su Mawu, i yamiu ṛinone ma'ola'a ammula mattaṛṛamawu, wuṛṛu tawe wotongnge mammanara mawakkata.

²⁷ Onggol᷊a'e su Mawu sasamba itattambunna eteudde darua sapi esakka, sambau domba esakka wakku wuṛṛu pitu ana'u domba esakka uukke santonna, sambau-sambau tawe sangkule. Hal᷊urun sasamba udde ma'al᷊uassa naungngu Mawu.

²⁸ Onggol᷊a'e sasamba ia'imbe apan buatte nitantunna, eteudde taponna nilo'annu lanan zaitun: tatallu su kilone su sambau sapi esakka, darua su kilone su domba esakka,

²⁹ wuṛṛu sangkilo su sambau ana'u domba.

³⁰ Onggol᷊a'e lai sambau ambinga esakka maola'a sasamba ipangampunga rosa. Ringannu olangnge aroddi yamiu na'ola'a lal᷊aghu pamamapassa rosan walahanna.

³¹ Manga sasamba udde suadio'a ringannu sasamba anggore maola'a tatambane su sasamba itattambunna mamiallo wuṛṛu su sasamba ia'imbe.