REENGANNA 25 - WUKE SUSI WATTI'U AL᷊AL᷊USASSA

Balahannu Israel su Wowon Peor

¹ Tantal᷊anna walahannu Israel uatna'a su Wawal᷊annu Sitim, manga esakki mangitou mannattake sussandaga ringannu manga wawinen Moab apan uatana'a isudde.

² Manga wawine udde mangngahe si mangitou watukku andeangngu sasamba ipangaddata monganni mangitou. Taumatan Israel inumanna lai sasamba udde wuṛṛu massubba mongannu taumatan Moab.

³ Ana waugu taumatan Israel massubba si Baal su Peor, Mawu nasa'u si mangitou wuṛṛu nabbisara si Musa,

⁴ “Samette anambon taumata apan uapiaṛṛa'u walahanna udde wuṛṛu patete i mangitou su saruannu awadaalla maola'a sambau tatuṛṛutta su parenta-U, tadea'u i Ya'u tate lai masa'u su walahanna udde.”

⁵ Wua'udde i Musa nabbisara su manga mallaṛṛuungngu Israel, “I yamiu sangkatou-sangkatou ṛinone mamate anambon taumata sulal᷊ummu walahannu apan buatte nassubba si Baal su Peor.”

⁶ Su tempo i Musa wuṛṛu anambon taumata tantal᷊anna lulluai su ngaran Dasannu Mawu, i mangitou naasilo sangkatou Israel uaapiddu sangkatou wawinen Midian sinumutta sulal᷊ummu rasanne.

⁷ Su tempo i Pinehas, ana'i Eleazar, pulunni Imam Harun naasilo olangnge udde, i tou dirumarisikka wuṛṛu nanantangngu ammul᷊anna udde. I tou nanganu tambakka sambua,

⁸ ana see i tou nangenggenna esakka wuṛṛu wawine udde sulal᷊ummu rasanna. Taumata ruan katou udde nipanta'u tambakka udde ne natta'alle asasusa apan lullele su Israel udde.

⁹ Arawe tantal᷊anna udde ingana'a nate 24.000 su atoune.

¹⁰ Ana see Mawu nabbisara si Musa,

¹¹ “I Pinehas ana'i Eleazar, pulunni Imam Harun, ringannu waṛṛani mannahek-Ku arangku su pattangngannu taumatan Israel, na'oman sara asasau'u-U nompo'a wuṛṛu i Ya'u tate lai mamate walahanna udde.

¹² Nariaddi wal᷊oa'a si Pinehas manungku i Ya'u ma'ola'a sambau pa'aire ringanni tou.

¹³ I tou wuṛṛu papapulunne Ta'u olanna imam ma'oman sara mal᷊annu-l᷊annu, ana waugu i tou ringannu aroddi aṛṛimadde mannahek-Ku Ruatane, wuṛṛu buatte na'ola'a paddarame su rosan taumatan Israel.”

¹⁴ Taumatan Israel apan nipate ṛindo'u wawinen Midian udde aranne i Zimri, ana'i Salu, tembonannu sambau ṛuanganna wuassu ṛuanganni Simeon.

¹⁵ Wawine udde aranne i Kozbi; ana'i Zur, sangkatou tembonannu ṛuanganna su Midian.

¹⁶ Mawu nangonggolu parenta indi si Musa,

¹⁷ “Roapete taumatan Midian wuṛṛu patete i mangitou

¹⁸ ana waugu al᷊al᷊eo apan buatte niṛṛiinni mangitou si yamiu su Peor, wuṛṛu ana waugu i Kozbi ana'u sangkatou tembonannu ṛuanganna su Midian. I Kozbi udde wawine apan nate nipate su tempo nariaddi asasusa ana waugu arariadianna su Peor.”