REENGANNA 24 - WUKE SUSI WATTI'U AL᷊AL᷊USASSA

¹ Orassa indi i Bileam masingkatte manungku Ruata mappandumma i tou mangal᷊amatta walahannu Israel. Ana waugu udde i tou tawe inai naddea'a manga tatiala ere niola'i tou paarorone. I Bileam na'ellega watukku wadda'a,

² wuṛṛu naasilo walahannu Israel tantal᷊anna maddasanna pia tahiane tumuṛṛuttu manga ṛuangannu walahanna. Ana see Ghaṛṛahon Duata nangintaṛṛo si Bileam,

³ wuṛṛu i tou nabbisaran papatta indi, “Eteindi tanatan i Bileam, ana'i Beor, wisaran sangkatou masingkatta mani'atta

⁴ apan buatte naddaringikka manga wisaran Mawu Duata wuṛṛu naasilo sondappa wuassu Apan Lembontaṛṛino, apiddu naṛṛa'a, arawe ringannu mata uaalla.

⁵ Aroddi aṛṛamage manga rasannu ei Yakub, wuṛṛu manga tampa wawanuannu ei Israel!

⁶ Naal᷊ihidda wawal᷊anne apan mal᷊alangnga uawannada, ara'e waillu bunga su wiwikku sal᷊ukka; naal᷊ihidda punnu alu gaharu apan nisuannu Mawu, ara'e manga punnu alu aras su wiwikku sal᷊ukka.

⁷ I mangitou naasomba ua'en kuranna apan manambo-nambo, wualanna apan naasomba ua'ene manambo. Ratune sarun mawantuga, nangillembo wuassi Agag, wuṛṛu araratuanne sarun wantuhanna.

⁸ Ruata apan nangapiddi mangitou sinumabbangnga wuassu Mesir, naal᷊ihidda banteng mal᷊aṛṛaga, i Tou namangalo hunan mangitou. Manga walahanna seetta sarun masue allupan-Ne, manga duṛṛin mangitou sarun ṛimunsaan-Ne, wuṛṛu manga anaanni mangitou sarun paddian-Ne.

⁹ Walahanna udde naal᷊ihidda singa esakka wuṛṛu singa wawine, apan uarammangnga wuṛṛu uatattere. Isai waṛṛani mamu'o si tou? Doronganna taumata apan mangal᷊amatta si'o sarun al᷊amatanna, wuṛṛu taumata apan mamontoga si'o sarun wontohanna.”

¹⁰ Ṛingannu nasa'u i Balak naṛṛammiddu angkumma wuṛṛu nabbisara si Bileam, “I'o ta'u niwagoanna iapawontoga manga see'u, arawe i'o nangal᷊amatta si mangitou na'oman sara paatallu.

¹¹ Orassa indi i'o wotongnge inai, apul᷊ete watukku wal᷊enu! I ya'u naddiandin lal᷊antakke si'o, arawe Mawu tawe namalanu manengkamma lal᷊antakke udde.”

¹² Sasimbakki Bileam, “Wal᷊ine i ya'u buatte nabbal᷊o su manga daroloṛṛanni Tuangku manungku

¹³ salaiwe i Tuangku mangonggola si ya'u anambon sal᷊a'a wuṛṛu wul᷊awanna apan uaraddo su wal᷊en araratuanni Tuangku, i ya'u maddiri lumawangnga parentan Mawu wuṛṛu tumuṛṛutta apulun naungku? I ya'u tumba'u wotongnge mabbisaran apa irolokku Mawu iapawisara si ya'u.”

Manga papatta panginsueanne

¹⁴ Unni Bileam si Balak, “Orassa indi ya'u inaite mapul᷊e ringannu walahangku. Arawe tantal᷊anna taambe inai, mapianne i ya'u mamasingkatta si Tuangku su ola'u apa apan sarun olaannu walahannu Israel su saruannu walahanni Tuangku su allo sal᷊immurine.”

¹⁵ Ana see i Bileam nabbisaran papatta indi, “Indiwe tanatan i Bileam, ana'i Beor; wisaran sangkatou manani'atta

¹⁶ apan buatte naaringikka wisaran Duata, apan botongnge maaillal᷊a Apan Atanggaṛṛanne; apan naasilo sondappa wuassu Apan Lembontaṛṛino apiddu naṛṛa'a arawe mata uaalla.

¹⁷ Ellehangku i tou, arawe wal᷊ine orassa indi; saileangku i tou, arawe ro'en marau. Sangkatou ratu wuassu Israel darantane, sarun dumanta naal᷊ihidda anumpitanna masemakka. Manga piaṛṛa'u Moab sarun ṛimunsaanne walahanni Set sarun pateanne.

¹⁸ Leta'u Edom sarun atanaannu seenne, arawe Israel ma'ola'a inolaanne apan matohassa.

¹⁹ Wuassi Yakub sarun dumanta sangkatou tembonanne, apan sarun mamate manga seenne.”

²⁰ Wua'udde sulal᷊ummu sondappa udde i Bileam naasilo manga taumatan Amalek. Ne i tou nabbisaran papatta indi, “Wuassu al᷊awo'u walahanna su runia, Amalek apan lembon uataṛṛino. Arawe walahanna udde su panginsueanne, sarun mawul᷊i lai saran mal᷊annu-l᷊annu.”

²¹ Sulal᷊ummu sondappa udde i Bileam naasilo papapulunni Kain, ana see nabbisara papatta indi, “Tampa atatanaannu atonna matohassa, naal᷊ihidda sal᷊akka su wowon buidda watu.

²² Arawe i yamiu, taumatan Keni, sarun pateanna, tate mal᷊annu lai Asyur mangal᷊appa si yamiu maola'a taumata niatawanna.”

²³ Wua'udde i Bileam nabbisaran papatta indi lai, “Nasilakate isai apan biakka, angngerate Ruata ma'ola'a olangnge udde?

²⁴ Arawe wuassu Siprus sarun dumanta sambau ammul᷊annu apalla i mangitou sarun mangaṛṛo Asyur wuṛṛu Heber, wua'udde ammul᷊annu apalla udde lai sarun masue.”

²⁵ Ana see i Bileam nandiahite inai mapul᷊e watukku tampa atatanaanne, wuṛṛu i Balak napul᷊ete lai.