REENGANNA 22 - WUKE SUSI WATTI'U AL᷊AL᷊USASSA

Ratun Moab namago si Bileam

¹ Walahannu Israel inaite apia wuṛṛu naddasanna su ratakku Moab, su samba'an Sal᷊ukku Yordan maranin Soan Yerikho.

^2-3 Su tempo ratun Moab aranne i Balak, ana'i Zipor, naaringikka ereapa walahannu Israel buatte namangalo taumatan Amori, wuṛṛu manungku walahannu Israel tumaniten manambo, i tou wuṛṛu anambon tumanangnge matta'utte.

⁴ Ana see taumatan Moab nabbisara su manga piaṛṛa'u taumatan Midian, “Tate mal᷊annu lai manga taumata udde manginsue al᷊awo'u saranapa maranin kite naal᷊ihidda ere putungnga mangepoddu nannal᷊o su wadda'a.” Ne i Ratu Balak

⁵ nandolokku daroloṛṛanna niapawago si Bileam, ana'i Beor, apan uatana'a su soan Petor maranin Sal᷊ukku Efrat su leta'u Amau. I mangitou nirolokka niapawal᷊o si Bileam tanata indi wuassi Balak, “Asingkatewe, pia sambau walahanna nirumanta wuassu Mesir; manga taumatane nirumanta nassal᷊iawukke su al᷊awo'u tampa wuṛṛu nasaddiate mamangalo wanuan kami.

⁶ I mangitou mattohasanna wuassi yami. Nariaddi, rantate! Wontohete i mangitou huna'u. Asinungka yami wotongnge mamaddon mangitou wuṛṛu mallimbuakka si mangitou wuassu wanua indi. Ana waugu i ya'u mangimanna taumata apan nial᷊amatannu sarun maasomba al᷊amatta, wuṛṛu taumata apan niwontohannu sarun maasomba wontoga.”

⁷ Ne inaite manga piaṛṛa'u taumatan Moab wuṛṛu Midian udde ringannu uaapiddu lal᷊antakke si Bileam tadea'u i tou ma'apulu mamontoga taumatan Israel. Napawe na'omate ringanni Bileam, i mangitou nabbal᷊o si tou tanatan Datu Balak.

⁸ Unni Bileam si mangitou, “Panaṛṛabbite isindi. Tiṛṛabbi sarun ta'u iwal᷊o si yamiu apa apan iawal᷊on Mawu si ya'u.” Ne manga piaṛṛa'u Moab natana'e su wal᷊en Bileam.

⁹ Ana see Ruata nirumanta ringanni Bileam wuṛṛu naiwal᷊o, “Isai manga taumata udde apan uatana'a su wal᷊enu, Bileam?”

¹⁰ I Bileam sinumimbakka, “I mangitou daroloṛṛanni Ratu Balak wuassu Moab iapapasingkatta

¹¹ manungku sambau walahanna apan nirumanta wuassu Mesir nassal᷊iawukke su al᷊awo'u tampa. I ya'u nirolokki Ratu Balak iapawontoga walahanna udde, tadea'u i tou wotongnge mamangalo wuṛṛu mallimbuakka si mangitou.”

¹² Mawu nabbisara si Bileam, “Imbaṛṛangnga i'o inai ringannu manga taumata udde, wuṛṛu imbaṛṛangnga mamontoga walahanna udde, ana waugu i mangitou buatte Ta'u nial᷊amatanna.”

¹³ Su allo tiṛṛabbine i Bileam nabbisara su manga daroloṛṛanni Balak, “Apul᷊ete, Mawu tawe mamala'u inai ringanni yamiu.”

¹⁴ Ne i mangitou nabelengke ringanni Balak wuṛṛu namasingkatte si tou manungku i Bileam maddiri rumanta suadio'a ringanni mangitou.

¹⁵ Ana see i Balak nandolokku mannamboanna lai daroloṛṛanna apan mattanggaṛṛanne pangkanne wuassu ingana'a paaororne.

¹⁶ I mangitou namasingkatta si Bileam tanata indi wuassi Balak, “I ya'u sumal᷊ande ringanu nangillembo; rantate wuṛṛu arie panol᷊a'a.

¹⁷ I ya'u sarun mangonggolu lal᷊antakke apan manambo atonna, wuṛṛu tumuṛṛutta al᷊awo'u wisaranu. Rantate, wuṛṛu wontohete walahanna udde huna'u.”

¹⁸ Arawe i Bileam sinumimbakka, “Salaiwe anambon sal᷊a'a ara'e wul᷊awanna apan uaraddo sulal᷊ummu wal᷊en araratuanni Ratu Balak ipamaekka si ya'u, i ya'u tawe maal᷊awangnga parentan Mawu, Ruata apan sassubbangku. Salaiwe tumba'u su hatto addio'a i ya'u tawe mapaanal᷊are.

¹⁹ Arawe mappianne i yamiu panaṛṛabbi isindi, ere lai buatte niola'u manga daroloṛṛanna paarorone. I ya'u maapulu maasingkatta tanne ta'e piaddu iwal᷊on Mawu si ya'u.”

²⁰ Rabbi udde Ruata nirumanta ringanni Bileam wuṛṛu nabbisara, “Manga taumata udde nirumanta madorongnga si'o inai ringanni mangitou. Nariaddi pasasadiate inai. Arawe pa'ola'e tumba'u apan irolokka si'o.”

²¹ Su allo tiṛṛabbine i Bileam nandiahite aiananna su keledaine, ana see tinumantalongke manga piaṛṛa'u Moab udde.

I Bileam wuṛṛu keledaine

²² Arawe sutempo i Bileam inaite, Ruata nasa'u. Tantal᷊anna i Bileam uasa'e keledaine, tatantalongannu ruan katou mangangimbene, mala'ekattu Mawu uarisikka su tangngan dal᷊anna mangngampangnga si tou.

²³ Naasilo mala'ekatta uarisikka isudde ringannu hal᷊ele sasawutanna, keledai udde nanewekka wuassu lal᷊anna, wuṛṛu nabbeṛṛo watukku wailla. I Bileam nanassaka keledai wuṛṛu niehetta apia nabelengnga watukku lal᷊anna.

²⁴ Wua'udde malaekattu Mawu dirumarisikka su wageangngu lal᷊anna maṛṛiputta, su wallattu waillu anggore darua ringannu tanda'a watu uasasamba'a.

²⁵ Napawe keledai udde naasilo mala'ekattu Mawu, i tou namiwikka na'oman sara leddan Bileam naṛṛepessa su tanda'a. I Bileam nanassakka apia keledai udde.

²⁶ Ana see mala'ekattu Mawu nangingkatta, wuṛṛu dirumarisikka su tampa apan aṛṛiputanne na'oman sara tate dal᷊anna amatanna su aiṛṛi wuṛṛu aikkatanna.

²⁷ Naasilo mala'ekattu Mawu, keledai udde nirumaramangnga. I Bileam nandona wuṛṛu nanassaku ta'inna su keledai udde.

²⁸ Ana see Mawu na'ola'a keledai udde wotongnge mabbisara. Unnu winatangnga udde si Bileam, “Apa ta'u niola'a si Tuangnga na'oman sara i Tuangnga namuulla si ya'u na'oman sara paatallu?”

²⁹ Sasimbakki Bileam, “I'o mannalangnga si ya'u! Unnu wisara i ya'u pia ghal᷊ele, i'o buatte ta'u nipate!”

³⁰ Sasimbakku keledai udde, “Wal᷊inewe i ya'u indi keledain Tuangnga apan ro'en paaororone sasa'eanni Tuangnga? Angerate i ya'u nilumawangnga si Tuangnga?” “Tawe,” sasimbakki Bileam.

³¹ Ana see Mawu na'ola'a si Bileam wotongnge maasilo mala'ekattu Mawu uarisikka isudde ringannu hal᷊ele sasawutanna. I Bileam apiddu niumal᷊intudda su leta'a wuṛṛu nassubba.

³² Mala'ekattu Mawu naiwal᷊o, “Anio i'o namuulla keledainu na'oman sara paatallu? I Ya'u nirumanta mangampangnga si'o, ana waugu tumuṛṛuttu addapa'u, dal᷊eo amungkangngu i'o inai.

³³ Su tempo keledainu naasilo si Ya'u, i tou namiwikka na'oman sara paatallu. Amungkangngu tawe, i'o buatte ta'u nipate, arawe keledai udde iapasal᷊amatta.”

³⁴ Sasimbakki Bileam, “I ya'u narosate. I ya'u wagga manungku i Tuangnga uarisikka su tangngan dal᷊anna mangngampangnga si ya'u. Arawe orassa indi, amungkangngu tumuṛṛuttu addapatti Tuangnga dal᷊eo i ya'u manassukku amatanna indi, ya'u mapul᷊ete.”

³⁵ Arawe mala'ekattu Mawu nabbisara, “Tantalongke ringannu manga taumata udde. Arawe i'o tumba'u wotongnge mabbisara wiasara apan ta'u irolokka.” Ne i Bileam nanassukku amatanne ringannu manga daroloṛṛanni Balak udde.

I Balak nanal᷊oho si Bileam

³⁶ Napawe i Balak naaringikka manungku i Bileam sarun dumanta, i tou inaite nanal᷊oho si Bileam su soa Moab, apan addone su wiwikku Sal᷊ukku Arnon, su passarannu leta'u Moab.

³⁷ Unni Balak si tou, “Anio i'o tawe nirumanta su tempo ta'u niwagoanna paarorone? Apa i'o massunna manungku i ya'u tawe maawaekka lal᷊antakke si'o?”

³⁸ I Bileam sinumimbakka, “Ne, orassa indi ya'u nirumantate. Arawe i ya'u tawe taṛṛino mabbisaran al᷊awo'u wisara tumba'u amungkangngu Mawu mandolo'u iapawisara.”

³⁹ Ne i Bileam wuṛṛu i Balak inaite watukku soa Huzot.

⁴⁰ Isudde i Balak nangonggolu sasamba manga pira sapi wuṛṛu domba. Sambageanganna wuassu ṛemessa nionggoli tou si Bileam wuṛṛu manga piaṛṛangnge apan suadio'a ringanni tou.

I Bileam nabbisara papattane paarorone

⁴¹ Su allo tiṛṛabbine i Balak nangapiddi Bileam sinuma'a wuiddu Bamot Baal. Wua'isudde i Bileam wotongnge maasilo sambageanganna wuassu taumatan Israel.