REENGANNA 20 - WUKE SUSI WATTI'U AL᷊AL᷊USASSA

Manga arariadianna su Kades

¹ Su wul᷊anna paarorone anambon ruagannu Israel na'omate su wadda'u Zin wuṛṛu namanuate su Kades. I Miryam nate wuṛṛu nilabbingnga isudde.

² Su sambau tempo su paddasananni mangitou tawe ua'e. Ne manga taumata udde nirumantate uaṛṛulunna si Musa wuṛṛu si Harun

³ apiddu sussamboṛṛe, “Mappianne addonganne yami mate su saruannu Mawu suadio'a ringannu manga tuṛṛangngi yami!

⁴ Anio i yamiu mangapiddi yami watukku wadda'a indi? Apa tadea'u yami mate su sambau ringannu winatangngi yami?

⁵ Apa pandumanne i yamiu mangapiddi yami sinumabbangnga wuassu Mesir watukku tampa susa indi apan tawe asuanannu manga apa? Isindi tawe gandumma, tawe alu ara, anggore, wuṛṛu delima. Sara ua'e pa'inumanna lai tawe!”

⁶ I Musa wuṛṛu i Harun nangindaute manga taumata udde ana see dirumarisikka maranin ngaran Dasannu Mawu. Itarua niumal᷊intudda, ana see semakku darantan Mawu nanemakka si mangitou.

⁷ Mawu nabbisara si Musa,

⁸ “Anute ta'inna apan uaraddo su saruannu Wantallu Pa'aire, ana see iradduan Harun ṛinone mangammulu anambon ṛuaganna. Su saruanni mangitou sarangkanambone, i'o pabbisara su wuiddu watu isudde tadea'u mapassabbangngu ua'e. Etearoddi i'o mapasasabbangngu ua'e wuassu wuiddu watu udde tadea'u tumanangnge wuṛṛu winatangngi mangitou wotongnge ma'inumma.”

⁹ Ne i Musa inaite nanganu ta'inna udde ere buatte nirolokku Mawu.

¹⁰ I Musa wuṛṛu i Harun nangammulu anambon walahanna su saruannu wuiddu watu udde. Ana see i Musa nabbisara, “Paddaringikka, ei ṛuangannu taṛṛa wawul᷊o! Apa yami ṛinone mapassabbangngu ua'e wuassu wuiddu watu indi si yamiu?”

¹¹ Ana see i Musa namatten ta'inna udde wuṛṛu nipuulli tou su wuiddu watu udde paarua. Ne nangelekke ua'e ringannu masassaga, na'oman sara taumata wuṛṛu winatangnga wotongngete ma'inumma.

¹² Arawe Mawu nabbisara si Musa wuṛṛu si Harun, wisara-Ne, “Ana waugu pangangimanni raddua si Ya'u tumaniten matul᷊ungnga, i Ya'u mapal᷊iatta'u taṛṛino-U apan susi su saruannu walahannu Israel, iraddua tawe maapiaṛṛa'i mangitou sumutta su wanua apan pina'ire-U si mangitou.”

¹³ Eteudde al᷊immatan ua'e su Meriba. Su tampa udde manga taumatan Israel sussamboṛṛe su Mawu, wuṛṛu isudde lai Mawu napal᷊iatta'u taṛṛino-Ne apan susi su walahanna udde.

Ratun Edom tawe namalan balahannu Israel sumabbi

¹⁴ Wua'udde wuassu Kades, i Musa nandolokku manga daroloṛṛanna niapasaruanna ratun Edom. Unni mangitou, “Yami wuassu manga ṛuangannu Israel apan ta'e pia pa'aaukku tuṛṛangnga ringanni Tuangku. I Tuangnga asinungka masingkatu asasusa apan naṛṛia'a si yami.

¹⁵ Iupungngu al᷊amonan kami inaite watukku Mesir wuṛṛu namanua poiaroddi pira tonna al᷊annune. Iupungngi yami wuṛṛu yami niola'a lal᷊eo ṛatangannu walahannu Mesir,

¹⁶ wuṛṛu yami sinumal᷊ande su Mawu maiontolla. I Tou naddaringikka sasal᷊anden kami wuṛṛu nandolokku sangkatou mala'ekatta. Mala'ekatta udde namiaṛṛa'i yami sinumabbangnga wuassu leta'u Mesir. Orassa indi yami uatana'a su Kades, sambau soa su passarannu wageangngu leta'i Tuangku.

¹⁷ Yami sumal᷊ande doronganna i Tuangku wotongnge mamalan kami sumabbi su wanua indi. Yami wuṛṛu winatangngi yami tawe manewadda wuassu lal᷊anna wuṛṛu tawe sumutta watukku wawail᷊anna ara'e manga waillu anggore. Yami tawe ma'inumma ua'e wuassu manga paṛṛihin Tuangku. Yami sarun umamatta su lal᷊anna mal᷊oangnga ma'oman sara yami masabbangnga wuassu wageangngu leta'i Tuangku.”

¹⁸ Arawe taumatan Edom sinumimbakka, “I yamiu tawe iwalan kami sumabbi leta'i yami. Amungkangngu i yamiu manten umamatta, yami sarun mamangalo si yamiu!”

¹⁹ Taumatan Israel nabbisara, “Yami sarun umamatta su lal᷊anna wahewalla, wuṛṛu amungkangngu yami ara'e winatangngi yami ma'inumma ua'enu yami sarun mamaekka. Yami tumba'u mappandumma sumabbi.”

²⁰ Taumatan Edom nabbisara apia, “Tawe wotongnge!” Ana see i mangitou sinumabbangnga ringannu tantara apan matohassa inai mamangalo walahannu Israel.

²¹ Ne manga taumatan Israel nabelengke wuṛṛu naddea'e lal᷊anna wal᷊ine ana waaugu tawe niwalan taumatan Edom sumabbi leta'i mangitou.

I Harun nate

²² Anambon ṛuagannu Israel nanantangngu Kades ana see na'omate su Wowon Hor,

²³ su passarannu Edom. Isudde Mawu nabbisara si Musa wuṛṛu si Harun,

²⁴ “I Harun tawe maasutta su wanua apan buatte Ta'u pina'ire su walahannu Israel; i tou sarun mate ana waugu iraddua buatte nilumawangnga parenta-U maranin al᷊imatan kua'e su Meriba.

²⁵ Apira'e i Harun wuṛṛu i Eleazar, anangnge, saate watukku Wowon Hor.

²⁶ Luatte laubbi Harun wuṛṛu luṛṛea'e si Eleazar. I Harun sarun mate su tampa udde.”

²⁷ I Musa tinumuṛṛutta anambon parenta Mawu. I Musa, i Harun wuṛṛu i Eleazar sinumaate Wowon Hor aellehannu anambon ṛuanganna.

²⁸ Ana see i Musa nalluatta laubbi Harun wuṛṛu niluṛṛe si Eleazar. Su puiddu wowone udde i Harun nate, wua'udde i Musa wuṛṛu i Eleazar sinumossokke apia.

²⁹ Anambon ṛuanganna naaringikka manungku i Harun natete, ne i mangitou sarangkanambone nilunal᷊on tou tallum pul᷊o su allone al᷊annune.