REENGANNA 18 - WUKE SUSI WATTI'U AL᷊AL᷊USASSA

Manara manga imam wuṛṛu taumatan Lewi

¹ Mawu nabbisara si Harun, “I'o, manga anangngu wuṛṛu taumatan Lewi ṛinone mamasanna pangillul᷊eannu manga pasasal᷊a apan nariaddi su Rasang-Ku, arawe tumba'u i'o manga anangngu apan ṛinone mamasanna pangillul᷊eannu pasasal᷊a sulal᷊ummu manara manga imam.

² Manga tuṛṛangngu, ṛuanganni Lewi, ṛinone iwal᷊inu maola'a masasumbala sulal᷊ummu manaranu wuṛṛu manara manga anangngu.

³ Ruanganni Lewi ṛinone ma'ola'a manara mangitou su saruanni yamiu wuṛṛu ma'ola'a manara mangitou su Rasang-Ku, arawe i mangitou tawe mangundanin mezbah ara'e mamita saranapa apan susi su Wabbo'a Na'ukkassa. Amungkangngu i mangitou lumawangnga atoranna udde, mawae ete i mangitou ara'e i yamiu sarun mate.

⁴ I mangitou ṛinone mammanara suadio'a ringanni yamiu wuṛṛu ma'ola'a manga manara apan pia gunane lai su al᷊awo'u pangangimbe sulal᷊ummu Rasang-Ku, arawe isai apan tawe nionggol᷊annu manara udde, imbaṛṛangnga mammanara suadio'a ringanni yamiu.

⁵ Tumba'u i'o, Harun, wuṛṛu al᷊aṛṛanangngu apan ṛinone mammanara su Wabbo'a Na'ukkassa wuṛṛu su mezbah, tadea'u i Ya'u tate lai masa'u su walahannu Israel.

⁶ Mangke atonna, i Ya'u buatte namile tuṛṛangngu manga taumatan Lewi wuassu wallatu walahannu Israel maola'a aonggola si'o. I mangitou buatte niṛṛae huna-U, mangimbe su Rasang-Ku.

⁷ Arawe tumba'u i'o wuṛṛu manga anangngu apan botongnge mapaamattu manara maola'a imam, su al᷊awo'u manara apan pia aukke ringannu mezbah wuṛṛu saranapa su Wabbo'a Lembon Na'ukkassa. Eteudde manaranu, ana waugu i Ya'u buatte nangonggola si yamiu aiananna maola'a sangkatou imam. Suapan taumata apan tawe uatahuanna manara udde, sarun pateanna amungkangngu mangundani manga saranapa udde.”

Pussa'a wageangngu manga imam

⁸ Mawu nabbisara si Harun, “Paanaunge! Anambon sasamba iṛṛae apan ionggola si Ya'u apan tawe itambunna udde wageangngu. Eteudde wageangngu apan buatte nitantunna saran mal᷊annu-l᷊annu. Udde Ta'u nionggola si'o wuṛṛu su papapulunnu.

⁹ Wuassu manga aonggola apan lembon na'ukkassa apan tawe itambunna su wowon mezbah, apan manansunna indi eteudde wageangngu: Sasamba ia'imbe, sasamba ipangampungnga rosa wuṛṛu sasamba lal᷊anna'a arugianna. Sarangkanambone udde sasamba na'ukkassa apan maola'a wageangngu wuṛṛu al᷊aṛṛanangngu.

¹⁰ Uddewe na'ukkassa si'o, nariaddi ṛinone i yamiu umanna su tampa na'ukkassa lai. Tumba'u esakka wotongnge umanna anna udde.

¹¹ Al᷊awo'u aonggola niṛṛae waine apan nionggolu taumatan Israel si Ya'u, udde wageangngu lai. I Ya'u mangonggola si'o wuṛṛu su al᷊aṛṛanangngu esakka wuṛṛu wawine. Atoranna indi ipaatta saran mal᷊annu-l᷊annu. Suapan lal᷊oṛṛon amonanna apan tawe sal᷊ane wotongnge umanna.

¹² Ta'u ionggola si'o sarangkanambone apan apianne wuassu pangitinganna paarorone apan ionggolu taumatan Israel si Ya'u suapan tonna, eteudde lanan zaitun, ua'e anggore wuṛṛu gandumma.

¹³ Sarangkanambone udde maola'a wageangngu. Suapan lal᷊oṛṛon amonannu apan tawe sal᷊ane wotongnge umanna anna udde.

¹⁴ Al᷊awo'u saranapa su leta'u Israel apan buatte niṛṛae si Ya'u, eteudde maola'a wageangngu.

¹⁵ Sarangkanambone apan paarorone niasungkangnga suwallatu taumata ara'e winatangnga apan nionggolu taumatan Israel si Ya'u, udde maola'a wageangngu. Arawe i yamiu ṛinone manubbussa manga anangngu pahul᷊u, wuṛṛu ana'u winatangnga ipappalli apan paarorone niasungkangnga.

¹⁶ Manga ana'a ṛinone tubbusanna su tempo uukki mangitou sambul᷊anna. Arega apan nitantunna su olangnge udde, eteudde lima roitta sal᷊a'a, tumuṛṛuttu arega apan ipappaatta su Rasang-Ku.

¹⁷ Arawe sapi, domba wuṛṛu ambinga apan paarorone niasungkangnga, tawe wotongnge tubbusanna. Winatangnga udde tumba'u si Ya'u wuṛṛu ṛinone ionggola sasamba. Daṛṛane i wokka'a su mezbah wuṛṛu tambuna'a tawane maola'a sasamba. Hal᷊urune ma'al᷊uassa naung-Ku.

¹⁸ Ṛemessu winatangnga udde maola'a wageangngu, ere lai roone wuṛṛu palangnge aikkatanna wuassu sasamba apan iattogokka si Ya'u.

¹⁹ Ma'oman sarangkal᷊o'engnge, anambon sasamba apianne apan niappiddu manga taumatan Israel si Ya'u, Ta'u ionggola si'o wuṛṛu su manga anangngu esakka wuṛṛu wawine. Atoranna udde ipappaatta saran mal᷊annu-l᷊annu wuṛṛu maola'a aiittu pa'aire apan tawe iawal᷊u suwallatti i Ya'u wuṛṛu i yamiu wuṛṛu papapulunnu.”

²⁰ Mawu nabbisara lai si Harun, “I yamiu tawe maasomba pussa'a sarangkadio'a. Su wanua apan nipa'ire-U udde tawe santampa leta'a apan maola'a tatahuanannu. I Ya'u, Mawu, uddewe wageangngu pussa'anu.”

Wageangngu pussa'an taumatan Lewi

²¹ Unnu Mawu si Harun, “Al᷊aawo'u sasamba sambau wuassu mapul᷊o apan nionggolu taumatan Israel Ta'u ionggola su manga taumatan Lewi. Eteudde wageangngu pussa'an mangitou wawaekku manara mangitou su Rasang-Ku.

²² Manga taumatan Israel wal᷊ine, imbaṛṛangnga mangundanin Dasanna udde tadea i mangitou tawe mandantani dosa wuṛṛu ṛuumanna pateanna su watanganni mangitou.

²³ Manatakka orassa indi tumba'u taumatan Lewi apan botongnge mallu'adda Rasang-Ku wuṛṛu sidutu uariaga su manara udde. Atoranna udde ipappaatta lai su papapulunnu saran mal᷊annu-l᷊annu. Taumatan Lewi tawe pussa'a su Israel,

²⁴ ana waugu wageangngu pussa'an mangitou, i Ya'u buatte nangonggolu al᷊awo'u sasamba samban wuassu mapul᷊o saranapa apan nionggolu taumatan Israel si Ya'u maola'a aonggola niṛṛae. Ana waugu udde su ola'u taumatan Lewi i Ya'u mabbisara manungku i mangitou tate maasomba wageangnga pussa'a su Israel.”

Sasamban taumatan Lewi saranapan taumatan Lewi

²⁵ Mawu nandolokki Musa

²⁶ niapapasingkattu parenta indi su taumatan Lewi; Amungkangngu i yamiu manengkamma wuassu taumatan Israel aonggola sambau wuassu mapul᷊o wuassu aonggola apan tinantillu Mawu si'o maola'a wageangngu, i yamiu ṛinone mangonggola sambau wuassu mapul᷊o saranapa udde su Mawu maola'a sasambanu.

²⁷ Sasamba niṛṛae udde uasul᷊ungngu sasamba gandumma wakku wuṛṛu ua'e anggore wakku.

²⁸ Ringannu aroddi yamiu lai ṛinone mangonggolu sasamba iṛṛae su Mawu sambau wuassu sasamba mapul᷊o wuassu saranapa apan nionggolu taumatan Israel. Sasamba niṛṛae udde ṛinone itantilli yamiu si Imam Harun.

²⁹ Onggol᷊a'e wageangnge apan apianne wuassu apa apan nisengkammi yamiu.

³⁰ Napawe buatte nanantillu wageangnge udde, i yamiu botongnge manganu lambene, ere lai sangkatou mabbawailla manganu apa apan nallambe napawe i tou buatte nangapiddu sasambane.

³¹ Lambene udde wotongnge annananni yamiu su al᷊awo'u tampa suadio'a ringannu lal᷊oṛṛon amonannu, maola'a lal᷊antakku manaranu su Rasannu Mawu.

³² I yamiu tawe iapaasal᷊a amungkangngu umanna, sambal᷊iate wageangnge apianne buatte nionggoli yamiu su Mawu. Imbaṛṛangnga mandal᷊eo sasamba na'ukkassu taumatan Israel ringannu umanna apa wuassu sasamba udde tantal᷊anna wageangnge apianne taambe niṛṛae su Mawu. Amungkangngu i yamiu lumawangnga parenta udde, i yamiu sarun mate.