REENGANNA 17 - WUKE SUSI WATTI'U AL᷊AL᷊USASSA

Ta'inni Harun

¹ Mawu nabbisara si Musa,

² “Doloṛṛa'e taumatan Israel mangonggola si'o, ta'inna mapul᷊o dua su waune, suapan ṛuanganna ta'inna sambua, apan ṛinone itantillu piaṛṛa'u ṛuanganna. Woṛṛeta'a arannu piaṛṛa'a udde su ta'inne,

³ wuṛṛu aranni Harun su ta'innu ṛuangannu Lewi. Suapan sangkatou piaṛṛa'u ṛuanganna, ṛinone pia ta'inna sambua.

⁴ Apira'e manga ta'inna udde su Rasang-Ku wuṛṛu addoa'e su saruannu Wantallu Pa'aire, inanaramanne i Ya'u maisasomban kamiu.

⁵ Ta'innu taumata apan i Ya'u nipile sarun massolla. Ringannu olangnge udde i Ya'u sarun mapata'allu manga sasamboṛṛen taumata apan sidutu sussamboṛṛe si yamiu.”

⁶ Olangnge udde nipasingkatti Musa su taumatan Israel. Anasee manga piaṛṛa'i mangitou nanantillu ta'inna sambua si tou suapan ṛuanganna sambau. Sarangkanambone mapul᷊o dua su waune, wuṛṛu ta'inni Harun udde lai suadio'a.

⁷ Ana see i Musa nangaddon manga ta'inna udde sulal᷊ummu Rasannu Mawu, su saruannu Wantallu Pa'aire.

⁸ Tiṛṛabbine, su tempo i Musa sinumutta sulal᷊ummu Rasannu Mawu, i tou naasilo manungku ta'inni Harun eteudde ta'innu ṛuangannu Lewi, nassollate. Ta'inna udde nabbunga, pia bantine, wuṛṛu nabbua wuan sal᷊ise apan nahurangke!

⁹ i Musa nanganu anambon ta'inna udde ana see nipasilote su taumatan Israel. I mangitou na'ellega sarangkanambone apan buatte nariaddi, ana see suapan piaṛṛangnge nanganu ta'inne apia.

¹⁰ Wua'udde Mawu nabbisara si Musa, “Addoa'e apia ta'inni Harun su saruannu Wantallu Pa'aire. Ta'inna udde ṛinone sahipunanna maola'a pananaunganna su taumatan Israel, apan apulune lullawangnga udde manungku i mangitou sarun mate amungkangngu i mangitou sidutu sussamboṛṛe.”

¹¹ I Musa tiumuṛṛutta sarangkanambone apan nirolokku Mawu.

¹² Ana see taumatan Israel nabbisara si Musa, “Amungkangngu aroddi, nasilakate yami! Yami sarun mate!

¹³ Amungkangngu taumata apan mangundanin Dasannu Mawu ṛinone mate, ne yami lai tate antimma!”