REENGANNA 15 - WUKE SUSI WATTI'U AL᷊AL᷊USASSA

Atoranna su ola'u sasamba

¹ Mawu nangonggola si Musa

² manga atoranna indi apan ṛinone olaannu walahannu Israel su wanua apan sarun ionggolu Mawu si mangitou.

³ Su sasamba itattambunna ara'e sasamba wawaekka riandi ara'e sasamba apulune sassane ara'e sasamba su manga ramea mamiallo, i yamiu wotongnge mangonggola su Mawu: sapi esakka, domba esakka, domba ara'e ambinga. Hal᷊uru manga sasamba udde ma'al᷊uassa naungngu Mawu.

^4-5 Isai-sai mangonggolu domba ara'e ambinga maola'a sasamba iattambunna su Mawu, ṛinone lai mangapida su sampunna sambau waussu manga winatangnga udde, sangkilo taponna lal᷊o'annu sanlitere lanan zaitun maola'a sasamba ia'imbe, wuṛṛu lai sanlitere ua'en anggore.

⁶ Amungkangngu niola'a sasamba udde sambau domba esakka, ṛinone lai ionggola dua kilo taponna lal᷊o'annu sanlitere mal᷊oara lanan zaitun maola'a sasamba ia'imbe,

⁷ wuṛṛu sanlitere mal᷊oara ua'en anggore. Hal᷊urun sasamba udde ma'al᷊uassa naungngu Mawu.

⁸ Amungkangngu nionggola udde sambau sapi esakka olaanna sasamba itattambunna ara'e sasamba wawaekka riandi ara'e sasamban paddarame,

⁹ ṛinone ionggola lai tatalu su kilone taponna lal᷊o'annu ruan litere lanan zaitun olaanna sasamba ia'imbe, wuṛṛu ruan litere ua'e anggore.

¹⁰ Hal᷊urun sasamba udde ma'al᷊uassa naungngu Mawu.

¹¹ Eteudde apan ṛinone ionggola suadio'a ringannu suapan sambau sapi esakka, domba esakka, domba ara'e ambinga.

¹² Amungkangngu apan nionggola udde nilumebbe wuassu sambau winatangnga, ne sasamba taponna, lana wuṛṛu ua'e anggore timuanna tumuṛṛuttu wuṛṛanne.

¹³ Olangnge udde ṛinone manarannu suapan taumatan Israel su tempo i tou mangonggolu sasamba. Hal᷊urun sasamba udde maal᷊uassa naungngu Mawu.

¹⁴ Sangkatou raho apan uatana'a su wallati yamiu, mawae tumba'u manaṛṛabbi ara'e lai matana'a, ṛinone tumuṛṛutta atoranna udde napawe i tou mangonggolu sasamba anna apan hal᷊urune ma'al᷊uassa naungngu Mawu.

^15-16 Anambon tita wuṛṛu atoranna uddewe uasul᷊ungnga si yamiu wuṛṛu su taumata raho apan uatana'a suwallati yamiu, ana waugu i yamiu wuṛṛu i mangitou uddewe uasul᷊ungnga sulal᷊ummu aellegu Mawu. Wuṛṛu olangnge udde ipappaatta saran mal᷊annu-l᷊annu.

¹⁷ Mawu nangonggola si Musa

¹⁸ manga atoranna indi apan ṛinone olaannu walahannu Israel su wanua apan sarun ionggolu Mawu si mangitou.

¹⁹ Napawe i yamiu manattakke umanna hessin leta'u wanua udde, i yamiu ṛinone maṛṛae sambageanganna ionggola sasamba al᷊aṛṛaene su Mawu.

²⁰ Amungkangngu i yamiu mallol᷊o roti wuassu gandumma apan paarorone itinganna, roti udde ṛinone ionggola maola'a sasamba al᷊aṛṛaene su Mawu. Lal᷊anne mangonggola uasul᷊ungngu lai mangonggolu sasamba gandumma paarorone nihilingngi yamiu.

²¹ Saran mal᷊annu-l᷊annu suapan doti wuassu gandumma apan paarorone itinganna udde ṛinone ronggoli yamiu maola'a sasamba al᷊aṛṛaene su Mawu.

^22-24 Amungkangngu i yamiu ringannu tawe nipattatudda tawe napaamattu sambau suwallatu atoranna apan buatte nionggolu Mawu si Musa, manattakka wuassu allon Mawu mangonggolu atoranna udde wuṛṛu ma'oman sara palal᷊awannu, wuṛṛu pasasal᷊a udde niola'a ana waugu ṛuanganna ta'e waggan atoranna, ne anambon ṛuanganna ṛinone mangonggolu sambau sapi esakka maola'a sasamba itattambunna. Suadio'a ringannu udde lai ṛinone ionggola sasamba ia'imbe wuṛṛu ua'e anggore ere buatte nitantunna. Hal᷊uru sasamba udde ma'al᷊uassa naungngu Mawu. Wal᷊ine wua isudde lai ṛinone ionggola sambau domba esakka maola'a sasamba aampungnga rosa.

²⁵ Ana see imam ṛinone ma'ola'a lal᷊aghun pangangampungnga rosan balahanna. Ne i mangitou sarun ampunganna ana waugu i mangitou buatte nangapiddu sasamba aampungnga rosa see lai sasamba itattambunna su Mawu.

²⁶ Anambon balahannu Israel wuṛṛu taumata raho apan uatana'a suwallati mangitou sarun ampunganna, ana waugu sarangkanambone naaitta sulal᷊ummu pasasal᷊a apan tawe nipattatudda udde.

²⁷ Amungkangngu tumba'u sangkatou na'ola'a rosa ringannu tawe nipattudda, ne i tou ṛinone mangonggolu sambau ambinga wawine uukke santonna maola'a sasamba aampungnga rosa.

²⁸ Imam ṛinone ma'ola'a lal᷊aghun pangampunganna rosa su saruannu Mawu, tadea'u taumata udde ampunganna rosane.

²⁹ Atoranna udde ipappaatta lai suapan isai ma'ola'a rosa ringannu tawe nipattatudda, mawae i tou taumatan Israel ara'e taumata raho apan uatana'a ringanni mangitou.

³⁰ Arawe amungkangngu sangkatou taumatan Israel ara'e sangkatou taumata raho ringannu nipattatudda na'ola'a rosa, i tou nallobbossa Mawu. Taumata udde ṛinone pateanna,

³¹ ana waugu i tou nilumawangnga Mawu wuṛṛu ringannu nipattatudda nilumawangnga parentan Mawu. Taumata udde mate ana waugu sal᷊ane sassane.

Taumata apan nilumawangnga atorannu allon Sabat

³² Su tempo taumatan Israel uatana'a su wadda'a, sangkatou esakka niaratinganna tantal᷊anna mangngammulu alu paputunganna su allon Sabat.

³³ Taumata udde niapidda niapasaruanna si Musa, wuṛṛu anambon balahanna,

³⁴ ana see tinaṛṛanganna ana waugu taambe natualaga i tou tanne urante.

³⁵ Mawu nabbisara si Musa, “Taumata udde ṛinone iṛṛuumanna pateanna. I tou ṛinone iapidda su liuddu paddasananna wuṛṛu poiaroddi anambon ṛuanganna manuntungngu watu si tou ma'oman sara mate.”

³⁶ Ne anambon ṛuanganna mangapidden tou watukku liuddu paddasananna wuṛṛu manuntungngu watu si tou ma'oman sara mate, ere buatte nirolokku Mawu.

Atoranna su ola'u wawungkele

³⁷ Mawu nandolokki Musa

³⁸ niapapasingkatta su walahannu Israel, “Pa'ola'e wawungkele su manga pentakku laungngu wuṛṛu wa'isa'a tal᷊i ma'elomma suapan sambau wawungkele. Udde ṛinone olaanni yamiu ma'oman sara papapulunnu.

³⁹ Manga wawungkele uddewe maola'a pananaunganna: Suapan i yamiu maasilo, i yamiu maanaungnga al᷊awo'u parenta-U wuṛṛu tuttuṛṛuttanna. Wuṛṛu ana waugu udde i Ya'u tawe abbul᷊iananni yamiu su ipamatu'a apulu naungngu wuṛṛu ira-iranu sassane.

⁴⁰ Manga wawungkele udde sarun mapaanaungngi yamiu tadea'u tuttuṛṛutta anambon parenta-U, na'oman sara i yamiu atonna-tonna maola'a pussa'a-U.

⁴¹ Ete i Ya'u Ruatanu; i Ya'u nangapiddi yamiu sinumabbangnga wuassu Mesir tadea'u i Ya'u mabbal᷊i Ruatanu, ete i Ya'u Mawu.”