REENGANNA 14 - WUKE SUSI WATTI'U AL᷊AL᷊USASSA

Walahannu Israel sussamboṛṛe

¹ Su al᷊o'engngu ṛabbi ṛuangannu Israel mangintul᷊i wuṛṛu lulluai.

² I mangitou sussamboṛṛe si Musa wuṛṛu si Harun wuṛṛu nabbisara, “Mappianne i ite nate su Mesir ara'e su wadda'a indi! Mappianne i ite mate!

³ Ipa'ura Mawu nangapiddi ite watukku wanua udde? Tanne i ite mate sulal᷊ummu pangalo wuṛṛu manga awingngi ite see al᷊aṛṛana'i ite iasametti mangitou. Wal᷊inewe mappianne mabelengke su Mesir!”

⁴ Ana see i mangitou uahahattote sangkatou ringannu waine, “Mappianne i ite mamile sangkatou piaṛṛangnge wuṛṛu mabelengke watukku Mesir!”

⁵ Ana see i Musa wuṛṛu i Harun niumal᷊intudda su saruannu awadaalla.

⁶ I Yosua ana'i Nun wuṛṛu i Kaleb ana'i Yefune, ruan katou suwallatu matataṛṛaso'o udde, nanggesa'a laubbi tarua tatiala massusa.

⁷ Itarua nabbisara su awadaalla udde, “Wanua apan niparikisanni yami udde tumaniten mapia tonna.

⁸ Amungkangngu Mawu mamalan kite, i Tou sarun mangapiddi ite poiaroddi wuṛṛu mangonggolu leta'a apan ala wuṛṛu masuwukka udde si ite.

⁹ Imbaṛṛangnga lumawangnga Mawu, wuṛṛu imbaṛṛangnga mata'uttu manga taumata apan uatana'a su wanua udde, ana waugu ringannu mal᷊uassa i ite mamaddon mangitou. Apan ual᷊u'adda si mangitou nanantangken mangitou, wuṛṛu Mawu uarundinganna si ite. Nariaddi, imbaṛṛangnga mata'utta.”

¹⁰ Tumanangnge sarangkanambone mammansaga manuntungngu watu si mangitou ma'oman sara mate. Arawe inaṛṛombanganne manga taumata udde naasilo semakku Mawu lullendappa sinumabangnga wuassu Rasan-Ne.

I Musa niumal᷊omannu ṛuaganna

¹¹ Mawu nabbisara si Musa, “Ta'e pira tempo lai al᷊annune manga taumata indi lullawangnga si Ya'u? Sara tingngera i mangitou maddiri mangimanna si Ya'u, salaiwe i Ya'u buatte na'ola'a aroddi anambone al᷊aṛṛidu'a su wallati mangitou?

¹² I Ya'u sarun mamate si mangitou ringannu mandantan radda'a ma'al᷊iu. Arawe i'o sarun Ta'u olaanna iamangnga wuassu sambau walahanna apan maggewal᷊anna wuṛṛu mattohasanna wuassi mangitou!”

¹³ Ana see i Musa nabbisara Mawu, “Oh, Mawu, aṛṛengenne taumatan Mesir maaringikka olangnge udde! Sumbal᷊i ringannu taṛṛino-Nu I'o buatte nangapiddi yami sinumabbangnga wuassu wanua udde,

¹⁴ wuṛṛu i mangitou sarun mabbatti'a manga taumata su wanua indi, apan buatte na'aringikka manungku I'o, Mawu, uarundinganna si yami. I mangitou na'aringikke lai manungku I'o naipasilon batangannu si yami su tempo I'o u'amatta su saruanni yami sulal᷊ummu pal᷊iaṛṛannu winabbawa su tempo allo, wuṛṛu sulal᷊ummu pal᷊iaṛṛannu putungnga su tempo ṛabbi.

¹⁵ Amungkangngu I'o mamate al᷊aṛṛanang-Ngu sarangkanambone indi, ne manga walahanna apan buatte naaringikka su ola'u atateleng-Ngu udde sarun mabbisara manungku

¹⁶ I'o namate al᷊aṛṛanang-Ngu su wadda'a ana waugu tawe mapangapiddi mangitou watukku wanua apan buatte nipa'ire-Nu.

¹⁷ Ana waugu udde, Mawu, i ya'u sumal᷊ande, papal᷊iattea'e taṛṛino-Nu si yami wuṛṛu paamata'e sarangkanambone apan buatte nipa'ire-Nu. I'o buatte nabbisara,

¹⁸ ‘I Ya'u, Mawu, mal᷊annu masa'u. I Ya'u mapal᷊iatta'u darangngu-U wuṛṛu apapia-U ringannu nilumambalanna. I Ya'u mangampungnga taumata apan marosa wuṛṛu apan nilumawangnga si Ya'u. Salaiwe aroddi, pasasal᷊an hagurangnga Ta'u walusanna su manga anangnge wuṛṛu papapulunne, maddatingngu pallaṛṛawanne atallune wuṛṛu aiappanne.’

¹⁹ Orassa indi, Mawu, ana waugu aroddi ahewalle darangngu-Nu wuṛṛu I'o mangke uanaungnga pa'aire-Nu, i ya'u sumal᷊ande, ampungewe rosa manga taumata indi ere lai I'o buatte nangampungnga si mangitou ro'en nanantangngu leta'u Mesir.”

²⁰ Ana see Mawu sinumimbakka, “Ore, i Ya'u sarun mangampungnga si mangitou ere raddorongannu.

²¹ Arawe i Ya'u ma'ire ringannu watangang-Ku wuṛṛu wangu i Ya'u apan biakka wuṛṛu uataṛṛino su runia indi,

²² manungku wuassu manga taumata indi tawe saran sangkatou apan ta'e wiakka sumutta su wanua apan Ta'u pina'ire su iupungngu al᷊amona mangitou. Ana waugu i mangitou maddiri tumuṛṛutta si Ya'u, wuṛṛu sidutu mammal᷊intongnga si Ya'u. Sumbal᷊i i mangitou naasilote semaaka wuassu Mawu apan lullansiangnga, wuṛṛu manga al᷊aṛṛindu'a apan Ta'u niola'a su Mesir wuṛṛu su wadda'a.

²³ Tawe! I mangitou tawe maasutta su wanua udde. Wuassu wallati mangitou apan lullawangnga si Ya'u, tawe saran sangkatou apan maasal᷊idanna wanua udde.

^24-25 Arawe tawe aroddi su allang-Ku i Kaleb. I tou sidutu matuṛṛutta si Ya'u. Ana waugu udde i Ya'u sarun mangapiddi tou watukku wanua apan buatte nisuttanni tou. Orassa indi taumatan Amalek wuṛṛu taumatan Kanaan uatana'a su ratakke udde. Arawe wageangngu leta'a udde sarun maola'a pussa'a walahanni Kaleb, allang-Ku udde. Tiṛṛabbi yamiu ṛinone mabelengnga wuṛṛu inai su wadda'a watukku Tongokku Akaba.”

Mawu nakkumannu walahannu Israel ana waugu i mangitou sussamboṛṛe

²⁶ Mawu nabbisara si Musa wuṛṛu si Harun,

²⁷ “Sara tingngera manga taumata lal᷊eo udde sussamboṛṛe si Ya'u? Anambon sasal᷊iomanni mangitou i Ya'u na'aringikke.

²⁸ Iraddua ṛinone sumimbakka si mangitou arendi: Mawu nabbisara, ‘I Ya'u massalu sulal᷊ummu arang-Ku apan wiakka manungku i yamiu sarun Ta'u olaanna ere lai buatte niwisaran kamiu su saṛuang-Ku. I Ya'u, Mawu, buatte nabbisara.

²⁹ I yamiu buatte sinumamboṛṛe su saṛuang-Ku. Ana waugu udde i yamiu sarun mate, wuṛṛu manga winal᷊unannu sarun mattal᷊eṛṛongnga su wadda'a indi.

³⁰ Suliuddi Kaleb wuṛṛu i Yosua, tawe saran sangkatou su wallatti yamiu apan uukke ruan pul᷊o ire'e sarun maasutta su wanua apan Ta'u pina'ire si yamiu udde.

³¹ I yamiu buatte nabbisara manungku manga anangngu sarun sametanna. Arawe ete i mangitou apan sarun Ta'u iapidda watukku wanua apan ipaddiri udde, wuṛṛu wanua udde sarun maola'a leta'i mangitou.

³² Arawe i yamiu sarun mate su wadda'a indi.

³³ Appatu pul᷊o su tonnane al᷊annune al᷊aṛṛanangngu sarun lumallele su wadda'a. Ana waugu i yamiu mal᷊awangnga, al᷊aṛṛanangngu udde sarun matataṛṛangnga, ma'oman sara taumata panginsueanne su wallati yamiu lai nate.

³⁴ I yamiu sarun mamasanna manga rosanu, appatu pul᷊o su tonnane al᷊annune; santonna ireengnga allo massallo wuassu appatu pul᷊o su allone apan ipappaatti yamiu ipamarikissa leta'a udde. I yamiu sarun maasingkatta erapa olangnge amungkangngu i Ya'u lumawangnga si yamiu!

³⁵ I Ya'u massalu maungku i Ya'u sarun ma'ola'a olangnge udde si yamiu, manga taumata lal᷊eo apan ua'ire lumawangnga si Ya'u. Su wadda'a indi yamiu sarangkanambone sarun mate. I Ya'u, Mawu, buatte nabbisara.’ ”

^36-37 Manga taumata apan buatte nirolokki Musa niapaparikissa leta'a udde, nabelengnga uaapiddu watti'a wahia su ola'u leta'a udde, wuṛṛu olangnge udde naaola'a taumatan Israel sussamboṛṛe su saruannu Mawu. Ana waugu udde Mawu nakkuumanni mangitou na'oman sara i mangitou nate ana waugu al᷊aṛṛusa'itta.

³⁸ Wuassu siri mapul᷊o dua matataṛṛaso'o udde tumba'u i Yosua wuṛṛu i Kaleb apan ta'e wiakka.

Ṛiinna paarorone ipamangalo wanua udde

³⁹ Napawe i Musa namasingkattu tanatan Mawu su walahannu Israel, walahanna udde nilumal᷊o ringannu massusa.

⁴⁰ Tiṛṛabbine marua'allo atonna, i mangitou nandiahite inai suma'a watukku puiddu wowone. Unni mangitou, “Atonna yami buatte na'ola'a rosa. Arawe orassa indi nariahite inai watukku tampa apan ipantingiddu Mawu.”

⁴¹ Arawe i Musa nabbisara, “Anio i yamiu orassa indi lumawangnga parentan Mawu? I yamiu tawe maasomba!

⁴² Imbaṛṛangnga inai! I yamiu sarun iawaddon manga seennu ana waugu Mawu tawe uarundinganna si yamiu.

⁴³ Su tempo i yamiu masasaruannu taumatan Amalek wuṛṛu taumatan Kanaan udde, i yamiu sarun mate sulal᷊ummu pangalo. Mawu tawe mallu'adda si yamiu ana waugu i yamiu mal᷊awangnga si Tou.”

⁴⁴ Arawe manga taumatan Israel udde ta'e lai ma'apulu suma'a watukku puiddu wowone udde, salaiwe i Musa wuṛṛu Wantallu Pa'aire tawe manantangngu paddasananna udde.

⁴⁵ Ne taumatan Amalek wuṛṛu taumatan Kanaan apan uatana'a poiaroddi namangalo wuṛṛu namaddo manga taumatan Israel apiddu nangenggenna si mangitou naddatingngu Horma.