REENGANNA 12 - WUKE SUSI WATTI'U AL᷊AL᷊USASSA

I Miryam niṛṛuumanna

¹ I Musa buatte nanganu sangkatou wawinen wuassu Kus nabbal᷊i awingnge, wuṛṛu olangnge udde niola'a panaal᷊anne si Miryam wuṛṛu si Harun mapasal᷊a Musa.

² Unni tarua, “Apa tumba'u wuassi Musa Mawu nabbisara? Wal᷊inewe wuassi ite lai i tou mabbisara?” Mawu naddaringikka sarangkanambone apan niwisaran tarua.

³ I Musa eteudde sangkatou apan naungnge masaṛṛionto'a, nilumambalanna wuassu anambon taumata apan mabbiakka su runia indi.

⁴ Inaṛṛombanganne Mawu nabbisara si Musa, si Harun wuṛṛu si Miryam, “I yamiu siri tallu inaite watukku Rasang-Ku.” Ana see i mangitou inaite isudde

⁵ wuṛṛu Mawu niumonto'a sulal᷊ummu pal᷊iaṛṛannu winabbawa. Mawu dirumarisikka su ngaran Dasan-Ne wuṛṛu namago si Harun ruan Miryam. Taumata darua udde inaite,

⁶ wuṛṛu Mawu nabbisara, “Paddaringikke manga wisara-U indi! Amungkangngu suwallati yamiu pia sangkatou nabi, i Ya'u mapal᷊iatta'u watangang-Ku si tou sulal᷊ummu manga aellega, wuṛṛu maggahatton tou sulal᷊ummu wal᷊iawa.

⁷ Arawe tawe aroddi su allang-Ku i Musa. Ete i tou taumata apan atuṛṛutanne su wallatu al᷊aṛṛana-U.

⁸ Wuṛṛu i Ya'u uahahatton tou ringannu uahahati, ringannu matualaga wuṛṛu tawe ringannu ao'o. Ewe'e hati'-U buatte! Anio iraddua waṛṛani lumawangnga si Musa, allang-Ku udde?”

⁹ Mawu nasa'u atonna si tarua, wuṛṛu i Tou nangingkatte.

¹⁰ Su tempo winabbawa udde nanantangken Dasannu Mawu, niasiloanna i Miryam niarunannu radda'a su pisi apan ma'ata'utta; pisine nabbal᷊i mawira naal᷊ihidda wumbukka. Napawe i Harun nanaile si Miryam wuṛṛu naasilo manungku i tou niarunanten radda'a udde,

¹¹ i tou nabbisara si Musa, “Tul᷊unga'a, Tuangku, arie pabbala'a yami uatataṛṛangnga ana waugu rosan kami apan niola'i yami sulal᷊ummu awawoddo kami.

¹² Arie pabbala'a i tou mabbal᷊i ere ana'a apan wakkute niasungkangnga ana see mate, ringannu ṛemessa sambageanganna nawukku'e.”

¹³ Ne i Musa sinumal᷊andete Mawu, “Oh Mawu, i ya'u sumal᷊ande, paapiaawe i tou!”

¹⁴ Mawu sinumimbakka, “ Unnu wisara hatine niadduannu iamangnge, wal᷊inewe sulal᷊ummu pitu allo al᷊anune i tou ṛinone uapasanna asasili? Pasal᷊iua'a i tou wuassu paddasananna pitu allo al᷊annune, wua'udde i tou wotongngete sumutta apia.”

¹⁵ Ana see i Miryam niapasabbangnga wuassu paddasananna al᷊annune pitu allo, wuṛṛu walahanna udde tawe nangingkatta wua'isudde ma'oman sara i Miryam iapawelengnga apia su paddasananna.

¹⁶ Wua'udde i mangitou nanantangken Hazerot wuṛṛu naddasanna su wadda'u Paran.