REENGANNA 11 - WUKE SUSI WATTI'U AL᷊AL᷊USASSA

Tampa aranne Tabera

¹ Su sambau allo walahanna udde manattakke sussal᷊iomanna su Mawu su ola'u asasusa mangitou. Naaringikka manga sasal᷊iomanna udde, Mawu nasa'u wuṛṛu nandantan putungnga si mangitou. Putungnga udde nilumewa su wallati mangitou wuṛṛu nanutungnga sambageanganna wuassu paddasananna.

² Manga taumata mangngintul᷊i ma'iontolla si Musa. Ana see i Musa inumal᷊iomanna su Mawu, ne putungnga udde nappaddumpe.

³ Ana waugu arariadianna udde, tampa udde nisaggo Tabera, ana waugu isudde putungngu Mawu sussal᷊oi su pattangnganni mangitou.

I Musa namile siri pitu pul᷊o piaṛṛange

⁴ Sulal᷊ummu amatannu manga taumatan Israel udde, pia lai manga taumata raho apan tinumantalongnga. I mangitou mal᷊utu uminassa ṛemessa, wuṛṛu taumatan Israel manattakke sussamboṛṛe. Unni mangitou, “Uare, annama'e i ite awuṛṛu pia ṛemessa!

⁵ I ite ma'anaungnga inassa apan a'inasanni ite ringannu tawe bawaekke su Mesir, pia katimu, semangka, rampa maṛṛamu wuṛṛu rampa mawira!

⁶ Orassa indi i ite nallomete ana waugu tawe anna, tumba'u manna apan aellehanni ite.”

⁷ Ola'u manna naal᷊ihidda manga wattumma, lihidde mawira uaririkka.

^8-9 Su ṛabbi manna udde manawo suadio'a ringannu wal᷊angngukka su tampa paddasananna. Marua'allo manga taumata uapal᷊ele madea'a mangammulu manna, ana see ihilingnga ara'e waluanna maola'a taponna, wuṛṛu olaanna mabbal᷊i kukisse mal᷊imbulunna uanipissa. Atemangnge naal᷊ihidda kukisse apan nihorengngu lanan zaitun.

¹⁰ I Musa naaringikka manga taumatan Israel udde sussamboṛṛe, lapiddu pasirarisikka su manga wageangnge su saruannu ngaran dasanni mangitou. Ana see sinumawudde asasa'u Mawu na'oman sara i Musa nasusa.

¹¹ Ne i tou nabbisarate Mawu, “Anio I'o napaasusa'u arendi? Apa I'o tawe mal᷊uassa si ya'u? Anio I'o manantillu manara iapariaga anambon taumata udde si ya'u?

¹² Apa i ya'u nangilloṛṛo ara'e nanungkangngi mangitou udde? Anio I'o nandolo'u naola'a na'al᷊ihidda sangkatou inangnga uawawa ana'a addio'a, na'oman sara i ya'u sidutu mappadul᷊i si mangitou su al᷊o'engngu amatanna watukku leta'a apan nipa'ire-Nu su al᷊amona mangitou?

¹³ Pa'ellege, i mangitou sidutu mapparannu maddorongnga inassa. Wuṛṛu i ya'u maddea'a ṛemessa suapa iapa'inassa su anambon taumata udde?

¹⁴ I ya'u tawe maapasanna manara ahewalle udde; tumaniten mawakkata manara'u!

¹⁵ Amungkangngu Mawu sidutu ma'ola'a si ya'u arendi, akkanaawe i ya'u; mappianne mamate si ya'u ringannu mal᷊ihakka tadea'u i ya'u tate lai mamasanna asasusa indi.”

¹⁶ Ana see Mawu nabbisarate si Musa, “Pangammule wuassu walahannu Israel pitun pul᷊o matatimmade apan nipile maola'a piaṛṛa'u walahannu Israel. Apira'e i mangitou su saṛuangku sulal᷊ummu Rasang-Ku, ana see i mangitou doloṛṛa'a pararisiṛṛa'a isudde su sandiṛṛannu.

¹⁷ I Ya'u sarun sumossokka wuṛṛu maggahattonu su tampa udde, wuṛṛu sambageanganna taṛṛino apan buatte Ta'u nionggola si'o, sarun Ta'u ionggola lai si mangitou. Ne i mangitou wotonggngete massumbala manaranu mamasanna balahanna indi, wuṛṛu udde tawe manarannu sassane.

¹⁸ Orassa indi wal᷊oa'e su balahanna udde; ukkasse watangannu hunan tiṛṛabbi yamiu sarun uminassa ṛemessa. Mawu buatte naddaringikka si yamiu lulluai wuṛṛu ma'ial᷊are manungku i yamiu maapulu uminassa ṛemessa, wuṛṛu manungku wiakku mappianne su tempo i yamiu su Mesir. Orassa indi Mawu mangonggolu ṛemessa si yamiu, wuṛṛu i yamiu wotongnge uminassa.

¹⁹ I yamiu uminassa tawe manungku tumba'u massalo ara'e dua allo, ara'e lima allo ara'e mapul᷊o allo, wuṛṛu tawe tumba'u ruan pul᷊o su allone,

²⁰ arawe sambul᷊anna tuudda al᷊annune i yamiu u'inassa, ma'oman sara i yamiu rumadda'a wuṛṛu mammuta ana waugu inassa udde. Olangnge udde mariaddi ana waugu i yamiu buatte nanol᷊a'u Mawu apan udde su pattangnganni yamiu. Wuṛṛu ana waugu i yamiu buatte nilumuai su saruan-Ne wuṛṛu sunumal᷊iomanna manungku i yamiu buatte nanantangngu leta'u Mesir.”

²¹ Ana see i Musa nabbisara su Mawu, “Walahanna apan iappiaṛṛa'u indi sarangkanambone 600.000 su atoune. Ereapa I'o mabbisara manungku sarun mangonggolu Remessa si mangitou sulal᷊ummu sambul᷊anna al᷊annune?

²² Suapa pia sapi wuṛṛu domba aroddi anambone apan ṛinone pateanna ana see ma'al᷊aidda si mangitou? Apa inassa su tahal᷊oangnga mattiudda iapa'inassa si mangitou?”

²³ Mawu sinumimbakka, “Apa taṛṛino-U pia patta'al᷊anne? I'o sarun mal᷊ihakka maasilo sarangkanambone apan Ta'u niwisara udde atonna mariaddi ara'e tawe!”

²⁴ Ne i Musa sinumbakka wuṛṛu i tou namasingkatta su walahanna udde sarangkanambone apan buatte niwal᷊o Mawu. I Musa nangammulu siri pitun pul᷊o piaṛṛangnge wuṛṛu nandolokki mangitou niapa rarisikka mamal᷊iwutta Rasannu Mawu.

²⁵ Ana see Mawu niumonta'a sulal᷊ummu winabbawa wuṛṛu nabbisara si Musa. Mawu manganu sambageanganna wuassu taṛṛino apan buatte nionggoli Tou si Musa wuṛṛu nionggola su siri pitun pul᷊o piaṛṛa'a udde. Napawe Ghaṛṛaho Mawu udde niumonto'a si mangitou, i mangitou mannattake mabbisara ere sangkatou nabi, arawe tawe mal᷊annu.

²⁶ Ruan katou su wallatu siri pitun pul᷊o piaṛṛangnge udde, i Eldad wuṛṛu i Medad, natana'a su paddasananna wuṛṛu tawe inai suadio'a ringanni ngana'a waine watukku Rasannu Mawu. Su paddasananna udde Ghaṛṛaho Mawu niumonto'a sitarua, ne itarua lai mannatakke lai mabbisara ere sangkatou nabi.

²⁷ Ana see sangkatou umbasanna sinumabbangnga su liudde wuṛṛu namasingkatta si Musa sarangkanambone apan buatte nariaddi si Eldad wuṛṛu Medad.

²⁸ I Yosua ana'i Nun, apan buatte nassumbala si Musa ro'en ta'e dario'a, nabbisara si Musa, “Doloṛṛa'e paillol᷊oa'a i mangitou, Papa!”

²⁹ I Musa sinumimbakka, “Anio i'o maṛṛingi'u? Ewe'e i ya'u mangantimma tadea'u Mawu mangonggolu Ghaṛṛaho-Ne su anambon walahan-Ne, wuṛṛu ma'ola'a si mangitou sarangkanambone mabbal᷊i nabi!”

³⁰ Ana see i Musa nabelengke watukku paddasananna suadio'a ringannu siri pitun pul᷊o piaṛṛa'u Israel udde.

Mawu napaarantan manu'a puyuh

³¹ Inaṛṛombanganne Mawu napaarantan anginna wuassu tahal᷊oangnga; anginna udde uaapiddu manga manu'a puyuh apan tuttalla'a mawawo, sammetere wuassu wowon leta'a. I mangitou pasi talla'a su wowon paddasananna udde araune manga pira kilometere.

³² Su al᷊o'engngu allo udde, su al᷊o'engngu ṛabbi wuṛṛu su al᷊o'engngu allo manansunna, manga taumata lullutu manametta manu'a puyuh. Suapan taumata manametta mattingkatul᷊u saṛṛiwu su kilone. Manga manu'a udde iassal᷊iawukki mangitou uapal᷊iwutta paddasananna tadea'u mal᷊ihakka mamara.

³³ Tantal᷊anna ṛemessa inasanna ta'e manambo, Mawu nasa'ute su walahanna udde wuṛṛu nandantan sambau al᷊aṛṛusa'itta si mangitou.

³⁴ Ne tampa udde nissago aranne “Lal᷊abingannu Awawal᷊iu”, ana waugu isudde nilabingnga manga taumata nate ana waugu awawal᷊iu.

³⁵ Wua'isudde walahanna udde nangingkatte watukku leta'u Hazerot, ana see naddasante su tampa udde.