REENGANNA 10 - WUKE SUSI WATTI'U AL᷊AL᷊USASSA

Manga trompeta wuassu sal᷊a'a

¹ Mawu nabbisara si Musa,

² “Pa'ola'e darua trompeta wuassu sal᷊a'a nisassala tadea'u ipamago tumana'u soa ma'ammula ara'e mandolokki mangitou umamatta.

³ Amungkangngu darua udde tiupanna mal᷊annu, atappasanne anambon taumata ṛinone ma'ammula uapal᷊iwutta su saruannu ngaran Dasang-Ku.

⁴ Arawe amungkangngu tumba'u sambau apan nitiuppa, atappasanna tumba'u manga piaṛṛangnge apan ma'ammula mamal᷊iwutta si'o.

⁵ Amungkangngu trompeta tiupanna maau-autta, udde tialane manga walahanna ṛuanganna apan naddasanna su samba'an da'i ṛinone mangingkatta.

⁶ Amungkangngu tiupanna maau-autta su aruane, ne manga ṛuanganna su samba'a timukka ṛinone mangingkatta. Nariaddi amungkangngu tingikka mangkaautta atapasanna ṛuanganna ṛinone mangingkatta,

⁷ ewe'e amungkangngu tingikka mal᷊o'engnga atappasanne walahanna ṛinone ma'ammula.

⁸ Manga trompeta udde ṛinone tiupannu manga imam, manga ana'i Harun. Eteudde atoranna apan ṛinone tuṛṛutanni yamiu saran mal᷊annu-l᷊annu.

⁹ Wuṛṛu amungkangngu i yamiu mapapangalo su wanuanu su ipannahekku watangannu wuassu seetta apan mammangalo, pattiuppe manga trompeta udde. Ne, i Ya'u Ruatanu, sarun mantul᷊ungnga wuṛṛu manal᷊amatta si yamiu wuassu manga seennu.

¹⁰ See lai su tempo i yamiu lulluassa, eteudde su manga andeangngu Wul᷊anna Wakku wuṛṛu manga ramea waine, trompeta udde ṛinone tiupanna su tempo i yamiu mangonggolu sasamba itattambunna wuṛṛu sasamban paddarame si Ya'u. I Ya'u sarun mantul᷊ungngi yamiu. Ete i Ya'u Ruatanu.”

Taumatan Israel nangingkatta

¹¹ Su tonna aruane napawe walahannu Israel nanantangngu Mesir, su allo aruam pul᷊one wul᷊anna aruane, nirumuitte winabbawa wuassu Rasannu Mawu.

¹² Ana see taumatan Israel ualal᷊ol᷊osse mangingkatta manantangngu wadda'u Sinai, wuṛṛu winabbawa udde nattaala su tempo i mangitou na'omate su wadda'u Paran.

¹³ Eteudde paarorone i mangitou nangingkatta wuassu parentan Mawu si Musa.

¹⁴ Paarorone nangingkatta tantara apan uasirungnga su wanneṛṛan ammul᷊anni Yehuda, wuntuanna ringannu wuntuanna: i Nahason, ana'i Aminadab uapiaṛṛa'u warisannu ṛuanganni Yehuda,

¹⁵ i Netaneel ana'i Zuar uapiaṛṛa'u warisannu ṛuanganni Isakhar,

¹⁶ wuṛṛu i Eliab ana'i Helon uapiaṛṛa'u warisannu ṛuanganni Zebulon.

¹⁷ Ana see Rasannu Mawu nihohakke, wuṛṛu amonanni Gerson wuṛṛu Merari inaite namasanna Rasanna udde.

¹⁸ Wua'udde niumamatte tantara apan uasirungnga su al᷊ungngu waneṛṛan ammul᷊anni Ruben, wuntuanna ringannu wuntuanna: i Elizur ana'i Syedeur piaṛṛa'u warisannu ṛuanganni Ruben.

¹⁹ I Selumiel ana'i Zurisyadai uapiaṛṛa'u warisannu ṛuanganni Simeon,

²⁰ wuṛṛu i Elyasaf ana'i Rehuel uapiaṛṛa'u warisannu ṛuanganni Gad.

²¹ Wua'udde manga taumatan Kehat inaite ringannu uapasanna manga saranapa na'ukkassa. Amungkangngu i mangitou ma'omate su tampa paddasananna manansunna, Rasannu Mawu iapararisikka apia.

²² Wua'udde manansunna tantara apan uasirungnga su al᷊ungngu waneṛṛan ammul᷊annu ṛuanganni Efraim, wuntuanna ringannu wuntuanna: i Elisama ana'i Amihud uapiaṛṛa'u warisannu ṛuanganni Efraim,

²³ i Gamaliel ana'i Pedazur uapiaṛṛa'u warisannu ṛuanganni Manasye,

²⁴ wuṛṛu Abidan ana'i Gideoni uapiaṛṛa'u warisannu ṛuanganni Benyamin.

²⁵ Panginsueanne inaite tantara apan uasirungnga su al᷊ungngu waneṛṛan ammul᷊annu ṛuanganni Dan. I mangitou uddewe mandariaga liuddu anambon ammul᷊anna. I mangitou u'amatta wuntuanna ringannu wuntuanna; i Ahiezer ana'i Amisyadai uapiaṛṛa'u warisannu ṛuanganni Dan.

²⁶ I Pagiel ana'i Okhran uapiaṛṛa'u warisannu ṛuanganni Asyer,

²⁷ wuṛṛu i Ahira ana'i Enan uapiaṛṛa'u warisannu ṛuanganni Naftali.

²⁸ Eteudde atokku warisannu taumatan Israel wuntuanna see lai wuntuanna, suapan i mangitou inai mangingkatta.

²⁹ I Musa nabbisara ipage, i Hobab ana'i Rehuel taumatan Midian, “Yami inaite mangingkatta su tampa apan tumuṛṛuttu wisaran Mawu sarun ionggola si yami. Mawu buatte na'iren apapia su taumatan Israel. Nariaddi tantalongke, yami sarun ma'ola'a mapia si'o.”

³⁰ Sasimbakki Hobab, “Adiangkamanna, arawe i ya'u mappulu mabelengnga su wanua'u.”

³¹ “Ariewe manantangngi yami,” unni Musa, “i'o wotongnge maola'a mamamantingiddu lal᷊anni yami, ana waugu i'o masingkatta suapa i ite wotongnge maddasanna su wadda'a.

³² Napawe i'o tumantalongnga, ne al᷊awo'a apan mapia niola'u Mawu si yami, sarun olanni yami lai si'o.”

Walahannu Israel nangingkate

³³ Napawe walahannu Israel nanantangken Sinai, wowone atatanaannu Mawu, i mangitou niumamatta tallu allo al᷊annune. Wantallu P'aaire Mawu sidutu ia'apidda malliu roro si mangitou ipaddea'a tampa paddasananni mangitou.

³⁴ Napawe i mangitou manantangngu tampa paddasananna, winabbawa Mawu sidutu udde su lantakki mangitou su tempo allo.

³⁵ Suapan Bantallu Pa'aire udde sarun iapidda, i Musa mabbisara, “Darisikke, oh Mawu, sal᷊iawuṛṛa'e seennu, ma'oman sara taumata apan maddantinnu Mawu tumal᷊angngu watanganne.”

³⁶ Wuṛṛu suapan Bantallu Pa'aire udde ma'oma su tampa pangillol᷊oanna, i Musa mabbisara, “Pabbelengke, oh Mawu, su walahannu Israel apan su ṛiwune indi.”