REENGANNA 1 - WUKE SUSI WATTI'U AL᷊AL᷊USASSA

Taumatan Israel na'ola'a pandareengnga paarorone

¹ Su allo paarorone wul᷊anna aruane sulal᷊ummu tonna aruane napawe walahannu Israel buatte nanantangngu Mesir, Mawu nabbisara si Musa sulal᷊ummu Rasannu Mawu su wadda'u Sinai. Wisara-Ne,

² “I'o wuṛṛu i Harun ṛinone mandeengngu anambon walahannu Israel, tumuṛṛuttu ṛuanganna wuṛṛu amonannu sambau-sambau. Pa'ola'e pamoṛṛetannu arannu anambon esakka

³ apan uukke duan pul᷊o su tonnane ire'e apan botongnge maola'a tantara. I mangitou ṛinone iwoṛṛetta tumuṛṛuttu wuntuannu sambau-sambau.

⁴ Wuassu ṛuanganna sambau, paddorongke sambau piaṛṛa'u ṛuanganna iapasumbala si yamiu.”

^5-16 Ete indi arannu manga taumata apan nipele wuassu ṛuanganna iapasumbala si Musa wuṛṛu si Harun wuṛṛu apan maola'a piaṛṛa'u ṛuanganna sambau-sambau eteudde: Ṛuanganna Piaṛangnge I Ruben i Elizur ana'i Syedeur I Simeon i Selumiel ana'i Zurisyadai I Yehuda i Nahason ana'i Aminadab I Isakhar i Netaneel ana'i Zuar I Zebulon i Eliab ana'i Helon I Efraim i Elisama ana'i Amihud I Manasye i Gamaliel ana'i Pedazur I Benyamin i Abidan ana'i Gideoni I Dan i Ahiezer ana'i Amisyadai I Asyer i Pagiel ana'i Okhran I Gad i Elyasaf ana'i Rehuel I Naftali i Ahira ana'i Enan

Ṛuanganna Piaṛangnge

¹⁷ Ringannu sasumbalan siri mapul᷊o dua su atoune udde, i Musa wuṛṛu i Harun

¹⁸ nandolokki anambon walahanna niapaammula su allo paarorone wul᷊anna aruane, ana see pangangawanni mangitou niatokka tumuṛṛuttu manga amonanna sulal᷊ummu ṛuanganni mangitou. Arannu anambon esakka apan uukke duan pul᷊o su tonnane ire'e niwoṛṛetta wuṛṛu nireengnga,

¹⁹ ere buatte nirolokku Mawu. Sarangkanambone udde niola'i Musa su wadda'u Sinai.

^20-46 Taumata esakka uuke duan pul᷊o su tonnane ire'e apan botongnge maola'a tantara, niwoṛṛetta aranne tumuṛṛutu ṛuanganna wuṛṛu amonanne, manattakka wuassi Ruben, ana'i Yakub pahul᷊une maddatingngi Naftali. Anambo mangitou eteudde: Ṛuanganna Anambone I Ruben 46.500 I Simeon 59.300 I Gad 45.650 I Yehuda 74.600 I Isakhar 54.400 I Zebulon 57.400 I Efraim 40.500 I Manasye 32.200 I Benyamin 35.400 I Dan 62.700 I Asyer 41.500 I Naftali 53.400 Sarangkanambone: 603.550

Ṛuanganna Anambone

⁴⁷ Manga taumatan Lewi tawe niwoṛṛetta suadio'a ringannu manga ṛuanganna waine,

⁴⁸ ana waugu Mawu buatte nabbisara si Musa,

⁴⁹ “Su tempo i'o mandeengngu arannu manga taumata apan botongnge maola'a tantara, ṛuanganni Lewi lasa'e pabboṛṛeta'a.

⁵⁰ Doloṛṛa'e i mangitou mamaresi Rasang-Ku ringannu al᷊awo'u saranapane. Manaran mangitou eteudde mamasanna Rasang-Ku ringannu saranapane apiddu mamaresi. I mangitou ṛinone maddasanna uapal᷊iwutta rasanna udde.

⁵¹ Amungkangngu i yamiu mangingkatta, manga taumatan Lewi udde ṛinone manggohakku Rasang-Ku, ana olaanna apia suapan tampa paddasananna wakku. Wal᷊ine wuassi mangitou, isai-sai apan mangundanin Dasanna ṛinone iṛṛuumanna pateanna.

⁵² Manga taumatan Israel waine ṛinone mapararisikku rasanni mangitou su manga kolompokke, suapan taumata sulal᷊ummu kolompokke sambau-sambau uapal᷊iwutta waneṛṛane sassane.

⁵³ Arawe manga taumatan Lewi ṛinone maddasanna mamal᷊iwutta Rasang-Ku. I mangitou ṛinone mallu'adda tadea'u tawe taumata mangundanine, ma'oman sara i Ya'u masa'u wuṛṛu makkuumanna walahannu Israel.”

⁵⁴ Ne taumatan Israel tinumuṛṛutta al᷊awo'a apan nirolokku Mawu si Musa.