PANDARIADDI 6 - WUKE SUSI WATTI'U AL᷊AL᷊USASSA

Al᷊al᷊eon taumata

¹ Napawe taumata aatambanna anambone wuṛṛu nassal᷊iawukke su ahewallu runia, wuṛṛu manga ana'a wawine niasungkangke,

² al᷊aṛṛana'u Ruata ma'ellega manungku mangka maṛṛuala udde mangkaṛṛamaga. Ana see i mangitou na'awingke manga maṛṛuala apan ipaapulu mangitou.

³ Ne Mawu nabbisarate, “I ya'u tawe mamalan taumata mabbiakka saran mal᷊annu-l᷊annu; i mangitou arariadianna apan mattate. Manattakka orassa indi uukki mangitou tawe manampal᷊iu wuassu 120 su tonnane.”

⁴ Su tempo udde, wuṛṛu lai nal᷊iudda wua'udde pia taumata wawalla su runia. I mangitou papapulunnu manga maṛṛualan taumata apan naawingngu al᷊aṛṛana'u Ruata. Manga taumata wawalla eteudde manga baṛṛanin seetta wahewalla wuṛṛu manga taumata tinumelengnga su tempon al᷊amona.

⁵ Mawu na'ellega tumaniten dal᷊eo manga taumata su runia; anambon ṛingiranni mangitou sidutu lal᷊eo.

⁶ I Tou sinumassilla buatte nandiaddi si mangitou wuṛṛu napaatana'i mangitou su runia. I Tou tumaniten sinumassilla,

⁷ na'oman sara nabbisara, “I ya'u sarun mamate apan buatte Ta'u niola'a udde, wuṛṛu lai al᷊awo'u manu'u winalanganna wuṛṛu winatangnga waine, ana waugu ya'u sinumassilla buatte nandiaddi si mangitou.”

⁸ Arawe i Nuh maal᷊uassa naungngu Mawu.

I Nuh

^9-10 Ete indi watti'u pinabbiaṛṛanni Nuh. I tou pia ana'a esakka siri tallu, eteudde i Sem, i Yafet wuṛṛu i Ham. I Nuh tawe na'ola'a pasasal᷊a, wuṛṛu ete i tou sangkatou su wallatu taumata apan ma'ola'a apapia su tempo udde. I tou mabbiakka uaaukka ringannu Ruata.

¹¹ Arawe anambon taumata waine lal᷊eo su aellegu Ruata, wuṛṛu araṛṛagissa mariaddi su al᷊awo'u tampa.

¹² Ruata ma'ellega runia indi wuṛṛu tumba'u naasilo al᷊al᷊eo, ana waugu anambon taumata lal᷊eo wiakke.

¹³ Ana see Ruata nabbisarate si Nuh, “I ya'u buatte nakkawessa manginsue wiakku al᷊awou'u riadianna. I ya'u sarun mamate si mangitou suadio'a ringannu runia, ana waugu runia napeneten araṛṛagissi mangitou.

¹⁴ I'o pa'ola'e apalla sangngassa wuassu alu apan matohassa; ola'ete wabbo'ane sulal᷊umme, wuṛṛu wuṛṛaite nae lapisete wuassu lal᷊umme wuṛṛu wuassu liudde.

¹⁵ Apalla udde ṛinone 133 meteṛṛe al᷊o'engnge, 22 meteṛṛe al᷊al᷊akke, wuṛṛu 13 meteṛṛe atanggake.

¹⁶ Ola'ete atumme apalla udde wuṛṛu onggol᷊en wawallanne 44 sentimetere su wallattu atuppa wuṛṛu manga darandungnge. Apalla udde ola'e tallun kaṛṛengketanna, wuṛṛu ola'ete ngarane sambau su sandiṛṛanne.

¹⁷ I ya'u sarun mandantan manawangnga ipamate al᷊awo'u riadianna apan mabbiakka su runia. Sarangkanambone su runia sarun mate,

¹⁸ arawe si'o, i Ya'u ṛinone ma'ola'a paaire. Suttate sulal᷊ummu apalla udde suadio'a ringannu awingngu, wuṛṛu al᷊aṛṛanangngu wuṛṛu manga awingngi mangitou.

^19-20 Apira'e lai sulal᷊ummu apalla udde passampare wuassu al᷊awo'u hatin manu'u winalanganna wuṛṛu winatangnga waine, tadea'u i mangitou tawe mate lai.

²¹ Apira'e lai al᷊awo'u anna maola'a wiakki yamiu wuṛṛu manga winatangnga udde.”

²² I Nuh tinumuṛṛutta al᷊awo'u parentan Ruata si tou.