PANDARIADDI 40 - WUKE SUSI WATTI'U AL᷊AL᷊USASSA

I Yusuf nanal᷊a'an atappasannu wal᷊iawa manga taumatan ṛuumanna

¹ Manga pira tempo wua'udde ruan katou mangangimben datu Mesir, eteudde mangangimben ua'e wuṛṛu roti, na'ola'a pasasal᷊a su saruannu ratu.

² Ne ratu nasa'ute su darua mangangimbe udde,

³ ana see itarua niapaasutta sulal᷊ummu tutupanna su wal᷊en tembonannu mandariaga wal᷊en araratuanna udde, su tampa i Yusuf tataṛṛanganna.

⁴ Allannune lai mangitou su tutupanna udde, wuṛṛu mandariaga wal᷊en araratuanna nandolokki Yusuf niapal᷊u'adda sitarua.

⁵ Su ṛabbi sambau mangangimben ua'e wuṛṛu mangangimben roti udde sangkatou-sangkatou nabbal᷊iawa. Atappasannu wal᷊iawan tarua uapapaṛṛala.

⁶ Su tempo i Yusuf nirumanta ringanni tarua tiṛṛabine marua allo, itarua aellehanna massusa.

⁷ Ana see i tou naiwal᷊o, “Anio tuṛṛa-tuṛṛangnga aroddi massusa allo indi?”

⁸ Itarua sinumimbakka, “Naallawanna yambua nabbal᷊iawa, wuṛṛu tawedu maasingkattu atappasanne.” Unni Yusuf, “Tumba'u Ruata apan mangonggola su taumata manal᷊a'an atappasannu wal᷊iawa. Annama'o wattia'a wal᷊iawanu udde.”

⁹ Mangangimben ua'e udde nabbisara, “Sulal᷊ummu wal᷊iawa udde i ya'u naasilo pia punnu anggore su saruangku.

¹⁰ Punnu anggore udde naddanna tatallu. Wakkute manga rannane mannatakke madongnga, tawe nal᷊annu manga wantine nati'akke, ana see wuane nal᷊ahate.

¹¹ Su tempo udde i ya'u tantal᷊anna uaagassa halasi pa'inumannu ratu, nariaddi ya'u nani'o wuan anggore udde wuṛṛu ta'u nipakka sulal᷊ummu halasin datu, ana see ta'u niimbe si tou.”

¹² I Yusuf nabbisara, “Ete indi tal᷊aane: Tatallu ranna udde atappasanne tallu allo.

¹³ Sulal᷊ummu tallu allo indi i'o sarun ipallossu ratu, i tou sarun mangampunga si'o wuṛṛu mapa'awelengngu su manaranu paarorone. I'o sarun mangimben halasi pa'inumannu ratu ere paarorone.

¹⁴ Arawe naungewe i ya'u napawe i'o naola'e mapia. Tul᷊unga'a hatto'u su ratu, tadea'u i ya'u ipallossa wuassu tutupanna indi.

¹⁵ Ana waugu, paarorone i ya'u niaṛṛo wuassu wanuan taumatan Ibrani wuṛṛu isindi lai, su Mesir indi, tawe saran paassa i ya'u na'ola'a al᷊al᷊eo na'oman sara i ya'u nitaṛṛo sulal᷊ummu tutupanna.”

¹⁶ Napawe mangangimben doti udde naasingkatta manungku atappasannu wal᷊iawan mangangimben ua'e mapia, ne i tou lai nabbisara si Yusuf, “I ya'u lai nabbal᷊iawa, i ya'u uarandangu tatallu ul᷊a'u roti su pua'u.

¹⁷ Sulal᷊ummu ul᷊a'a al᷊iurosone pia al᷊awo'a hatin kukisse annu ratu, arawe manga manu'u winalanganna nirumanta niumanna manga kukisse udde.”

¹⁸ I Yusuf sinumimbakka, “Indiwe tal᷊a'an bal᷊iawa udde; Tallung kul᷊a'a udde atappasanne tallu allo.

¹⁹ Sulal᷊ummu tallu allo indi ratu sarun mandolokku taumata iapaponggo'a puanu ana see iele winal᷊unannu su sambau riṛṛi, wuṛṛu manga manu'u winalanganna sarun uminassa ṛemessa wuassu winal᷊unannu.”

²⁰ Tallu allo wua'udde eteudde allo niasungkangannu ratu, wuṛṛu i tou ma'ola'a andeangnga wahewalla su anambon mamanaran araratuanne. I tou mamarenta tadea'u mangangimben ua'e wuṛṛu mangangimben doti iapasabanga wuassu tutupanna wuṛṛu iapidda sumaruanna anambon mamanaran araratuanna.

²¹ Mangangimben ua'e niapawelengnga su manarane paarorone.

²² Arawe mangangimben doti iṛṛuumanna pateanna. Sarangkanambone udde nariaddi ere buete niwal᷊on i Yusuf.

²³ Arawe mangangimben ua'e udde tate naanaungnga si Yusuf. I tou mangke naabul᷊in tou.