PANDARIADDI 39 - WUKE SUSI WATTI'U AL᷊AL᷊USASSA

I Yusuf wuṛṛu awingngi Potifar

¹ I Yusuf niapiddu manga taumatan Ismael udde watukku Mesir, wuṛṛu niwal᷊u'a si Potifar, sangkatou tembonannu ratu apan uamanara lai tembonannu mandariaga wal᷊en araratuanna.

² Mawu nantul᷊ungngi Yusuf na'oman sara i tou sidutu ma'auntunga sulal᷊ummu al᷊awo'u manarane. I tou uatana'a su wal᷊en mawune, taumatan Mesir udde.

³ Tuangnge naasilo manungku Mawu nantul᷊ungngi Yusuf wuṛṛu ana waugu udde i Yusuf mahessi su al᷊awo'u manara apan mammanaranne.

⁴ I Potifar mal᷊uassa si Yusuf wuṛṛu nitenega nabbal᷊i mangangimbe si tou sassane; ana see i Yusuf niapamanaran tou mallu'adda amonanne wuṛṛu al᷊awo'u darotongnge.

⁵ Nanattaka orassa udde, ana waugu i Yusuf, Mawu nangal᷊amatta amonannu taumatan Mesir udde wuṛṛu sarangkanambone apan tatahuananne, mawae ete su wal᷊en ara'e su wawail᷊anna.

⁶ Sarangkanambone apan tatahuananni Potifar tinantilla si Yusuf. Ringannu aroddi i Potifar waggaten hausannu wal᷊en tabbene'e ete ola'u wiakka. I Yusuf matohassa wuṛṛu maṛṛamaga.

⁷ Manga pira tempo al᷊annune, awingngi Potifar manattake pia naungnga si Yusuf, ana see umbasanna udde niaheanne matiilla suadio'a.

⁸ I Yusuf madiri wuṛṛu nabbisara si tou, “Arie pa'asa'u i Mama, i tuanga i Potifar buatte nanantillu al᷊awo'u darotongnge si ya'u. I tou tate maṛṛingiddu manga apa su wal᷊en indi.

⁹ Isindi taṛṛino'u uasul᷊ungngu taṛṛinone. Tawe saran sambau apan tawe niapangimanna si ya'u tumba'u i Mama tawe. Ereapa wotongnge i ya'u ma'ola'a al᷊al᷊eo udde wuṛṛu marosa su saruannu Ruata?”

¹⁰ Salaiwe mamiallo awingngi Potifar massal᷊o'i Yusuf, umbasanna udde sidutu madiri matiilla suadio'a ringanni tou.

¹¹ Su allo sambau i Yusuf sinumutta sulal᷊ummu wal᷊en ma'ola'a manarane, tawe saran sangkatou isudde.

¹² Awingngi Potifar namangkassa si Yusuf su jubane wuṛṛu nabbisara, “Wette iaddua matiilla suadio'a.” I Yusuf nilumawangnga wuṛṛu napallossa, ana see tinumal᷊angnga su liudde, arawe jubane natantanga su liman bawine udde.

¹³ Napawe awingngi Potifar naasilo manungku i Yusuf tinumal᷊angke wuṛṛu jubane natantangke,

¹⁴ i tou namago manga mangangimbene wuṛṛu nabbisara, “Pa'ellego! Taumatan Ibrani apan niapiddu awingku su wal᷊en indi, nallobossa si ite. I tou sinumutta sulal᷊ummu wabboa'u wuṛṛu maapulu makkampassa si ya'u, arawe i ya'u niumui ma'ikka-ikkata.

¹⁵ Su tempo naaringikka i ya'u u'ui, i tou tinumal᷊angnga su liudde wuṛṛu jubane natantanga.”

¹⁶ Ana see awingngi Potifar nanahipunna juba udde naddatingngu awingnge napul᷊e.

¹⁷ Napawe awingnge nawelengke, i tou apiddu nabbatti'a awingnge, wisarane, “Taumatan Ibrani apan niapiddu inawarendi, sinumutta sulal᷊ummu wabboa'u mallobossa si ya'u.

¹⁸ Arawe su tempo i ya'u niumui, i tou tinumal᷊angnga su liudde wuṛṛu jubane natantanga.”

¹⁹ I Potifar nabbal᷊i nasa'u atonna.

²⁰ Wuṛṛu i tou nandolokka tadea'u i Yusuf sametanna wuṛṛu itaṛṛo sulal᷊ummu tutupanna, su tampa tataṛṛoannu manga taumata tataṛṛangannu ratu uataṛṛo.

²¹ Arawe Mawu nantul᷊ungngi Yusuf wuṛṛu sidutu marangngu si tou, na'oman sara tembonannu tutupanna marangngu si tou.

²² Manga taumata tataṛṛanganna nipangimante niapariaga si Yusuf, wuṛṛu ete i Yusuf tinantil᷊annu winabbawa su al᷊awo'u manara apan mammanaranna sulal᷊ummu tutupanna udde.

²³ Tembonannu tutupanna udde tate lai mallu'adda al᷊awo'a apan buatte nipangimanna si Yusuf, ana waugu Mawu mantul᷊ungngi si tou na'oman sara i tou mahessi su al᷊awo'u manarane.