PANDARIADDI 37 - WUKE SUSI WATTI'U AL᷊AL᷊USASSA

I Yusuf wuṛṛu manga tuṛṛangnge

¹ I Yakub namanuate su wanua Kanaan, su tampa atatanaannu iamangnge,

² wuṛṛu ete indi watti'u amonanni Yakub. Su tempo i Yusuf, ana'i Yakub uukke mapul᷊o pitu su tonnane, i tou uapadul᷊i ammul᷊annu ambinga domba suadio'a ringannu manga iaangnge, eteudde ana'i Bilha wuṛṛu i Zilpha, ruan katou awingngu iamangnge waine. I tou nangalae su iamangnge inolaanna lal᷊eo apan niola'u manga iaangnge.

³ I Yakub lembon marangngu si Yusuf wuassu anambon anangnge waine, ana waugu i Yusuf niasungkanga su tempo iamangnge timmadete. Su allo sambau i Yusuf niolaanni tou sambau juba apan lembon maṛṛa mago.

⁴ Napawe manga iaangngi Yusuf naasilo manungku iamangngi mangitou lembon marangngu si Yusuf wuassi mangitou, i mangitou nasa'ute si Yusuf, na'oman sara i mangitou maddirite maggahatton tou.

⁵ Su ṛabbi sambau i Yusuf nabbal᷊iawa, wuṛṛu napawe i tou nabbati'u wal᷊iawane udde su manga iaangnge, i mangitou lembon massa'u si tou.

⁶ Ete indi apan niwatti'i Yusuf si mangitou, “Paddaringikka!

⁷ I ya'u nabbal᷊iawa i ite sarangkanambone tantal᷊anna su wailla mamma'isa gandumma, ana see gandumma tatahuanangku dirumarisikka matul᷊idda. Manga gandummi yamiu apan buatte niwa'issa namal᷊iwutta gandumma apan buatte ta'u niwa'issa ana see nassubba si tou.”

⁸ “I'o massunna manungku i'o sarun maola'a ratu wuṛṛu uataṛṛino si yami?” wisaran manga iaangnge. Ana see lembon massa'ute i mangitou si tou ana waugu manga wal᷊iawane wuṛṛu ana waugu sarangkanambone apan buatte niwatti'i tou.

⁹ Wua'udde i Yusuf nabbal᷊iawa apia, wuṛṛu i tou nabbatti'a su manga iaangnge, “I ya'u nabbal᷊iawa apia, i ya'u naasilo matannallo, wul᷊anna wuṛṛu mapul᷊o dua anumpitanna nassubba si ya'u.”

¹⁰ Wal᷊iawa udde niwatti'i tou lai su iamangnge, wuṛṛu iamangnge nanagu si tou, wisarane, “Wal᷊iawa apa udde? Su ṛingirannu i ya'u, inangngu wuṛṛu manga tuṛṛangngu sarun dumanta wuṛṛu massubba si'o?”

¹¹ Manga iaangngi Yusuf piate naungnga lal᷊eo si tou, arawe iamangnge sidutu maṛṛingiddu wal᷊iawa udde.

I Yusuf niwal᷊u'a wuṛṛu niapidda watukku Mesir

¹² Su allo sambau su tempo manga iaangngi Yusuf inaite watukku Sikhem mallu'adda ammul᷊annu ambinga domban iamangngi mangitou,

¹³ i Yakub nabbisarate si Yusuf, “Roote watukku Sikhem, su tampa manga iaangngu mallu'adda ammul᷊annu ambinga domban kite.” I Yusuf sinumimbakka, “Ore Papa.”

¹⁴ Iamangnge nabbisara, “Ellehete ereapa olangnge manga iaangngu wuṛṛu ammul᷊annu ambinga domba, ana see pabbelengke pabbal᷊o si ya'u.” Ne i tou namallosen i Yusuf inaite nanantangngu Wawal᷊annu Hebron. Tawe nal᷊annu i Yusuf na'omate su Sikhem.

¹⁵ Tantal᷊anna i tou u'aamatta uapapal᷊ele su wadda'a, i tou nassombaten sangkatou esakka wuṛṛu naiwal᷊o si tou, “Apa raddeaannu?”

¹⁶ “Manga iaangku. I mangitou tantal᷊anna uariaga ammul᷊annu ambinga domba,” sasimbakki Yusuf, “I Papa masingkatta suapa i mangitou uatana'a?”

¹⁷ Sasimbakku taumata udde, “I mangitou nangingkatte wua isindi. I ya'u naaringikka manungku i mangitou inai watukku Dotan.” Ana see i Yusuf inaite nattuṛṛutta manga iaangnge wuṛṛu inaratinganna i mangitou su Dotan.

¹⁸ Ro'en ta'e marau i mangitou naasilote si Yusuf, wuṛṛu tantal᷊anna i tou taambe na'oma ringanni mangitou, i mangitou nabbaidda mamate si tou.

¹⁹ Unni mangitou sangkatou ringannu sangkatou, “Pa'elega, i taṛṛa wal᷊iawa nirumantate.

²⁰ Wette pateanni ite i tou, wuṛṛu winal᷊unanne iramme su paṛṛihi mamara. Mantewe iwal᷊on kite manungku i tou nate niaṛṛatu winatangnga mal᷊aṛṛaga. Ellehanten kite ereapa sal᷊immurine manga wal᷊iawane udde.”

²¹ I Ruben naaringikka ṛiinni mangitou udde, ana see i tou madea'a lal᷊anne manal᷊amatta si Yusuf. “Arie pappate i tou,” wisarane.

²² “I tou ilomboteng kite sulal᷊ummu paṛṛihi su wadda'a indi, arawe imbaṛṛangnga i ite mamuulla ara'e mallessa si tou.” Olangnge udde niwisarane ana waugu i tou pia pandumma manal᷊amatta si Yusuf wuṛṛu mandolokki tou iapaapul᷊e watukku wal᷊en.

²³ Napawe i Yusuf na'omate ringannu manga iaangnge, ringannu maṛṛagissa i mangitou nalluatta juban i Yusuf apan tumaniten maṛṛamaga udde.

²⁴ Ana see i mangitou namol᷊engnga si tou wuṛṛu nilombo sulal᷊ummu paṛṛihi apan mamara.

²⁵ Tantal᷊anna i mangitou u'anna, inaṛṛombanganne i mangitou naasilo sambau ammul᷊annu taumatan Ismael apan tantal᷊an sulal᷊ummu amatanna wuassu Gilead watukku Mesir. Manga unta mangitou lal᷊uranannu manga rampa-rampa wuṛṛu anggore namarate.

²⁶ Ana see i Yehuda nabbisara su manga tuṛṛangnge, “Apa hunane mamate tuaring, kite wuṛṛu mangadapingngu pamamate udde?

²⁷ Wette i ite mabbal᷊u'i tou su taumatan Ismael udde. Ariete i ite manansara si tou. Salaiwe ereapa i tou tuarin kite sassane.” Manga tuṛṛangnge inumirete,

²⁸ wuṛṛu napawe manga pira mabbawal᷊u'a wuassu Midian sinumabbi, i Yusuf niapaasabangu manga iaangnge wuassu lal᷊ummu paṛṛihi udde ana see niwal᷊u'a su taumatan Ismael udde ringannu aregane ruan pul᷊o roitta sal᷊a'a. Wua'udde i tou niapiddu manga mabbawal᷊u'a udde watukku Mesir.

²⁹ Napawe nabelengnga su paṛṛihi udde wuṛṛu tawe naasilo si Yusuf isudde, i tou nanggesa'a laungnge ana waugu massusa.

³⁰ I tou nabelengnga ringannu manga tuṛṛangnge wuṛṛu nabbisara, “Ana'a udde tate baddi'a isudde! Apa sarun ta'u olaanna orassa indi?”

³¹ Ana see i mangitou namototte ambinga sambau wuṛṛu nangammon juban i Yusuf sulal᷊ummu daṛṛan ambinga udde.

³² Wua'udde juba udde niapa'untuddi mangitou ringannu iamangngi mangitou ringannu tanatane, “Juba indi niasombanganni yami. Apa indi darotongngu ana'i Papa?”

³³ I Yakub naaillal᷊a juban udde, ana see nabbisara, “Atonna, indi juban ana'u! I tou buatte nitamboannu winatangnga mal᷊aṛṛaga. Uare, ana'u i Yusuf natete nihesa'u winatangnga udde!”

³⁴ I Yakub nanggesa'a laungnge ana waugu massusa wuṛṛu nalluṛṛen laubbu lalal᷊o. Aroddi al᷊annune i tou lulluain anangnge udde.

³⁵ Anambon anangnge, mawae esakka aroddi lai wawine nirumanta mallimbatta, arawe i tou tawe al᷊imbatanna. Wisarane, “Maddatingngu papate'u i ya'u sidutu lulluain ana'u.” Aroddite i tou sidutu lullal᷊o ana waugu anangnge.

³⁶ Tatantal᷊anna udde, su Mesir, manga taumatan Midian buatte nabbal᷊u'i Yusuf si Potifar, sangkatou mamanaran datu apan uaagassa mamamiaṛṛa'u mandariaga wal᷊en kararatuanna.