PANDARIADDI 36 - WUKE SUSI WATTI'U AL᷊AL᷊USASSA

Papapulunni Esau

¹ Indiwe papapulunni Esau apan isassago lai i Edom.

² I Esau na'awingngu siri tallu wawinen Kanaan, eteudde: i Ada, ana'i Elon taumatan i Het; i Oholibama, ana'i Ana wuṛṛu pulunni Zibeon taumatan i Hewi;

³ i Basmat, ana'i Ismael wuṛṛu tuarin i Nebayot.

⁴ I Ada nanungkangi Elifas, i Basmat nanungkangi Rehuel,

⁵ wuṛṛu i Oholibama nanungkangi Yeus, i Yaelam wuṛṛu i Korah. Manga ana'a udde sarangkanambone niasungkanga su wanua Kanaan.

⁶ Wua'udde i Esau nanantangngi Yakub wuṛṛu inaite watukku wanua waine nangapiddu anambon awingnge, anangnge wuṛṛu anambon taumata apan uatana'a su wal᷊ene, suadio'a ringannu manga winatangnga wuṛṛu darotongnge apan niasombanganne su Kanaan.

⁷ I Esau nattal᷊em i Yakub ana waugu darotongngi mangitou tumaniten manambo na'oman sara i mangitou tawe mapabiakka su sambau. Ana see lai su wanua apan atatanaanni mangitou udde tawe mattiudda annu winatangngi mangitou apan tumanite manambo udde.

⁸ Ne i Esau apan isassago lai i Edom, namanuate su wageangngu panenteannu Seir.

⁹ Indiwe papapulunni Esau, al᷊amonan taumatan i Edom.

^10-13 Awingngi Esau aranne i Ada nanungkangu sangkatou ana'a esakka, aranne i Elifas. Wuṛṛu i Elifas pia siri lima ana'a esakka, eteudde; i Teman, i Omar, i Zefo, i Gaetam wuṛṛu i Kenas. I Elifas pia awingnge su liudde, aranne i Timna. I tou nanungkangu ana'a esakka aranne i Amalek. Awingngi Esau aranne i Basmat nanungkangu sangkatou ana'a esakka aranne i Rehuel. Wuṛṛu i Rehuel naasomba siri appata ana'a esakka, eteudde; i Nahat, i Zerah, i Syama wuṛṛu i Miza.

¹⁴ Awingngi Esau aranne i Oholibama, eteudde ana'i Ana wuṛṛu pulunni Zibeon, nanungkangu siri tallu ana'a esakka, eteudde; i Yeus, i Yaelam wuṛṛu i Korah.

¹⁵ Indiwe timmadu ṛuangannu papapulunni Esau: i Elifas, ana'i Esau pahul᷊une, eteudde al᷊amona manga ṛuanganna manansunna indi; i Teman, i Omar, i Zefo, i Kenas,

¹⁶ i Korah, i Gaetam wuṛṛu i Amalek. I mangitou sarangkanambone udde papapulunni Ada, awingngi Esau.

¹⁷ I Rehuel, ana'i Esau, eteudde iupungngu manga ṛuanganna manansunna indi: i Nahat, i Zerah, i Syama wuṛṛu i Miza. I mangitou sarangkanambone papapulunni Basmat, awingngi Esau.

¹⁸ Manga ṛuanganna manansunna indi eteudde papapulunni Esau wuassu awingnge aranne i Oholibama ana'i Ana, eteudde: i Yeus, i Yaelam wuṛṛu i Korah.

¹⁹ Anambon ṛuanganna udde papapulunni Esau.

Papapulunni Seir

^20-21 Tumana'u leta'u Edom tutune nitahia wuassu manga ṛuanganna papapulunni Seir, taumatan i Hori. Manga ṛuanganna udde eteudde: i Lotan, i Syobal, i Zibeon, i Ana, i Disyon, i Ezer wuṛṛu i Disyan.

²² I Lotan eteudde iupungngu ṛuanganni Hori wuṛṛu i Heman (i Lotan pia tuṛṛangnge wawine, eteudde i Timna.)

²³ I Syobal eteudde iupungngu ṛuanganni; Alwan, i Manahat, i Ebal, i Syefo wuṛṛu i Onam.

²⁴ I Zibeon pia duang katou ana'a esakka, eteudde i Aya wuṛṛu i Ana. (Ete i Ana indi apan naasangkalla manga al᷊imatang kua'e mal᷊oso su wadda'a, su tempo i tou tantal᷊anna mallu'adda manga keledain iamangnge).

^25-26 I Ana eteudde iamangngi Disyon iupungngu ṛuanganni: Hemdan, i Esyban, i Yitran wuṛṛu i Keran. I Ana lai uatahuanna sangkatou ana'a wawine, aranne i Oholibama.

²⁷ I Ezer al᷊amonan ṛuanganni: Bilhan, i Zaawan, wuṛṛu i Akan.

²⁸ I Disyan al᷊amonan ṛuanganni Us wuṛṛu i Aran.

^29-30 Ete indi manga ṛuanganni Hori su wanua Edom; i Lotan, i Syobal, i Zibeon, i Ana, i Disyon, i Ezer wuṛṛu i Disyan.

Manga Ratun Edom

^31-39 Tantal᷊anna taambe ratu apan uaparenta su Israel, manga ratu apan manansunna indi uaparenta su leta'u Edom ringannu ual᷊al᷊ol᷊ossa: I Bela ana'i Beor wuassu Dinhaba. I Yobab ana'i Zera wuassu Bozra. I Husyam wuassu wageangngu leta'u Teman. I Hadad ana'i Bedad wuassu Awit (ete i tou apan nalluṛṛugu taumatan Midian sulal᷊ummu pangalo su wageangngu leta'u Moab). I Samla wuṛṛu i Masreka. I Saul wuassu Rehobot su wiwikku Sal᷊u. I Baal-Hanan ana'i Akhbor. I Hadar wuassu Pahu (awingnge aranne I Mehetabeel, ana'i Matred wuṛṛu pulunni Mezahab).

^40-43 I Esau uddewe al᷊amona manga ṛuangannu Edom manansunna indi; i Timna, i Alwa, i Yetet, i Oholibama, i Ela, i Pinon, i Kenas, i Teman, i Mibzar, i Magdiel, wuṛṛu i Iram. Suapan ṛuanganna nangonggolu aranne su wageangngu leta'a apan atatanaanne.