PANDARIADDI 31 - WUKE SUSI WATTI'U AL᷊AL᷊USASSA

I Yakub tinumal᷊angnga wua dinganni Laban

¹ I Yakub naaringikka al᷊aṛṛana'i Laban nabbisara arendi, “I Yakub buatte nanganu al᷊awo'u darotongngu iamangngi ite. Anambon pa'a'alane punnene wuassu darotongngu iamangngi ite.”

² I Yakub naasilo lai manungku i Laban tate lai masaṛṛionto'a ere dorone si tou.

³ Ana see Mawu nabbisara si Yakub, “Pabelengke watukku wanuan iamangngu wuṛṛu ringannu manga tuṛṛangngu. I Ya'u sarun mallu'adda si'o.”

⁴ Wua'udde i Yakub nandolokku taumata niapapasingkatta si Rahel wuṛṛu si Lea tadea'u maisasomban tou su wadda'a, su tampan ammul᷊annu ambinga wuṛṛu dombane.

⁵ Ana see i Yakub nabbisara sitarua, “I ya'u ma'ellega manungku iamangngu tate masaṛṛionto'a si ya'u ere dorone; arawe Mawu Ruata apan raddaloannu iamangku ual᷊u'adda si ya'u.

⁶ Iraddua lai masingkatta manungku i ya'u buatte nammanara ringannu iamangngu ringannu ahewallu atatoha'u.

⁷ Salaiwe aroddi ya'u buatte niawusuanne wuṛṛu i tou namal᷊u lal᷊antakke na'oman sara paapul᷊o awawone. Arawe Ruata tawe namalan tou ma'ola'a al᷊al᷊eo si ya'u.

⁸ Su tempo iamangngu nabbisara, ‘Ambinga apan pia boṛṛentenge sarun maola'a lal᷊antakku,’ ne al᷊awo'u ammul᷊annu winatangnga nanungkangu ana'a apan pia boṛṛentenge. Su tempo i tou nabbisara, ‘Ambinga apan pia tal᷊iṛṛawanne sarun maola'a lal᷊antakku,’ ne al᷊awo'u ammul᷊annu winatangnga udde nanungkangu ana'a tal᷊iṛṛawanna.

⁹ Ete aroddi Ruata buatte nanganu ammul᷊annu winatangnga tatahuananni iamangngu ana see nionggola si ya'u.

¹⁰ Wuṛṛu su tempo manga winatangnga udde uawawatianna, i ya'u nabbal᷊iawa naasilo anambon ambinga esakka apan tantal᷊anna uawawatianna, pia boṛṛentenge, pia titingnge wuṛṛu tal᷊iṛṛawanna.

¹¹ Wuṛṛu Ruata ringannu lihiddu mala'ekatta nabbisara si ya'u sulal᷊ummu wal᷊iawa udde, wisarane, ‘I Yakub!’ I ya'u sinumimbakka, ‘Ore’.

¹² Mala'ekatta udde nabbisara apia, ‘Pa'ellege, anambon ambinga esakka apan tantal᷊anna uawawatianna udde pia boṛṛentenge, wuṛṛu pia titingnge wuṛṛu tal᷊iṛṛawanna. I Ya'u nangatokku udde si'o ana waugu i ya'u buatte naasilo al᷊awo'u inolaanni Laban si'o.

¹³ Ete i Ya'u Ruata apan buatte naipasilon batangan-Ne si'o su Betel. Poiaroddi i'o buatte nangonggolu sasamba sambau watu pananaunganna, ringannu nallal᷊innu lanan zaitun su wowone. Poiaroddi lai i'o nassalu. Orassa indi pandiahite wuṛṛu pabelengke watukku wanua niasungkangannu.’ ”

¹⁴ Ana see i Lea wuṛṛu i Rahel sinumimbakka, “Tate bageangnge lai wuassu pa'a'alan iamangngi yami apan pussaanni yami.

¹⁵ I yami indi si tou naal᷊ihidda taumata raho. I tou buatte nabbal᷊u'i yami wuṛṛu sarangkanambone apan buatte nisengkamma udde buatte lai niinsue.

¹⁶ Anambon pa'a'ala apan buatte nianun Duata wuassu iamangngi yami udde ṛinone darotongngi yami wuṛṛu darotongngu manga ana'i yami. Tuṛṛute apa apan nirolokku Ruata si'o.”

^17-18 Ana see i Yakub nandiahite inai mapul᷊e ringanni iamangnge su wanua Kanaan. I tou nalluranten manga awingnge wuṛṛu manga anangnge su wowon unta, wuṛṛu i tou nangul᷊ugga anambon ammul᷊annu ambinga dombane wuṛṛu al᷊awo'u darotongnga apan niasombanganne su Mesopotamia.

¹⁹ Tempo udde i Laban su wadda'a tantal᷊anna mammol᷊o wambul᷊un manga dombane, wuṛṛu ete su tempo udde i Rahel nanna'o paal᷊uanna mallal᷊u'adda amonanna darotongngu iamangnge.

²⁰ I Yakub namahia si Laban ringannu tawe namasingkattu apapul᷊ene.

²¹ I tou nanganu al᷊awo'u darotongnge wuṛṛu inaite ringannu mal᷊iha-l᷊ihakka. I tou tinumumbe Sal᷊ukku Efrat see inaite watukku wageangu panenteannu Gilead.

I Laban nangenggenna si Yakub

²² Wakkute tallu allo nal᷊iudda i Laban nipasingkatanna manungku i Yakub tinumal᷊angke.

²³ Ana see i Laban nangammullu manga taumatane wuṛṛu suadio'a ringanni mangitou nangenggenna si Yakub al᷊annune pitu allo nanantuṛṛutta su panenteannu Gilead.

²⁴ Ṛabbi Ruata nirumanta ringanni Laban sulal᷊ummu wal᷊iawane, wuṛṛu nabbisara, “Naunge, imbaṛṛanga i'o mamansagi Yakub salaiwe tumba'u ringannu wisara sangkapadi!”

²⁵ Su tempo udde i Yakub buatte napararisikku rasanne su sambau wuidda. Wua'udde su sambau wuidda waine su wageangu leta'a udde lai Laban wuṛṛu manga taumatane napararisiku rasanne.

²⁶ Wua'udde i Laban nabbisara si Yakub, “Anio i'o namahia si ya'u wuṛṛu nantal᷊angngu manga ana'u, i mangitou naal᷊ihidda taumata niatawanna su lal᷊ummu pangalo?

²⁷ Anio i'o namahia si ya'u wuṛṛu nangingkatta ringannu mal᷊anna-l᷊annaba, ringannu tawe bawal᷊one? Unnu wisara i'o nabbawal᷊o, i ya'u sarun nandolokku ringannu mal᷊uassa apiddu mangantarin musikku rebana wuṛṛu kecapi!

²⁸ I'o ewe'e tawe nangonggolu tempone si ya'u mangari'a ana'a pulungku maola'a tatialan patatal᷊ei. Longonna atonna pallal᷊agunu!

²⁹ I ya'u ta'e matohassa ma'ola'a al᷊al᷊eo su saruannu, arawe na'allawanna Ruata apan sassubbannu iamangngu napaanaungnga si ya'u tadea'u imbaṛṛanga i ya'u mamansagu.

³⁰ I ya'u masingkatta manungku i'o nangingkatta udde ana waugu i'o maapulu mapul᷊e. Arawe anio i'o nanna'o paal᷊uanna mallal᷊u'adda amonangku?”

³¹ Ana see i Yakub sinumimbakka, “I ya'u nanantangnga ringannu mal᷊anna-l᷊annaba ana waugu matta'utti i Papa manaṛṛangnga manga ana'i Papa.

³² Su ola'u paal᷊uanna udde, amungkangu i Papa naasangkalla sangkatou isindi apan buatte nanna'o, i tou sarun iṛṛuumanna pateanna. Parikisete, tanne pia manga saranapa darotongngi Papa isindi. Amungkangu pia, ore anute. Wuṛṛu manga taumatang kite wotongnge maola'a matatatialane.” I Yakub wagga manungku i Rahel apan nanna'o paal᷊uanna udde.

³³ Ana see i Laban inaite watukku rasanni Yakub wuṛṛu namarikissa; wua'udde i tou watukku rasanni Lea wuṛṛu watukku rasana aruane wuassu allangnga wawine udde, arawe paal᷊uanna udde tawe niasombanganna. Panginsueanne i tou sinumutta sulal᷊ummu rasanni Rahel.

³⁴ Tantal᷊ana udde i Rahel buatte nanganu paal᷊uanna udde wuṛṛu nitaṛṛo sulal᷊ummu pato'a aiananna su liuddu unta, wuṛṛu i tou sassane ua'ianna su aiananna udde. I Laban namarikissa ahewallu rasanni Rahel, arawe tawe naasomba paal᷊uanna udde.

³⁵ Ana see i Rahel nabbisara iamangnge, “Ariewe i Papa masa'u, i ya'u tawe maararisikka manal᷊oho si Papa, ana waugu i ya'u tantal᷊anna nirantannu rada'u wawine.” I Laban maddea'a ringannu maadunna, arawe tawe naassomba paal᷊uanna udde.

³⁶ Ne i Yakub nasa'ute, “Al᷊al᷊eo apate apan buatte ta'u niola'a?” aiwal᷊one ringannu hati mapakkada. “Apa pasasal᷊a'u na'oman sara i Papa nangenggenna si ya'u?

³⁷ Orassa indi napawe buatte namarikissa al᷊awo'u saranapa'u, apa'i Papa naasangkalla darotongngi Papa? Paasabanga'e saranapa udde wuṛṛu addoa'e isindi, tadea'u manga taumata'u wuṛṛu manga taumatan i Papa wotongnge maasilo wuṛṛu makkawessa isai su wallati ite apan naṛṛino.

³⁸ Ruan pul᷊o su tonnane i ya'u uatana'a ringanni Papa. Ammul᷊annu domba wuṛṛu ambingngi Papa nabbalage manambo, wuṛṛu taambe saran paassa i ya'u niuminassa sambau ambinga esakka wuassu winatangngi Papa.

³⁹ Iapa nate niaṛṛatu winatangnga mal᷊aṛṛaga tawe saran paassa ta'u niapidda ringanni Papa, arawe i ya'u sassane namaekka. Iapa nita'o su tempo allo ara'e ṛabbi sidutu tattuntu'anni Papa tadea'u i ya'u mamaekka.

⁴⁰ Masokka i ya'u apadisanna su tempo allatune wuṛṛu amansungeanna su tempo alloarane. Wuṛṛu masokka lai ya'u tawe amatiil᷊anna.

⁴¹ Etearoddi ya'u su tempo mammanara ringanni Papa al᷊annune naṛṛattubba ruan pul᷊o su tonnane. Mapul᷊o appata su tonnane al᷊annune i ya'u mammanara tadea'u maasomba ruan katou ana'i Papa udde wuṛṛu annumu tonna lai tadea'u maasomba ammul᷊annu ambinga domba udde. Wuṛṛu al᷊annune udde lai i Papa namal᷊u lal᷊antakke nihaingnga paapul᷊o wuassu lal᷊antakke paarorone.

⁴² Unnu wisara i ya'u tawe lal᷊u'arannu Ruatan al᷊amona'u, eteudde Ruata apan sassubanni Abraham wuṛṛu i Ishak, ne i Papa buatte napaasal᷊iu'u ringannu tawe ul᷊ene. Arawe Ruata buatte na'ellega asasusa'u wuṛṛu manara apan buatte ta'u niola'a, wuṛṛu masaṛṛabi i Tou buatte nakkawessa.”

Paairen i Yakub wuṛṛu i Laban

⁴³ Ana see i Laban sinumimbakka si Yakub, “Wawine darua udde ana'u; ana'i mangitou udde pussaa'u, wuṛṛu ammul᷊annu domba udde darotongku lai. Mangke atonna, al᷊awo'u saranapa apan aellehannu isindi udde tatahuanangku. Arawe i ya'u tawe mapanaṛṛangnga ana'a pulungku.

⁴⁴ Ana waugu udde wette iaddua makkiinnu paaire wuṛṛu mangatokku manga watu maola'a tatialan pa'aire udde.”

⁴⁵ Wua'udde i Yakub nanganu sambau watu wuṛṛu nipasi'a maola'a watu pananaunganna.

⁴⁶ Ana see i tou nandolokku manga taumatane mangammulu watu wuṛṛu niapa'ombo. Wua'udde i mangitou niumante su sampunna maranin batu ua'ombo udde.

⁴⁷ Watu ua'ombo udde nissagon i Laban i Yegar-Sahaduta, arawe si Yakub nissago Galed.

⁴⁸ Unnu i Laban si Yakub, “Ombon batu indi sarun maola'a pananaunganna siaddua.” Ana waugu udde tampa udde nissago Galed.

⁴⁹ I Laban nabbisara apia, “Antimanna Mawu uariaga si ite su al᷊annune i ite mabbiakka mararau.” Ana waugu udde tampa udde nissago lai Mizpa.

⁵⁰ I Laban nabbisara apia, “Amungkangu i'o ma'ola'a al᷊al᷊eo su al᷊aṛṛana'u, ara'e ma'awingngu manga wawine waine, salaiwe taweddu maasingkatta, paanaunge Ruata uariaga si ite.

⁵¹ Eteindi manga watu apan ta'u niombo, wuṛṛu indi watu pananaunganna.

⁵² Mawae ombone indi, ara'e watu pananaunganna udde mapaanaungnga si ite manungku i ya'u tawe wotongnge malliu ombone indi inai mamangalo si'o, wuṛṛu i'o lai tawe wotongnge malliu ombone indi inai mamangalo si ya'u.

⁵³ Ruata apan sassubbanni Abraham wuṛṛu sassubannu iamangku i Nahor sarun maola'a mallaṛṛuungnga su wallati yaddua.” Ana see i Yakub nassalu ringannu arannu Ruata apan sassubanni Ishak, iamangnge, tadea'u masuungnga pa'airene.

⁵⁴ I tou namototta winatangnga sambau wuṛṛu niola'a sasamba su wowon buidda udde. Ana see i tou nangahe manga taumatane umanna suadio'a, i mangitou nanaṛṛabbi su wuidda udde.

⁵⁵ Tiṛṛabbine marua allo maṛṛanggapa, i Laban nangonggolu aari'u patatal᷊ei su ana'a pulunne, nangal᷊amatta si mangitou, ana see napul᷊ete watukku tampa atatanaanne.