PANDARIADDI 23 - WUKE SUSI WATTI'U AL᷊AL᷊USASSA

I Sara nate wuṛṛu i Abraham namalli leta'a pallabinganna

¹ Napawe i Sara nal᷊al᷊appe uukka 127 su tonnane,

² i tou nate su Hebron su leta'u Kanaan. I Abraham nasusa wuṛṛu lullal᷊on awingnge udde.

³ Wua'udde i Abraham nanantangngu winal᷊unannu awingnge wuṛṛu inaite ringannu manga taumatan Het, apan uatana'a su wanua udde. I tou nabbisara,

⁴ “I Ya'u indi taumata raho apan uatana'a su pattangngannu manga tuṛṛangnga; walaawe i ya'u mamalli leta'a tadea'u i ya'u wotongnge mallabingngu awingku.”

⁵ I mangitou sinumimbakka,

⁶ “I yami mangaddata si Tuangnga sangkatou mamamiaṛṛa'a apan matohassa su wallati yami, nariaddi labinga'e awingngi Tuangnga sulal᷊ummu labingnga apianne apan tatahuannanni yami. I yami sarangkanambone mal᷊uassa manaddia labingngu awingngi Tuangnga.”

⁷ Wua'udde i Abraham niumal᷊intudda su saruanni mangitou,

⁸ wuṛṛu nabbisara, “Amungkangngu manga tuṛṛangnga mamala'u mallabingngu awingku isindi, tul᷊unga'a doronge si Efron, ana'a esakki Zohar,

⁹ tadea'u i tou mabbal᷊u'a si ya'u Liangngu Makhpela apan tampane su winggin bawail᷊anne. Mappianne i tou mabbal᷊u'u leta'a udde isindi, ringannu tatialannu manga tuṛṛangnga. Aregane sarun ta'u waeṛṛanna abbi, tadea'u leta'a udde maola'a pussaa'u.”

¹⁰ Su tempo udde i Efron sassane tantal᷊anna ua'ianna ringannu manga taumatan Het su sambau tampa paammul᷊anna su ngara pasallangannu soa. Ana see ringannu aellehannu anambon taumata isudde, i tou sinumimbakka,

¹¹ “Walahangku sassane maola'a matatialane manungku wailla udde suadio'a ringannu liangnge ta'u ionggolla tadea'u i Tuangnga wotongnge mallabingngu awingngi Tuangnga.”

¹² Ne i Abraham niumal᷊intudda su saruannu manga taumatan Het udde,

¹³ wuṛṛu ringannu dararingiṛṛannu anambon taumata, i tou nabbisara si Efron, “Sal᷊andeanna daringiṛṛe'o i ya'u. I ya'u maapulu mamalli ahewallu wawail᷊annu udde. Sengkampe roinne, tadea'u i ya'u mallabingngu awingku isudde.”

¹⁴ I Efron sinumimbakka,

¹⁵ “Leta'a santampa aregane tumba'u maṛṛasutta roitta sal᷊a'a – apa mangal᷊ene udde siaddua? Labbinga'e awingngi Tuangnga isudde.”

¹⁶ I Abraham naapuluten arega udde. I tou nandeengngu roitta sal᷊a'a anambone ere nisagon Efron, eteudde appatu ṛasutta roitta sal᷊a'a, tumuṛṛuttu aul᷊aanna ara'e uṛṛanna apan ipappaattu manga mabbawal᷊u'a. Ana see i tou namaekke si Efron, ringannu aellehannu anambon taumatan Het udde.

¹⁷ Etearoddi wawail᷊anni Efron su Makhpela su samba'an da'i Mamre, naola'e pussa'an Abraham. Leta'a udde sulal᷊ummete wailla wuṛṛu liangnge see lai anambon manga aaluanna nasutta lai manga aaluanna su passaranne.

¹⁸ Leta'a udde nianun anambon taumatan Het apan uaammulla su ngara wahewan pasallangannu soa, naola'a pussa'an Abraham.

¹⁹ Wua'udde i Abraham nallabingken Sara awingnge sulal᷊ummu liangngu Makhpela su leta'u Kanaan.

²⁰ Etearoddi wawail᷊anna suadio'a ringannu liangnge apan dorone pussa'an taumatan Het, naola'a pussa'an Abraham nariaddi leta'a pallal᷊abinganna.