PANDARIADDI 21 - WUKE SUSI WATTI'U AL᷊AL᷊USASSA

Asasungkangngi Ishak

¹ Mawu nangal᷊amatta si Sara ere buatte nipa'ire-Ne udde.

² Su tempo apan buatte tinantunnu Ruata, napawe i Abraham timmadete, i Sara piate illoṛṛo ana see mangunsiwen sangkatou ana'a esakka.

³ Ana'a udde nissagon Abraham i Ishak;

⁴ wuṛṛu napawe i Ishak uukke ual᷊ute allo, i Abraham nassunatta si tou, ere buatte nirolokku Ruata.

⁵ I Abraham uukke maṛṛasutta su tonnane su tempo i Ishak nisungkangnga.

⁶ I Sara nabbisara, “Ruata buatte napal᷊age'u ana waugu lulluassa. Suapan taumata apan naaringikka olangnge indi sarun lumage lumuassa suadio'a ringangku.”

⁷ Wua'udde tatambane lai, “Isai tanginna wotongnge mabbal᷊o awingku manungku i ya'u sarun mapasusun ana'a? Arawe i ya'u buatte nanungkangnga lai salaiwe awingku timmadete atonna.”

⁸ Ana'a udde aatambanna ahewalle, wuṛṛu nanattakka su tempo i tou mannattake niapaado sumusu, i Abraham na'ola'a andeangnga mawantuga.

I Hagar wuṛṛu i Ismael nilimbuaṛṛanna

⁹ Su sambau allo, i Ismael, ana'i Abraham wuṛṛu i Hagar wawine Mesir udde, tantal᷊anna mannalangnga ringanni Ishak, ana'i Sara.

¹⁰ I Sara naasilo olangnge udde ana see nabbisara si Abraham, “Limbuaṛṛete allangnga wawine suadio'a ringannu anangnge. Imbaṛṛangnga ana'u wawine udde manengkamma wageangnge wuassu paa'alanu apan sarun pussaannu ana'u i Ishak.”

¹¹ I Abraham mangke tawe mal᷊uassa su darorongnga udde, ana waugu I Ismael udde lai anangnge.

¹² Arawe Ruata nabbisara si Abraham, “Arie i'o suminggawangu allangngu i Hagar wuṛṛu anangnge udde. Tuṛṛutete apulun Sara, ana waugu ete wuassi Ishak i'o sarun maasomba papapulunna apan Ta'u pina'ire udde.

¹³ Aroddi lai su ana'i Hagar sarun Ta'u onggol᷊annu manambo ana'a, pulunna tadea'u i mangitou maola'a sambau balahanna. Ana waugu i tou anangngu lai.”

¹⁴ Tiṛṛabbine marua allo atanna, i Abraham nangonggolu anna wuṛṛu pato'an kua'e si Hagar maola'a wal᷊unna su amatanna. I tou nangaddon ana'a udde su liuddi i Hagar, wuṛṛu nandolokku wawine udde inai. Ana see inaite i Hagar wuṛṛu namal᷊intadden wadda'u Bersyeba.

¹⁵ Napawe ua'e wal᷊unne nasuete, i Hagar nangaddon anangnge su al᷊ungngu aaluanna,

¹⁶ ana see inuma'ianna iraṛṛangngo maṛṛasutta su meteṛṛene wuassu tampa udde. Wisarane sulal᷊ummu naungnga, “I ya'u tawe maataṛṛangnga ma'ellega ana'u mate.” Ana see i tou nilumuaiten.

¹⁷ Ruata naddaringikka tingikki Ismael,wuṛṛu wuassu langitta mala'ekattu Mawu nabbisara si Hagar, wisarane, “Apate ma'asusa si'o, Hagar? Ariete paata'utta. Ruata buatte naddaringikka tingikku anangngu.

¹⁸ Roote ringannu anangngu sal᷊urute wuṛṛu limbatete i tou. I Ya'u sarun mandiadi papapulunne sambau walahanna apan balahanna.”

¹⁹ Ana see Ruata na'ola'a si Hagar naatutukka ringannu masemakka, na'oman sara i tou naasilo sambau paṛṛihi. Ne i tou inaite ana see nalloṛṛateng kua'e supato'a pisi udde, ana see anangnge niapa'inumpe.

²⁰ Ruata uarundinganna si Ismael. Ana'a udde mallannu magewalla, i tou uawanua su wadda'u Paran, wuṛṛu naola'a matataṛṛiasu apandeanne.

²¹ Inangngene nangawingngi tou ringannu sangkatou wawine Mesir.

Paaire su wallati Abraham wuṛṛu i Abimelekh

²² Su tempo udde i Ratu Abimelekh wuṛṛu i Pikhol, tembonannu tantarane, nirumanta ringanni Abraham wuṛṛu nabbisara, “Ruata nantul᷊ungngu sulal᷊ummu al᷊awo'u inolaannu.

²³ Ana waugu udde, passalute isindi su saruannu Ruata, manungku i'o tawe mandal᷊eo si ya'u, ara'e su al᷊aṛṛana'u, ara'e lai su papapulungku. Ere lai inolaangku mapia si'o, pa'ola'a aroddi lai si ya'u wuṛṛu su wanua apan wawanuannu indi.”

²⁴ Unni Abraham, “I ya'u massalu.”

²⁵ Arawe wua'udde i Abraham sinumassili Abimelekh su ola'u sambau paṛṛihi apan buatte niaṛṛo manga allangngu ratu udde.

²⁶ I Abimelekh nabbisara, “I ya'u wagga isai apan buatte na'ola'a inolaanna udde. I'o taambe namasingkattu hatto udde si ya'u, wuṛṛu wakkute passa indi ya'u naaringikka hatto udde.”

²⁷ Ana see i Abraham nangonggollu manambo domba wuṛṛu sapi si Abimelekh, wuṛṛu taumata rarua udde naṛṛiinnu pa'aire.

²⁸ I Abraham naṛṛaeten pitu ana'u domba wuassu ammul᷊annu dombane,

²⁹ wuṛṛu i Abimelekh naiwal᷊o si tou, “Anio olangnge indi niolangngu?”

³⁰ I Abraham sinumimbakka, “Sengkampe pitu ana'u domba indi maola'a sambau tatiala i Tuangnga nanga'ute manungku ete i ya'u apan naal᷊i paṛṛihi indi.”

³¹ Ete aroddi tampa udde nisagote Bersyeba, ana waugu ete su tampa udde itarua nassalu.

³² Napawe itarua buatte nakkiinnu paaire su Bersyeba, i Abimelekh wuṛṛu i Pikhol nabelengke su wanuan taumatan Filistin.

³³ Ana see i Abraham nassuannu sangkalu alu tamariska su Bersyeba wuṛṛu nanattakka orassa udde tampa udde nipaatti tou maola'a pasasubanna Mawu, Ruata sarangkal᷊o'engnge.

³⁴ Wua'udde i Abraham natana'e su wanuan taumatan Filistin.