PANDARIADDI 16 - WUKE SUSI WATTI'U AL᷊AL᷊USASSA

I Hagar wuṛṛu i Ismael

¹ I Sarai, awingngi Abram, taambe lai naasomba ana'a. Arawe i tou pia sangkatou allangnga wuassu Mesir, sangkatou maṛṛuala aranne i Hagar.

² “Mawu tawe mamala'u manungkangngu ana'a. Ana waugu udde, mappianne yo matiilla ringannu allangku indi. Asinungka i tou wotongnge malippassu ana'u.” I Abram niumiren darorongngi Sarai.

³ Etearoddi Sarai nangonggolli Hagar si Abram maola'a awingnge aruane. Tempo udde i Abram mapul᷊ote tonna su Kanaan.

⁴ I Abram natiille ringanni Hagar, ana see wawine udde piate illoṛṛo. Arawe napawe i Hagar naasingkatta manungku i tou piate illoṛṛo, i tou nabbal᷊i mawunga wuṛṛu mangngadio'a si Sarai.

⁵ Ana see i Sarai nabbisara si Abram, “I ya'u buatte nangonggolli Hagar allangku udde si'o, wuṛṛu ro'en i tou naasingkatta manungku i tou piate illoṛṛo, i tou mangngadio'a si ya'u. Udde sal᷊anu. Antimanna Mawu makkawessu hatto indi su wallatti addua.”

⁶ Sasimbakki Abram, “Arodite, i tou allangngu wuṛṛu i'o uaparenta si tou; walate apulunu ma'ola'a si tou.” Ana see i Sarai na'ola'a si Hagar ringannu tumaniten maṛṛagissa, na'oman sara i tou tinumal᷊angngu watanganne.

⁷ Mala'ekattu Mawu naisasomban Hagar maranin al᷊imatan kua'e maranin wadda'u Sur.

⁸ Unnu mala'ekatta udde, “Hagar, allangngi Sarai, i'o wuassuapa wuṛṛu inai watukkuapa?” Sasimbakki Hagar, “I ya'u tinumal᷊angnga wua dinganni Sarai mawu'u.”

⁹ Mala'ekatta udde nabbisara, “Pabelengke ringanni tou wuṛṛu pangimbete si tou.”

¹⁰ Ana see unnu Mala'ekatta udde apia, “I ya'u sarun mangonggola si'o aroddi anambone ana'a wuṛṛu pulunna, ma'oman tawe saran sangkatou lai maareengngi mangitou.

¹¹ Tate mal᷊annu lai i'o sarun mangunsiwen ana'a esakka; saggoa'e i tou i Ismael, ana waugu Mawu buatte nadaringikka lal᷊uainu.

¹² Arawe anangngu udde sarun mabbiakka naal᷊ihidda keledai matengnga; i tou sarun mandoappa al᷊awo'u taumata, wuṛṛu suapan taumata sarun mandoappa si tou. I tou sarun mabbiakka uaṛṛae wuassu anambon tuṛṛangnge.”

¹³ I Hagar naiwal᷊o sulal᷊ummu naungnge, “Atonnawe i ya'u naasilote Ruata apan Mappaddul᷊i si ya'u?” Ne i tou nanagon arannu Mawu, apan buatte nabbisara si tou, “Ruata Apan Nappaddul᷊i”.

¹⁴ Ana waugu udde taumata mannagon paṛṛihi su wallattu Kades wuṛṛu Bered udde, “Paṛṛihin Tou Apan Wiakka Apan Mappadul᷊i si Ya'u”.

¹⁵ Ana see i Hagar nangunsiweten ana'a esakka, wuṛṛu i Abram iamangnge, nanagon ana'a udde i Ismael.

¹⁶ Su tempo udde uukki Abram ual᷊un pul᷊o annumma su tonnane.