PANDARIADDI 10 - WUKE SUSI WATTI'U AL᷊AL᷊USASSA

Papapulunnu al᷊aṛṛana'i Nuh

¹ Ete indi papapulunnu al᷊aṛṛana'i Nuh, eteudde i Sem, i Yafet wuṛṛu i Ham. Napawe buatte nammanawangnga, i mangitou siri tallu naasomba ana'a esakka.

² Al᷊aṛṛana'i Yafet eteudde i Gomer, i Magog, i Madai, i Yawan, i Tubal, i Mesekh wuṛṛu i Tiras.

³ Papapulunni Gomer eteudde tumana'u Askenas, Rifat wuṛṛu Togarma.

⁴ Papapulunni Yawan eteudde tumana'u Elisa, Spanyol, Siprus wuṛṛu Rodes.

⁵ I mangitou yupungngu manga walahanna apan uatana'a su al᷊o'engngu apanne wuṛṛu su manga taṛṛanusa. Eteudde anambon papapulunni Yafet. Suapan walahanna wuṛṛu ṛuanganna apan uatana'a su wanuane sambau-sambau, wuṛṛu uatahuanna manga sasinaukke sassane.

⁶ Al᷊aṛṛana'i Ham eteudde i Kus, i Mesir, i Libia wuṛṛu i Kanaan.

⁷ Papulunni Kus eteudde tumana'u Seba, Hawila, Sabta, Raema wuṛṛu Sabtekha. Papulunni Raema eteudde tumana'u Syeba wuṛṛu Dedan.

⁸ I Kus pia ana'a esakka aranne i Nimrod apan naola'a taumata atohasanne paarorone su runia.

⁹ Ringannu tul᷊ungannu Mawu i tou nabbal᷊i matataṛṛiasu apan apandeanne. Ana waugu udde taumata wiasa nabbiasara, “Antimanna Mawu mandiadi si'o sangkatou matataṛṛiasu apan apandeanne ere i Nimrod.”

¹⁰ Paarorone araratuanne naddatingngu Babel, Erekh wuṛṛu Akad, soa tatallu udde su Babilonia.

¹¹ Wua poiaroddi i tou nabbatukku Asyur, ana see napararisikku soa Niniwe, Rehobot-Ir, Kalah,

¹² wuṛṛu Resen apan addone su wallatu Niniwe wuṛṛu Kalah. Sarangkanambone udde manga soa wahahewalla.

¹³ Pappapulunni Mesir eteudde tumana'u Lidia, Anamim, Lehabim, Naftuhim,

¹⁴ Patrusim, Kasluhim, wuṛṛu Kaftorim. Walahannu Kasluhim eteudde al᷊amonan walahanne Filistin.

¹⁵ Al᷊aṛṛana'i Kanaan, eteudde i Sidon pahul᷊une, wuṛṛu i Het.

¹⁶ I Kanaan lai al᷊amonan balahannu Yebusi, Amori, Girgasi,

¹⁷ taumatan Hewi, Arki, Sini,

¹⁸ Arwaadi, Semari wuṛṛu Hamati. Manga ṛuangannu walahannu Kanaan udde nassal᷊iawukka marau,

¹⁹ na'oman sara manga passarannu wanua i mangitou niatambanna wuassu Sidon watukku timukka mattudan Gerar, maddatingngu maranin Gaza, wuṛṛu watukku ra'i mattudan Sodom, Gomora, Adma wuṛṛu Zeboim, maddatingngu maranin Lasa.

²⁰ Eteudde anambon papapulunni Ham. Suapan walahanna wuṛṛu ṛuanganna uatana'a su wanuan sambau-sambau wuṛṛu pia sasinaukke sassane.

²¹ I Sem, iaangngi Yafet, eteudde al᷊amonan walahannu Ibrani.

²² Al᷊aṛṛana'i Sem eteudde i Elam, i Asyur, i Arpakhsad, i Lud wuṛṛu i Aram.

²³ Papapulunni Aram eteudde tumana'u Us, Hul, Geter wuṛṛu Mas.

²⁴ I Arpakhsad yamangngi Selah. Wuṛṛu i Selah yamangngi Eber.

²⁵ I Eber pia ana esakka ruan katou; iapa pahul᷊une aranne i Peleg ana waugu su tempone, manga walahanna su runia natahia; iapa aruane aranne i Yoktan.

²⁶ Papapulunni Yoktan eteudde tumana'u Almodad, Selef, Hazar-Mawet wuṛṛu Yerah,

²⁷ Hadoram, Uzal, Dikla, Obal, Abimael, Syeba,

^28-29 Ofir, Hawila wuṛṛu Yobab. Sarangkanambone udde papapulunni Yoktan.

³⁰ Leta'a atatanaanni mangitou niatambanna wuassu Mesa watukku Sefar, eteudde panenteanna su samba'an da'i.

³¹ Eteudde anambon papapulunni Sem. Suapan balahanna wuṛṛu ṛuanganna utana'a su wanuane sambau-sambau ringannu uatahuanna sasinaukke sassane.

³² Sarangkanambone udde papapulunni Nuh, balahanna sansunannu walahanna, tumuṛṛuttu akkitu papapulunni mangitou sambau-sambau. Ete i mangitou nanossokku manga walahanna su runia indi napawe wua nammanawangnga wahewa udde.