NEHEMIA 8 - WUKE SUSI WATTI'U AL᷊AL᷊USASSA

I Ezra nabbasan Tita su tumanangnge

¹ Su wul᷊anna appitune taumatan Israel namanuate su soane sambau-sambau. Su allo paarorone wul᷊anna udde i mangitou sarangkanambone naammulla su Yerusalem, su rallakka su saruannu Ngara Wahewallu Ua'e. I mangitou maddorongnga tadea Buke Tita al᷊apanni Imam Ezra, sangkatou mapapande sulal᷊ummu Tita apan nionggollu Mawu su Israel wuassi Musa.

² Ana see Ezra nangapiddu buke udde su saruannu ammul᷊annu esakka, wawine wuṛṛu al᷊aṛṛana'a saṛṛentumuwo tadea'u maasunna.

³ Wua'udde, wuassu ruaallo naddatingngu allattune, Ezra mabbasan Tita udde si mangitou. I mangitou sarangkanambone maddaringikka ringannu maaddunna.

⁴ Ezra dirumarisikka su mimbare alu apan buatte niola'a hunan ammul᷊anna udde. Su samba'a aikkatanne uarisikka manga taumata indi; Matica, Sema, Anaya, Uria, Hilkia wuṛṛu Maaseya; wuṛṛu su samba'a aiṛṛine uarisikka; Pedaya, Misael, Malkia, Hasum, Hasbadana, Zakharia wuṛṛu Mesulam.

⁵ Panggunga tampa dararisiṛṛanni Ezra mattaggaṛṛanna wuassu manga taumata udde, na'oman sara i mangitou sarangkanambone wotongnge maasilo si tou. I tou lapiddu nalla'e buke udde, i mangitou sarangkanambone dirumarisikka.

⁶ Ezra nabbisara, “Paddalote Mawu, Ruata apan wahewalla!” Anambon tumanangnge namatten lima matangga-tanggakka wuṛṛu sinumimbakka, “Amin, amin!” Ana see i mangitou niumal᷊intudda nassubba Ruata.

⁷ Wua'udde i mangitou nabbuatta wuṛṛu dirumarisikka su tampane sambau-sambau, tantal᷊anna anambon taumatan Lewi mannalaan Tita udde si mangitou. Manga taumatan Lewi udde eteudde: Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan wuṛṛu Pelaya.

⁸ I mangitou nanappassu Titan Duata udde wageangnge ringannu wageangnge see nanal᷊a'a na'oman sara tumanangnge naasunna pabbasanna udde.

⁹ Naaringikka pabbawasan Tita udde, tumanangnge nabbal᷊i lembon natuno, ana see nilumuai. Ne gubernure Nehemia wuṛṛu Imam Ezra mapapanden Tita udde, see manga taumatan Lewi apan nanal᷊a'an Tita udde, nabbisara su anambon tumanangnge arendi, “Allo indi allo apan niṛṛae su Mawu Ruatanu, nariaddi arie masusa ara'e lumuai.

¹⁰ Orassa indi apul᷊ete; ante wuṛṛu pa'inumpe ringannu lullala'a. Onggol᷊a'e sambageanganna wuassu anna wuṛṛu anggorenu si mangitou apan awussa. Allo indi allo apan niṛṛae su Mawu kite, nariaddi arie paasusa. Al᷊al᷊uassa apan nionggollu Mawu si yamiu sarun manohassa si yamiu.”

¹¹ Manga taumatan Lewi lai napatammuddu tumanangnge wuṛṛu nabbisara masokka-sokka, “Arie masusa su allo apan buatte niṛṛae indi.”

¹² Ne anambon tumanangnge napul᷊ete inai umanna wuṛṛu ma'inumma see mattahia anna su manga taumata waine. I mangitou lullala'a ana waugu nasunnate atappasannu pabbasanna apan niaringiṛṛanna mangitou udde.

Andeangngu Rasannu Rongnga

¹³ Tiṛṛabbine naammulle anambon tembonannu ṛuanganna, manga imam wuṛṛu manga taumatan Lewi, ana see inaite ringanni Ezra tadea'u mangurumma manga al᷊aṛṛa'u Titan Mawu.

¹⁴ I mangitou naasangkalla sulal᷊ummu Tita apan nionggollu Mawu si Musa, Mawu nandolokku umattu Israel matana'a sulal᷊ummu manga rasanna addio'a su al᷊annune andeangngu Rasannu Roangnga.

¹⁵ Ana waugu udde su ahewallu Yerusalem su manga soa wuṛṛu su manga ampungnga, i mangitou nangal᷊iata parenta indi, “Roote watukku panenteanna wuṛṛu panganute manga rannan alu cemara, zaitun, punnu alu lana, palma wuṛṛu manga alu waine ipa'ola'a rasanna uasul᷊ungngu atoranna sulal᷊ummu Wuken Tita.”

¹⁶ Ana see tumanangnge inaite nanganu manga ranna udde. I mangitou sarangkanambone na'ola'a manga rasanna su manga atuppa ratakke su wowom wal᷊en mangitou, su rallakku wal᷊ene, su saruannu rallakku Wal᷊en Mawu, su lapanganna maranin Ngara Wahewallu Efraim.

¹⁷ Anambon tumanangnge apan napul᷊ete wuassu pamamuanganna udde na'ola'a manga rasanna udde, ana see natana'e isudde. Eteindi paarorone olangnge udde nilaghu ro'en tempon Yosua ana'i Nun, ne sarangkanambone mal᷊uassa wuṛṛu lullala'a.

¹⁸ Pitu allo al᷊annune i mangitou maandeangnga. Miallo-miallo manga wageangngu buke Titan Duata niwasan Ezra. Su allo aual᷊une niola'a lal᷊aghu panguddusanne, uasul᷊ungngu atorannu Tita.