NEHEMIA 6 - WUKE SUSI WATTI'U AL᷊AL᷊USASSA

Ammul᷊anna lumawangnga si Nehemia

¹ Sanbalat, Tobia, Gesyem wuṛṛu manga seetti yami apan waine naaringikka manungku i yami nuddusse nangapia darandungnga, wuṛṛu manungku anambon loṛṛangnge buatte nisappinganna, salaiwe sutempo udde i yami taambe nangelen pappallu ngara su manga ngara wahewallu soa.

² Ne Sanbalat wuṛṛu Gesyem nangirimmu wawal᷊o si ya'u tadea'u rumanta ma'ola'a ammul᷊anna ringanni mangitou suwallattu sambau ampungnga su Wawal᷊annu Ono. Arawe i ya'u masingkatta manungku i mangitou mappulu manilaka si ya'u.

³ Ana waugu udde i ya'u nangirimmu sasimbakke indi si mangitou, “I ya'u tawe maaranta ana waugu tantal᷊anna ma'ola'a manara ahunanne. Manara udde sarun mattaalla amungkangngu i ya'u manantangnga ana inai maisasomban kamiu.”

⁴ Na'oman sara paappatta i mangitou mangngirimmu wawal᷊o apan uasul᷊ungnga si ya'u, wuṛṛu masokka lai i ya'u nangonggollu sasimbakke apan uasul᷊ungnga.

⁵ Su al᷊imane sangkatou daroloṛṛanni Sanbalat nirumanta wuṛṛu nangonggollu suratta wawuanna;

⁶ tingikke arendi: “Gesyem namasingkatta ringannu atonna su ola'u watti'a sulal᷊ummu manga walahanna su al᷊indonganna isindi, apan mabbisara manungku Tuṛṛangnga wuṛṛu anambon taumatan Yahudi manggol᷊agu pangalo, wuṛṛu ana waugu udde Tuṛṛangnga mangngapia darandungngu soa. I tou nabbisara lai manungku Tuṛṛangnga mappandumma manenegu watanganne maola'a ratun Yehuda,

⁷ wuṛṛu buatte nanta'en manga pira nabi iapatenegu Tuṛṛangnga su Yerusalem. Manga watti'a udde sarun aringiṛṛannu ratu. Ana waugu udde, rantate maggahatton olangnge udee.”

⁸ Arawe i ya'u nangirimmu sasimbakke indi, “Sarangkanambone apan niwisaran Tuṛṛangnga udde awusu wuṛṛu tumba'u wawahian Tuṛṛangnga sassane.”

⁹ I mangitou maananamma mammata'utta si yami tadea'u i yami mangillol᷊o manara udde. I ya'u niumal᷊iomanna, “Oh Ruata, tohassawe i ya'u!”

¹⁰ Su orassa udde lai, i ya'u inaite watukku wal᷊en Semaya ana'i Delaya wuṛṛu pulunni Mehetabeel, ana waugu i tou tawe naaranta ringangku. Wisarane si ya'u, “Wette iaaddua inaite ma'imbuni si Wal᷊en Mawu. Iṛṛuudi addua anambon ngarane, ana waugu pia taumata apan mappandumma mamate si'o. Asinungka ṛabbi indi i'o sarun pateanna.”

¹¹ Arawe i ya'u sinumimbakka, “I ya'u indi wal᷊ine taumata apan apulune tuttal᷊angngu watanganne. Ere sangkatou taumata wiasa i ya'u tawe wotongnge sumutta su Wal᷊en Mawu, takkudde i ya'u mate. Tawe, i ya'u maddiri!”

¹² Napawe i ya'u maṛṛingiddu olangnge udde, i ya'u naatutukke manungku aahen Semaya udde waline wuassu Ruata, ewe'e wuassi Tobia wuṛṛu Sanbalat. I mangitou buatte nanorokka si Semaya mamasingkattu papatta udde si ya'u.

¹³ Pandumanni mangitou eteudde tadea'u i ya'u mata'utta wuṛṛu maddaringikka tatantiron mangitou ma'oman sara ma'ola'a rosa. Ringannu aroddi i mangitou maasomba tempone mandal᷊eo arangku ma'oman sara i ya'u maola'a ipagahatton taumata.

¹⁴ I ya'u niumal᷊iomanna, “Oh Ruata, naungewe apa apan niola'i Tobia wuṛṛu Sanbalat udde. Ṛuumana'e itarua! Aroddi lai manga nabi wawine aranne Noaja wuṛṛu manga nabi waine apan apulune mammata'utta si ya'u.”

Pandararisikku darandungnga nuddusse

¹⁵ Pangangapia darandungnga udde niumanna tempo al᷊annune 52 su allone, wuṛṛu nasue su allo darua pul᷊o l᷊ima wul᷊anna Elul.

¹⁶ Sutempo manga seetti yami suwallattu manga walahanna maranine isudde naaringikka olangnge udde, i mangitou matta'utta awul᷊iannu hati, ana waugu anambon taumata masingkatta manungku manara udde niola'a ringannu tul᷊ungannu Ruata.

¹⁷ Tantal᷊anna udde manga piaṛṛa'u Yahudi ta'e lai mangirimmu suratta si Tobia.

¹⁸ Manambo taumatan Yahudi naggawen Tobia, ana waugu i tou mananambo Sekhanya ana'i Arah. See lai Yohanan, ana'i Tobia, naawingngu wawine ana'i Mesulam ana'i Berekhya.

¹⁹ Salaiwe i Tobia sidutu mammoṛṛettu suratta si ya'u ipammata'utta si ya'u, arawe manga piaṛṛa'u Yahudi udde mammasingkatta su saruangku al᷊awo'u apapian Tobia. Wal᷊ine wua'udde sarangkanambone apan ta'u niwisara, nialaen mangitou si tou.