NEHEMIA 5 - WUKE SUSI WATTI'U AL᷊AL᷊USASSA

I Nehemia nantul᷊ungngu taumata asiangnga

¹ Manga pira tempo wua'udde manambo taumatan Yahudi, mawae esakka aroddi lai wawine, mannattakke suussal᷊iomanna su ola'u manga taumata sambalahanne.

² Piaddu apan mabbisara, “Ana'u manambo. I yami mappandumma gandumma ipabbiakka.”

³ Piaddu lai mabbisara, “I ya'u ringannu nipabbawata'a nanggadden wailla, waillu anggore wuṛṛu wal᷊en kami ipamalli gandumma tadea'u tawe mate amal᷊unusanna.”

⁴ Wuṛṛu piaddu lai mabbisara, “I yami buatte nabballassa roitta nipamaekka wose apan nitantunnu ratu wawaekku wawail᷊anna wuṛṛu waillu anggori yami.

⁵ Wal᷊inewe i yami lai taumatan Yahudi? Wal᷊inewe ana'i yami nassul᷊ungngu manga ana'u Yahudi waine? Salaiwe aroddi i yami nipabbawata'a namalan manga ana'i yami naola'a allangnga. Ewe'e lai pia ana'a maṛṛualan kami apan buatte niwal᷊u'a maola'a allangnga. I yami tate maal᷊ore ana waugu wawail᷊anna wuṛṛu waillu anggori yami buatte nihadde.”

⁶ Naaringikka sasal᷊iomanni mangitou udde, i ya'u mangke nasa'u

⁷ wuṛṛu nakkawaessa manungku manamba'a si mangitou. Ana see i ya'u nanaggu tembonanne wuṛṛu piaṛṛa'u tumana'a. Wisara'u, “I yamiu mangngallangnga manga tuṛṛangngu sassane!” Wua'udde i ya'u na'ola'a ammul᷊annu awadaalla ipangagassa hatto udde,

⁸ wuṛṛu nabbisara, “Ringannu ahewallu ikkatta i ite buatte namaekka manga tuṛṛangngi ite taumatan Yahudi apan nal᷊are nabbalu'u watanganne maola'a allangngu taumata raho. Arawe orassa indi i yamiu ewe'e lai mammata'i mangitou mabbal᷊u'u watanganne si yamiu, sumbal᷊i i yamiu lai taumatan Yahudi!” Manga piaṛṛa'u udde tawe naasimbakka saran sampaddi wisara.

⁹ Ana see i ya'u nabbisara apia, “Inolaannu udde lal᷊eo! Ṛinone i yamiu mabbiakka ringannu matta'uttu Ruata. Ringannu aroddi seetti ite apan tawe mawune udde tawe onggol᷊anni yamiu tempone mallobossa si ite.

¹⁰ I ya'u sassane, manga tuṛṛangku wuṛṛu manga hawe'u buatte napawallassu roitta wuṛṛu gandumma su tumana'a. I yami tate maddorongnga apia.

¹¹ Ṛinone i yamiu lai mamappassa manga awallassu tumana'a si yamiu udde, mawae roitta ara'e gandumma, ara'e anggore ara'e lai lanan zaitun. Pawelenga'e ringannu mal᷊ihakka wawail᷊anna, waillu anggore, waillu zaitun wuṛṛu wal᷊en mangitou!”

¹² Manga piaṛṛa'a udde sinumibakka, “Tatantiro udde sarun iamatti yami. I yamiu sarun mangule sarangkanambone wuṛṛu tawe maddorongnga wawaekke saran addio'a wuassi mangitou.” Ana see i ya'u namaggo manga imam wuṛṛu ta'u nirolokka manga piaṛṛa'a tanginna massalu su saruannu manga imam udde, manungku apa apan buatte niwisaran mangitou udde, atonna-tonna sarun iapaamatti mangitou.

¹³ Wua'udde i ya'u namu'a selempanga su tapanna'u ana see ta'u nialabba lapiddu nabbisara, “Etearendi rinone Ruata mamaṛṛassa anambon taumata apan tawe manuungngu paairene. Taumata udde sarun mabbal᷊i masusa, wal᷊en wuṛṛu anambon darotongnge sarun ul᷊eannu Ruata!” Anambon ammul᷊anna sinumibakka, “Amin!” ana see naddalote Mawu. Ne manga piaṛṛa'a udde nanuungngu paairen mangitou.

I Nehemia naungnge masaṛṛionto'a

¹⁴ I ya'u naola'e gubernuren Yehuda mapul᷊o dua su tonnane al᷊annune, eteudde nanattakka wuassu tonna darua pul᷊o naddatingngu tonna tatallu pul᷊o dua pamamarentan Ratu Artahsasta. Su al᷊annune tempo udde i ya'u wuṛṛu manga tuṛṛangku tawe saran paassa nanganu haddi'u ere sangkatou gubernure.

¹⁵ Manga gubernure dorone wuassia'u, buatte naola'a winabbawan tumanangnge na'oman sara i mangitou maddorongnga 40 roitta sal᷊a'a massallo hunan anna wuṛṛu anggore. Ewe'e lai manga mamanaran mangitou mangngallangnga tumanangnge. Arawe i ya'u maddiri ma'ola'a aroddi ana waugu i ya'u matta'uttu Ruata.

¹⁶ Anambon ikka'u ta'u nipaatta su pangangapia darandungnga wuṛṛu i ya'u tawe naasomba leta'a saran sampattangnga maola'a wawaekke, salaiwe anambon masasumbala'u mammanara suadio'a su manara udde.

¹⁷ Maṛṛasutta liman pul᷊o su atoune taumatan Yahudi wuṛṛu manga tembonanni mangitou inanaramanne ta'u a'imbeanna su wal᷊e'u, taambe nireengnga manga raho wuassu manga walahanna uaal᷊indonganni yami.

¹⁸ Miallo-miallo i ya'u mannaddia ringannu roi'u sassane sambau sapi, annumma domba apan matawa wuṛṛu manambo manu'a. Wal᷊ine wua'udde lai, suapan mapul᷊o allo i ya'u mannuungngu saddian anggore. Salaiwe aroddi i ya'u maddiri maddorongnga haddi manaran gubernure, ana waugu i ya'u masingkatta winabbawan tumana'a tumaniten mawakkatta.

¹⁹ I ya'u sumal᷊ande oh Ruata, naungete sarangkanambone apan buatte ta'u niola'a su walahanna indi wuṛṛu al᷊amatewe i ya'u.