NEHEMIA 4 - WUKE SUSI WATTI'U AL᷊AL᷊USASSA

I Nehemia sinumaruanna seettu taumatan Yahudi

¹ Sutempo Sanbalat naaringikka manungku i yami taumatan Yahudi tantal᷊anna mangngapia darandungngu soa, i tou nabbal᷊i massa'u atonna wuṛṛu mannattakke mallobbossa si yami.

² Su saruannu manga hawene wuṛṛu tantaran Samaria, i tou nabbisara, “Apa apan tantal᷊anna mammanarannu taumatan Yahudi silaka apan tawe maal᷊ore udde? Apa i mangitou mappulu mapararisikku soa indi apia? Sunnan mangitou manara udde wotongnge masue sulal᷊ummu allo massallo, tumba'u ringannu mangngonggollu sasamba? Apa ombon sapadda apan nepodde udde wotongnge olaanni mangitou manga watun darandungnga?”

³ Ana see Tobia apan uarisikka su sandiṛṛanne nabbisara lai, “Pa'ellege darandungnga apan niapararisikki mangitou! Asun ahuranganna lai wotongnge maṛṛa'an darandungnga udde!”

⁴ Ne i ya'u niumal᷊iomante, “Oh Ruata, daringiṛṛewe ereapa i yami lallobbosanna! Lal᷊obbossa udde antimanna maṛṛia'a si mangitou sassane. Wala'e al᷊awo'u darotongngi mangitou aṛṛoanna wuṛṛu i mangitou sassane ṛuwoanna maola'a tawananna watukku wanua waine.

⁵ Arie mangampungnga pasasal᷊an mangitou wuṛṛu arie mangampunga rosan mangitou, ana waugu i mangitou buatte nallobbossa si yami apan tantal᷊anna mammanara indi.”

⁶ Tantal᷊anna udde i yami sidutu mangngapia darandungnga udde, wuṛṛu tawe nal᷊annu ahewallu darandungnga udde nasue niola'a na'oman sara mattangnga atanggakke, ana waugu tumana'a mammanara ringannu naungnga wahewalla.

⁷ Sutempo Sanbalat, Tobia wuṛṛu manga taumata wuassu Amon wuṛṛu Asdod see manga taumatan Arab naaringikka manungku pangangapia darandungngu Yerusalem udde aatambanna wuṛṛu manungku manga loṛṛangnga su darandungnga udde niasappingante, i mangitou mangke nasa'u atonna.

⁸ I mangitou nabbaidda inai mamangalo Yerusalem wuṛṛu mapal᷊apputtu aal᷊iba'ukka.

⁹ Ana waugu udde i yami niumal᷊iomanna su Ruatan kami wuṛṛu mallu'adda soa udde alo ṛabbi.

¹⁰ Arawe taumatan Yehuda mannattakke mangngantari antari sasal᷊ande indi; “Ikkatti ite nasuete pinamasanna luranna, arawe sapadda ta'e manambo ua'ombo. Pendamanna i ite tawe maapammanara arendi mapararisikku darandungngu soa indi.”

¹¹ Tantal᷊anna udde seetti yami manggol᷊aga mamangalo si yami ringannu mamaṛṛindu'a, ana see mamate si yami tadea'u manaran kami mattaalla.

¹² Arawe taumatan Yahudi apan uatana'a maranin mangitou, masokka rumanta ringanni yami mamasingkattu rihinu seetta udde.

¹³ Ana waugu udde i ya'u nattahia hal᷊ele, sambeangnga wuṛṛu anaanna su tumana'a, ana see i mangitou ta'u nitahia tumuṛṛuttu ṛuanganne sambau-sambau su liuddu darandungnga, su manga tampa apan taambe nasue niola'a.

¹⁴ Sutempo i ya'u naasilo manungku tumana'a matta'utta, i ya'u nabbisara si mangitou wuṛṛu manga tembonanne see manga piaṛṛa'a, “Arie pa'ata'uttu seetta! Naungete Mawu apan matohassa wuṛṛu masiṛṛungnga, wuṛṛu panahekke hunan manga tuṛṛangngu, manga ana'a, awingngu wuṛṛu wal᷊enu!”

¹⁵ Manga seetti yami naaringikka manungku ṛunni mangitou buatte niasingkatanni yami. Ne i mangitou naatutukke manungku Ruata nanal᷊are runni mangitou udde. Wua'udde i yami sarangkanambone nabbelengke mammanara mangngapia darandungnga udde.

¹⁶ Arawe nanattakka allo udde tumba'u sambageanganna wuassu mamanara'u apan mammanara, wuṛṛu sambageanganna lai uriagga ringannu ual᷊uṛṛen laubbu pangalo ringannu ahidda sambeangnga, allungnga wuṛṛu anaanna. Manga piaṛṛa'u tumana'a nangonggollu sasumbala su tumanangnge

¹⁷ apan tantal᷊anna mangngapia darandungnga udde. Manga mamamasanna aola'u darandungnga mammanara manara udde ringannu lima samba'a, wuṛṛu lima samba'a uaaggassa ahidda.

¹⁸ Manga mamamanara meselle mammanara ringannu hal᷊ele uapeta su lawassa. Mananiuppa trompeta tatialan asasilaka, sidutu su sandiṛṛangku.

¹⁹ Ana see i ya'u nabbisara su tumana'a, manga tembonanne wuṛṛu manga piaṛṛa'a, “Manara indi nahewalle sara marau, na'oman sara i ite uasal᷊iawukka su al᷊o'engngu darandungnga indi, sangkatou marau wuassu waine.

²⁰ Nariaddi, amungkangngu i yamiu maaringikka tingikku trompeta, paal᷊ihakke maammulla ringanni yami isindi. Ruatan kite sarun mapapangalo mangambangnga si ite.”

²¹ Etearoddi i yami mammanara manattakka wuassu wewennallo maddatingngu manga anumpitanna aasiloanna su langitta. Matangnga wuassu tumana'a mangngapia darandunga, wuṛṛu ingana'a waine uariagga ringannu sambeangnga su lima.

²² Su al᷊o'engngu tempo udde anambon mamanara ringannu masasumbala mangitou, ta'u nirolokka manaṛṛabbi su Yerusalem. Ringannu aroddi sutempo ṛabbi i yami wotongnge mandiagga soa wuṛṛu allone mangngapia darandungnga.

²³ I ya'u sassane, manga hawe'u, manga mamanara'u wuṛṛu manga mandariagga'u sidutu ual᷊uṛṛen laubu manara, mawae allo lai ṛabbi. I yami sidutu sulal᷊ummu olangnge uatehamma, ringannu ahidda su lima.