NEHEMIA 3 - WUKE SUSI WATTI'U AL᷊AL᷊USASSA

Pangangapia darandungngu Yerusalem

¹ Eteindi papasingkatta su ola'u ereapa darandungngu so Yerusalem niola'a apia. Imam Wahewalla Elyasib wuṛṛu manga hawene na'ola'a apia Ngara Wahewalla Domba, nandeettu manga pappallu ngara wuṛṛu niṛṛae humam Mawu. I mangitou nangapia wuṛṛu naṛṛaen darandungnga naddatingngu Candi Hananeel.

^2-16 Wal᷊ine lai wuassu manga imam udde, manga taumata indi nangapia manga darandungngu soa see manga ngara wahewalla wuṛṛu manga candine sulal᷊umu tal᷊attadde manansunna; Manga taumatan Yerikho, Zakur ana'i Imri Ṛuanganni Senaa: Ngara Wahewallu Inassa ringannu manga sal᷊aba'u, pappallu ngara, manga boutta wuṛṛu manga wawarene. Meremot ana'i Uria wuṛṛu pulunni Hakos. Mesulam ana'i Berekhya wuṛṛu pulunni Mesezabeel. Zadok ana'i Baana Tumana'u soa Tekoa (manga matatimmaddu soa udde maddiri mammanara manara mawakkatta). Yoyada ana'i Paseah wuṛṛu Mesulam ana'i Besoja: Ngara Wahewalla Yesyana ringannu manga sal᷊aba'u, pappallu ngara, manga boutta wuṛṛu manga wawarene. Melaca wuassu Gibeon wuṛṛu Yadon wuassu Meronot. Manga taumatan Gibeon wuṛṛu manga taumatan Mizpa: darandungnga maddatingngu wal᷊en gubernuren Efrat Waṛṛatta. Uziel, sangkatou panden bul᷊awannea, ana'i Harhaya. Hananya, sangkatou maaola'a lana mawangngi; maddatingngu Darandungnga Mal᷊alakka. Refaya ana'i Hur, tembonannu Yerusalem sambageanganna. Yedaya ana'i Harumaf: darandungnga apan maranin wal᷊ene sassane. Hatus ana'i Hasabneya Malkia ana'i Harim wuṛṛu Hasub ana'i Pahat-Moab; darandungnga manansunna see Candi Papputunganna. Salum ana'i Halohes, tembonannu Yerusalem sambageanganna, sasumbalannu manga anangnge wawine. Hanun wuṛṛu tumana'u Zanoah: Bagara Wahewallu Wawaal᷊anna see manga pappallu ngara, manga boutta wuṛṛu manga wawarene. Wuṛṛu lai darandungnga al᷊o'engnge 440 metere maddatingngu Ngara Wahewallu Sapadda. Malkia ana'i Rekhab, tembonannu distrik Bet-Kerem: Ngara Wahewallu Sapadda ringannu pappallu manga ngara, manga boutta wuṛṛu manga wawarene. Salum ana'i Kolhoze tembonannu wageangngu Mizpa; Ngara Mal᷊eangnga Al᷊imatang Ua'e ringannu atuppa, manga pappalu ngara, manga pasa'a wuṛṛu sal᷊aba'u wawarane. See lai darandungngu Li'un Selah maranin waillu wal᷊en araratuanna maddatingngu manga tuadda apan sumossokka wuassu Soan Daud. Nehemia ana'i Azbuk, darandungnga maddatingngu lal᷊abbingannu amonanni Daud, li'u apan niola'a wuṛṛu tampan tantara.

Manga taumatan Lewi apan tinumol᷊e nangapia darandungnga

^17-21 Manga pira wageangngu darandungnga manansunna niola'u manga taumatan Lewi sulal᷊ummu tal᷊attadde indi: Rehum ana'i Bani Hasabya, tembonannu sambageangannu Distrik Kehila. Wageangngu darandungnga su letangnge sassane. Binui ana'i Henadad, tembonannu sambageangannu Distrik Kehila. Ezer ana'i Yesua, tembonannu Mizpa: darandungnga su pabbuuannu lal᷊anna su saruannu gudangngu lutangnga. Barukh ana'i Zabai: darandungnga wuassu pabbuuannu lal᷊anna maddatingngu lal᷊anna ngaran bal᷊e Imam Wahewalla Elyasib. Meremot ana'i Uria wuṛṛu pulunni Hakos: wageangngu darandungnga wuassu ngaran bal᷊e Elyasib maddatingngu pondollu wal᷊en udde.

Manga imam apan tinumol᷊e nangapia darandungnga

^22-26 Manga pira wageangngu darandungnga manansunna niola'u manga imam sulal᷊ummu tal᷊attadde indi: Manga imam apan uatana'a tawe marau wuassu Yerusalem. I Benyamin wuṛṛu Hasub: darandungnga su saruannu wal᷊en mangitou. I Azarya ana'i Maaseya ana'i Ananya; darandungnga maranin wal᷊ene. Binui ana'i Hanadad: darandungnga wuassu wal᷊en Azariah maddatingngu pabbuuannu darandungnga. Palal ana'i Uzai: darandungnga wuassu pabbuannu darandungnga wuṛṛu candi wal᷊en araratuanna al᷊iu rosone, maranin rallaka pandiagganna. Pedaya ana'i Paros: darandungnga maddatingngu saruannu Ngara Wahewallu Ua'e su samba'a ra'i wuṛṛu candi pandiagganna Wal᷊en Mawu. (Tawe marau wua isudde pia wageangngu leta'a aranne i Ofel, tampa atatanaannu manga mamanaran Wal᷊en Mawu.)

Manga mamanara waine

^27-32 Manga pira wageangngu darandungnga manansunna niola'u manga taumata indi sulal᷊ummu tal᷊atadde ere manansunna indi: Tumana'u soa Tekoa: darandungnga wuassu saruannu candi pandariagganna Wal᷊en Mawu maddatingngu darandungnga su wageangngu leta'u Ofel. Manga imam apan uatana'a maranin Ngara Wahewallu Awal᷊o: darandungnga apan uasaruanna wal᷊en sangkatou-sangkatou wuassu ngara wahewalla udde masal᷊a watukku sawannakka. Zadok ana'i Imer: darandungnga apan uasaruanna wal᷊ene. Semaya ana'i Sekhanya, mandariagga ngara Wahewallu Ra'i: darandungnga apan uasasaruannu wal᷊ene. Hananya ana'i Selemya wuṛṛu Hanun ana'i Zalaf apan aiannumme. Mesulam ana'i Berekhya: darandungnga apan uasasaruannu wal᷊ene. Malkia, sangkatou mapapanden bul᷊awanna: darandungnga maddatingngu wal᷊en manga mamanaran Wal᷊en Mawu wuṛṛu manga sal᷊en manga maddaraganga su saruannu Ngara Wahewallu Mifkad wuṛṛu maddatingngu marani wabbo'a al᷊iu rosone su pabbuuannu darandungnga samba'a lawassiitta. Manga mapapanden bul᷊awanna wuṛṛu maddaraganga: wageangngu darandungnga apan panginsueanne, manattakka waussu wabbo'a al᷊iu rosone su pabbuannu darandunga maddatingngu Ngara Wahewallu Domba.