NEHEMIA 13 - WUKE SUSI WATTI'U AL᷊AL᷊USASSA

Israel naṛṛaen batanganne wuassu taumata raho

¹ Sutempo titan Musa niwasa su tumana'a, nisombangante tal᷊aane indi: ‘Taumatan Amon wuṛṛu Moab mangke imbaṛṛangnga maammullu umattu Ruata;

² ana waugu sutempo walahannu Israel sulal᷊ummu amatanna sinumabbangnga wuassu Mesir, walahanna darua udde tawe nangonggollu anna wuṛṛu ua'e su walahanna udde. Ewe'e lai i mangitou nanewa si Bileam niapawontoga walahannu Israel, arawe Ruatan kite buatte namal᷊u wawontoga udde nabbal᷊i al᷊amatta.’

³ Sutempo walahannu Israel naaringikka udde, i mangitou nattingkaṛṛae anambon taumata raho wuassu tumana'u Israel.

Manga pallal᷊imbakku apan niola'i Nehemia

⁴ Tantal᷊anna wua'udde Imam Elyasib, apan niapamanara mallu'adda manga wabbo'an bal᷊unna su Wal᷊en Mawu, pia paa'aukka mapia ringanni Tobia.

⁵ Elyasib nangonggolla si Tobia sambau wabbo'a wahewalla apan ṛinone nisaddia hunan panahipunanna sasamba gandumma, amania, manga mananalangnga musikka wuṛṛu mandariaga ngara wahewallu Wal᷊en Mawu.

⁶ Napawe olangnge udde nariaddi, i ya'u tawe baddi'a su Yerusalem, ana waugu su tonna tatallun pul᷊o dua pamamarentan Artahsasta, ratun Babel, i ya'u inaite watukku Babel, i ya'u nanu su Babel tadea'u mamasingkatta su ratu. Manga pira tempo wua'udde i ya'u niwala

⁷ mabbelengnga watukku Yerusalem. Napawe na'omate isindi, i ya'u niṛṛumoro naasingkatta manungku Elyasib buatte nangonggolla si Tobia sambau wabbo'a su Wal᷊en Mawu.

⁸ I ya'u nasa'u atonna wuṛṛu nanuntungnga watukku liudde anambon saranapan Tobia.

⁹ Wua'udde i ya'u nandolokka tadea'u olaanna lal᷊aghu pamamaresi manga wabbo'a udde. Wua'udde i ya'u namelengnga isudde alawo'u sasamba gandumma wuṛṛu amania see manga saranapan Wal᷊en Mawu.

¹⁰ Wua'udde, i ya'u naasangkalla manungku manga mananalangnga musikka wuṛṛu manga taumatan Lewi buatte nanantangngu Yerusalem wuṛṛu nabbelengnga watukku wawail᷊anne sambau-sambau, ana waugu tumana'a tawe naatipussa hausanni mangitou.

¹¹ Ne i ya'u nanagu manga piaṛṛa'a ana waugu i mangitou buatte namalan Wal᷊en Mawu tawe paddul᷊iananna. Ana see ta'u niwaggoanna apia manga taumatan Lewi wuṛṛu manga mananalangnga musikka udde wuṛṛu ta'u nirolokka mammanara apia.

¹² Wua'udde anambon tumana'u Israel mannattakke apia mangonggollu sepere mapul᷊o gandumma, anggore, wuṛṛu lanan zaitun, ana see nisahipunna su manga wabbo'an bal᷊unna.

¹³ I ya'u napamanaran manga taumata manansunna indi iapal᷊u'adda manga wabbo'an bal᷊unna udde: Imam Selemya, Zadok sangkatou mapapanden Tita wuṛṛu Pedaya sangkatou Lewi, Hanan ana'i Zakur wuṛṛu pulunni Matanya ta'u niapamanara massumbala si mangitou. I ya'u masingkatta manungku manga taumata udde wotongnge apangimananna wuṛṛu sarun mammanara patatahia manga saranapa udde su manga hawene sangkamanaranna ringannu matul᷊idda.

¹⁴ Oh Ruata'u, naungete al᷊awo'a apan buatte ta'u niola'a hunan Wal᷊en-Nu wuṛṛu pangangangimbene.

¹⁵ Sutempo udde i ya'u naasilo manungku su allon Sabat manga pira taumata su Yehuda mammakkan anggore. Pia taumata waine lai apan mallurannu gandumma, anggore, wuan ara wuṛṛu manga saranapa waine su keledaine wuṛṛu niapidde watukku Yerusalem. I mangitou ta'u nisingadda mabbal᷊u'a su Yerusalem.

¹⁶ Manga pira taumata wuassu Tirus apan uatana'a mabbal᷊u'a su Yerusalem uaapiddu inassa wuṛṛu al᷊awo'u hatin saranapan bal᷊u'anna watukku Yerusalem su allon Sabat, tadea'u iwal᷊u'a su manga taumatan Yahudi.

¹⁷ Ta'u tinagguanna manga piaṛṛa'u Yehuda wuṛṛu i ya'u nabbisara, “I yamiu tawe maatutukka lai manungku i yamiu ma'ola'a al᷊al᷊eo ana waugu mandal᷊eo allon Sabat?

¹⁸ Ana waugu ete rosa arendi ne Ruata buatte nakkuumannu iupungngu al᷊amonan kite wuṛṛu nakkimunsa'a soa indi. Apa orassa indi i yamiu mapullu lai manamba asasa'un Duata su Israel ringannu mandal᷊eo allon Sabat?”

¹⁹ Ana waugu udde i ya'u mapaanaungnga tadea'u su panattaṛṛannu suapan allon Sabat, eteudde allo al᷊imane ṛabbi, manga ngara wahewallu soa paal᷊ihakka maṛṛuudda wawallote, wuṛṛu tawe wotongnge wu'anna tantal᷊anna allon Sabat taambe nal᷊iudda, su allo aiannumme ṛabbi. I ya'u nangaddon manga pira taumata'u su manga ngara wahewalla udde iapariagga tadea'u su allon Sabat tawe saranapa wal᷊u'anna apan iapidda sumutta sulal᷊ummu soa.

²⁰ Arawe pattaṛṛaassa manga pira maddaragangnga wuṛṛu mabbawal᷊u'u saranapa mannaṛṛabbi su liudde darandungnga su allo al᷊imane ṛabbi.

²¹ I ya'u nabbisara si mangitou, “Tawe gunane i yamiu maṛṛaddo ma'oman sara marua allo isudde. Paṛṛaddo, amungkangngu i yamiu ma'ola'a udde paassa lai, i ya'u sarun makkuumanni yamiu!” Nanattakka orassa udde i mangitou tate saran paassa rumanta apia su allon Sabat.

²² Wua'udde manga taumatan Lewi ta'u nirolokka mapaamattu lal᷊aghun pamamaresi watanganne wuṛṛu mandiagga manga ngara wahewalla ipallu'adda tadea'u manga taumata mangaddatta allon Sabat. I ya'u niumal᷊iomanna, “Oh Ruata, naungewe i ya'u ana waugu olangnge udde lai, wuṛṛu akkanaawe i ya'u uasul᷊ungngu ringannu darangngu-Nu apan wahewalla.”

²³ Sutempo udde i ya'u naasilo lai manungku manambo taumatan Yahudi buatte naawingngu manga wawine wuassu walahannu Asdod, Amon wuṛṛu Moab.

²⁴ Sambageanganna wuassu manga ana'i mangitou tawe maasunna sasinaukku Yahudi, ewe'e sasinaukku Asdod ara'e walahanna raho waine.

²⁵ Ta'u nitaguanna wuṛṛu ta'u niwontohanna i mangitou. Piaddu ta'u nipuulla wuṛṛu niṛṛahotta utangnge. Wua'udde i mangitou ta'u nirolokka massalu ringannu arannu Ruata manungku i mangitou wuṛṛu al᷊aṛṛana'i mangitou tate maawingnga apia ringannu walahanna waine.

²⁶ Wisara'u, “Wal᷊inewe rosa indi lai niola'i Ratu Salomo? Tawe datu su runia indi apan maggewal᷊anna wuassi tou. Ruata nandangngu si tou wuṛṛu na'ola'a si tou ratu su ahewallu Israel. Salaiwe aroddi i tou buatte nisal᷊o'u manga wawinen balahanna waine tadea'u ma'ola'a rosa.

²⁷ Tumaniten dal᷊eo inolaannu! I yamiu waṛṛani lumawangnga Ruata ringannu maawingngu manga wawine wuassu walahannu raho!”

²⁸ Yoyada uddewe ana'i Imam Bahewa Elyasib, arawe sangkatou wuassu ana'i Yoyada nabbal᷊i manambon Sanbalat wuassu soa Bet-Horon. Ana waugu udde Yoyada ta'u nilimbuaṛṛanna waussu Yerusalem.

²⁹ I ya'u niumal᷊iomanna, “Oh Ruata'u, naungetewe ereapa manga taumata udde nadal᷊eo manaran imam wuṛṛu paaire-Nu ringannu manga imam wuṛṛu manga taumatan Lewi!”

³⁰ Etearoddi ta'u niwaresi walahannu Israel wuassu al᷊awo'u saranapa apan awaganana. Ta'u nitantunna atoranna su manga imam wuṛṛu manga taumatan Lewi, na'oman sara i mangitou sambau-sambau uatahuanna manarane sassane.

³¹ Ta'u niatokka lai tadea'u su manga tempo buatte nitantunna, alu anutungnga hunan sasamba itattambunna wotongnge saddianna wuṛṛu tumana'a wotongnge mangapiddu sasamba hessin pangitinganna apan paarorone. Panginsueanne i ya'u niumal᷊iomanna, “Ruata'u, naungetewe sarangkanambone indi wuṛṛu al᷊amatewe i ya'u.”