NEHEMIA 12 - WUKE SUSI WATTI'U AL᷊AL᷊USASSA

Arannu manga imam wuṛṛu manga taumatan Lewi

¹ Eteindi manga imam wuṛṛu manga taumatan Lewi apan nabbelengnga wuassu pamamuanganna suaddio'a ringanni Zerubabel ana'i Sealtiel wuṛṛu ringanni Imam Bahewa Yesua:

^2-7 Mangan imam: Seraya, Yeremia, Ezra, Amarya, Malukh, Hatus, Sekhanya, Rehum, Meremot, Ido, Ginetoi, Abia, Miyamin, Maaja, Bilga, Semaya, Yoyarib, Yedaya, Salu, Amok, Hilkia, wuṛṛu Yedaya. I mangitou uddewe manga imam tembonanne sutempon Yesua.

⁸ Manga taumatan Lewi: Piaṛṛa'u aantari aadiangkamanna: i Yesua, i Binui, i Kadmiel, i Serebya, i Yehuda wuṛṛu i Matanya.

⁹ Reengannu mangangantari apan mangngantari aantari sasimbakke: Bakbukya, Uni wuṛṛu manga hawene sambawosoanna.

Papapulunni Imam Bahewa Yesua

¹⁰ Ete indi akkittu papapulunni Imam Bahewa Yesua: i Yesua, i Yoyakim, i Elyasib, i Yoyada,

¹¹ i Yonatan, i Yadua.

Manga imam tembonane

^12-21 Ete indi arannu manga imam tembonanne ringannu wawosoanni mangitou sutempo i Yoyakim mammanara naola'a Imam Bahewa: Imam Kaum Meraya Seraya Hananya Yeremia Mesulam Ezra Yohanan Amarya Yonatan Melikhu Yusuf Sebanya Adna Harim Helkai Merayot Zakharia Ido Mesulam Gineton Zikhri Abia ..... Minyamin Piltai Moaja Samua Bilga Yonatan Semaya Matnai Yoyarib Uzi Yedaya Kalai Salai Heber Amok Hasabya Hilkia Netaneel Yedaya

Imam Kaum Woṛṛetta su ola'u manga amonannu imam wuṛṛu manga taumatan Lewi

²² Aranna su ola'u tembonannu amonannu taumatan Lewi wuṛṛu amonannu imam buatte niwoṛṛetta sutempo manga Imam Bahewa manansunna indi: Elyasib, Yoyada, Yohanan wuṛṛu Yadua. Woṛṛetta udde nasue sutempo Darius uaparenta naola'a Persia.

²³ Arawe su ola'u manga tembonannu amonannu wawosoanni Lewi tumba'u nawoṛṛetta sutempon Yonatan pulunni Elyasib.

Patatahia manara su Wal᷊en Mawu

²⁴ Su al᷊ungngu piaṛṛa'u Hasabya, Serebya, Yesua, Binui wuṛṛu Kadmiel, manga taumatan Lewi nitahia sulal᷊ummu manga wageangnge. Suapan paassa pia darua wageangnge apan mammanara maddalo Mawu wuṛṛu mangngonggollu aadiangkamanna si Tou uawawal᷊issa, uasul᷊ungngu atoranni Ratu Daud, allangngu Ruata udde.

²⁵ Manga mandariagga ngara wahewalla su Wal᷊en Mawu apan niapamanara mandiaga manga wabbo'an bal᷊unna su maranin ngara wahewallu Wal᷊en Mawu eteudde: Matanya, Bakbukya, Obaja, Mesulam, Talmon wuṛṛu Akub.

²⁶ I mangitou udde nabbiakka sutempon Yoyakim ana'i Yesua wuṛṛu pulunni Yozadak wuṛṛu sutempon Gubernure Nehemia wuṛṛu Imam Ezra, mapapanden Tita udde.

I Nehemia nallaghu darandungngu soa

²⁷ Sutempo darandungngu soa Yerusalem nilaghu, manga taumatan Lewi niwaggoanna wuassu al᷊awo'u tampa tatanaanni mangitou, tadea'u isudde lai maddamean arariaddianna udde ringannu manga aantari aadiangkamanna, wuṛṛu ringannu musikku gambus wuṛṛu kecapi.

²⁸ Ne naammulle manga mangangantari wuassu manga amonanni Lewi udde, mawae wuassu wageangngu leta'a tampa tatanaane maranin Yerusalem, aroddi lai wuassu manga soa maranin Netofa,

²⁹ wuassu Bet-Gilgal, Geba wuṛṛu Asmawet.

³⁰ Manga imam wuṛṛu manga taumatan Lewi udde na'ola'a lal᷊aghun pamamaresi su watanganni mangitou wua'udde su tumanangnge, su manga ngara wahewalla wuṛṛu darundungngu soa.

³¹ I ya'u mangimbe tadea'u manga piaṛṛa'u Yehuda umawitta su wowon darandungnga tadea'u mangatokku darua wageangnge apan wahewalla mabbarissa mammal᷊iwutta soa lapiddu mangngantarin daralo aadiangkamanna su Ruata. Wageangnge apan paarorone mabbarissa su wowon darandungnga, mattudda watukku aikkatanna, watukku Ngara Wahewallu Sapadda.

³² Hosaya u'amatta su liudde mangangantari, tatantalongannu sambageanganna wuassu manga piaṛṛa'u taumatan Yehuda.

^33-35 Manga imam manansunna indi u'amatta su liuddi mangitou lapiddu manniuppa trompetta: Azarya, Ezra, Mesulam, Yehuda, Benyamin, Semaya wuṛṛu Yeremia. I mangitou tatantalonganni Zakharia ana'i Yonatan wuṛṛu pulunni Semaya. Manga pira wuassu iupungngu al᷊amonane eteudde: Matanya, Mikha, Zakur wuassu wawosoanni Asaf.

³⁶ Su liudde u'amatta manga taumata wuassu wawosoanne, eteudde: Semaya, Azareel, Milalai, Gilalai, Maai, Netaneel, Yehuda wuṛṛu Hanani. I mangitou sarangkanambone uaapiddu alattu musikka, uasul᷊ungngu apan nannalanganni Ratu Daud, allangngu Ruata udde. Imam Ezra, mapapanden Titan Duata udde, u'amatta su puan barisanna udde.

³⁷ Napawe na'omate su Ngara Wahewallu Ua'e Mabbiassa i mangitou nabbeṛṛo wuṛṛu sinuma'a tuaddu Soan Daud, niumamattu wal᷊en araratuanni Daud, ana see nabbelengnga watukku darandungnga su Ngara Wahewallu Ua'e su samba'a ra'in soa.

³⁸ Ammul᷊annu mangangantari apan sambau lai nabbarissa su wowon darandungnga mattudda watukku aiṛṛi, wuṛṛu i ya'u tinumantalongnga suaddio'a ringannu sambageanganna tumana'a. I yami nabbarissa niumamattu Menara Papputunganna maddatingngu Darandungnga Mal᷊alakka.

³⁹ Ana see i yami niumamattu Ngara Wahewallu Efraim, Ngara Wahewalla Tabbe, Ngara Wahewallu Inassa, Menara Hananeel wuṛṛu Menara Mea naddatingngu Ngara Wahewallu Domba. Barisanni yami nattaalla maranin Ngara Wahewalla Pandiagganna maranin Wal᷊en Mawu.

⁴⁰ Ne ammul᷊annu mangangantari darua udde na'omate maranin Wal᷊en Mawu. Wal᷊ine lai wuassu ingana'a piaṛṛa'a sulal᷊ummu ammul᷊angku,

⁴¹ uatantalongnga lai manga imam apan manniuppa trompetta. I mangitou eteudde: Elyakim, Maaseya, Minyamin, Mikha, Elyoënai, Zakharia wuṛṛu Hananya;

⁴² su liuddi mangitou u'amatta Maaseya, Semaya, Eleazar, Uzi, Yohanan, Malkia, Elam wuṛṛu Ezer. Manga sampere mangngantari su al᷊ungngu piaṛṛa'i Yizrahya.

⁴³ Su allo udde manambo sasamba apan nionggolla su Mawu. Tumana'a lullala'a ana waugu Ruata buatte na'ola'a si mangitou su lal᷊umanna'a. Manga wawine wuṛṛu al᷊aṛṛana'a lai suaddio'a maandeangnga, wuṛṛu tingikki mangitou apan lulluassa iaaringikka saran marau.

Sasumbala sidutu hunan patataṛṛamawu su Wal᷊en Mawu

⁴⁴ Sutempo udde manga pira taumata niapamanara mandiagga manga wabbo'an bal᷊unna tampa pangaddoannu manga sasumbala hunan Wal᷊en Mawu, nasutta manga sasamba sepere mapul᷊o wuṛṛu hessin pangitinganna apan paarorone suapan tonna. Manga mandariagga udde ṛinone mangammullu manga sasumbala udde wuassu manga wawail᷊anna maranin manga soa. Manga sasumbala udde nintatilla su manga imam wuṛṛu manga taumatan Lewi, uasul᷊ungngu atorannu Tita. Manga taumatan Yehuda mangngaddatta manga imam wuṛṛu manga taumatan Lewi udde,

⁴⁵ ana waugu ete i mangitou mappaamattu lal᷊aghu pangangukkassa wuṛṛu manga lal᷊aghu waine apan buatte niparentan Duata. Manga mananalangnga musikka wuṛṛu manga mandariagga ngara wahewallu Wal᷊en Mawu lai ma'ola'a manaran mangitou, uasul᷊ungngu atoranni Ratu Daud wuṛṛu Salomo, anangnge.

⁴⁶ Ro'en sutempo Ratu Daud wuṛṛu mapapanden musikka Asaf, manga mangangantari buatte nangantari aantarin daralo aadiangkamanna su Ruata.

⁴⁷ Sutempon Zerubabel wuṛṛu lai sutempon Nehemia, anambon tumana'u Israel mangonggollu sasamba hunan ipanipussa awussa miallo-miallon mangangantari wuṛṛu mandariagga ngara wahewallu Wal᷊en Mawu. Tumana'a nangonggollu sasamba niṛṛae su manga taumatan Lewi wuṛṛu manga taumatan Lewi lai nangonggolla su manga imam wageangnge apan buatte nitantunna.