NAHUM 3 - WUKE SUSI WATTI'U AL᷊AL᷊USASSA

¹ Nasilakatte soa indi apan napanen awusu wuṛṛu pamamate; napenen saranapa niaaṛṛo ara'e niaanu.

² Paddaringikke sasittan sambokka wuṛṛu hal᷊egekku bola, tingikku tatal᷊angngu awal᷊o wuṛṛu auntallu kereta.

³ Tantara uasa'e awal᷊o mammangalo ringannu ikkatta mapia, hal᷊ele lukkenggamma wuṛṛu sambeangnga sussawallo. Taumata apan nate tawe iareengnga, winal᷊unanni mangitou sangkomboanna, na'oman sara taumata mangke mattara.

⁴ Niniwe sumasandaga apan tantal᷊anna a'onggol᷊annu ṛuumanna. Araṛṛamage mangke maanemma. Manambo walahanna buatte niawono'anne, wuṛṛu nisal᷊o'a ringannu wisarane.

⁵ Mawu apan Lembontaṛṛino nabbisara, “Ei Niniwe, i'o sarun Ta'u sansaranna! Nasanu Ta'u luatanna su saruannu manga walahanna, ma'oman sara sangkullu aellehanni mangitou.

⁶ Ta'u olaanni i'o ere sambau saranapa apan maarantinna, i'o Ta'u waretannu sapadda; i'o Ta'u olaanna wabbiallannu taumata.

⁷ Iapa naasilo si'o sarun mangindaun batanganne wuṛṛu mabbisara, ‘Niniwe ete nallambe winalal᷊anne! Isai mappulu massusa ringanni tou? Taweddu mappulu mangonggollu al᷊al᷊uassa si tou.’ ”

⁸ Ei Niniwe, tawe mariaddi i'o mappianne wuassu Tebe, inangngu soa Mesir? Tebe lai addone su winggin sal᷊ukka apan naola'a darandungnge. Ore, Sal᷊ukku Nil udde naola'a tanda'a watune.

⁹ Tebe uaparenta Sudan wuṛṛu Mesir, wuṛṛu taṛṛinone tawe pattaal᷊anne; Libia wuṛṛu Put uddewe hawene.

¹⁰ Salaiwe aroddi, tumana'u Tebe niatawanna wuṛṛu niṛṛuwo watukku pamamuanganna. Su anambon pappenganne, manga anangnge nipuulla na'oman sara nate. Manga tembonanne niṛṛapussu ṛate wuṛṛu nitahia sisai apan naasametta.

¹¹ Ei Niniwe, i'o lai sarun mapinsanna ana waugu wu'anna. I'o lai sarun mattinsahadda tadea'u maatal᷊angnga wuassu manga seennu.

¹² Al᷊awo'u tanda'a watunu sarun maola'a ere alu ara apan nabbelle'a wuṛṛu nal᷊ahate. Napewe alu udde iio'a, manga wuane sarun manawo sulal᷊ummu moṛṛongngu taumata apan mappulu umanna.

¹³ Manga tantaranu lome ere wawine wuṛṛu wanuanu mangke tawe maal᷊ore sumaruanna seetta. Putungnga sarun manoṛṛobba manga sal᷊aba'un ngaranu.

¹⁴ Pangabbate ua'e maola'a saddia tantal᷊anna i'o pappangaloanna, wuṛṛu panohasse manga tanda'a watunu! Paṛṛindate labbo olaanna tela, wuṛṛu riahite mallane!

¹⁵ Al᷊awo'u apa apan a'olaannu, mangke tawe gunane, ana waugu i'o sarun masue masoṛṛobba ara'e mate sulal᷊ummu pangallo. I'o sarun mawul᷊i ere hessin sinuananna apan nitaṛṛangassu saṛṛappalanna. Pallaṛṛitenu niatambante anambon ere saṛṛappalanna!

¹⁶ Manga mabbawal᷊ungngu anambone nangillembo wuassu manga anumpitanna su langitta! Arawe orassa indi i mangitou nawul᷊i ere saṛṛappalanna apan nani'akka papaidde see tinumalla'a tate asiloanna.

¹⁷ Manga tembonanne wuṛṛu mamanaran araratuannu naal᷊ihidda ammul᷊annu saṛṛappalanna apan uasirungnga su manga tanda'a watu sutempo masunge. Arawe napawe matannallo sinumabbangke, i mangitou tinumalla'e nawul᷊i; tawe saran sangkatou apan masingkatta watukku apa i mangitou tinumalla'a.

¹⁸ Ei ratun wanua Asyur! Manga gubernurenu natete, wuṛṛu manga bupatinu niamatiil᷊ante saran mal᷊annu-l᷊annu. Tumanangngu nassal᷊iawukke su panenteanna, wuṛṛu tawe saran sangkatou apan mapangapiddi mangitou mapul᷊e apia.

¹⁹ Hal᷊isanu sarun tawe aundamanna, wuṛṛu manga lessanu tawe mapia. Anambon taumata apan naaringikka watti'u araṛṛimunsangu sarun mattal᷊o'appa lulluassa. Ana waugu anambon taumata buatte natataṛṛangnga susa ana waugu al᷊al᷊eonu apan tawe panguddusanne udde.