NAHUM 1 - WUKE SUSI WATTI'U AL᷊AL᷊USASSA

¹ Eteindi tanatan Duata su ola'u Niniwe. Tanata udde niapasingkatta ringannu sondapa apan noinggolla si Nahum, sangkatou nabi apan darantane wuassu Elkos.

Asasa'un Mawu su Niniwe

² Mawu Ruata maddiri uatahuanna ro'appa, taumata apan lumawangnga si Tou, sarun maasomba ṛuumanna. Ringannu tumaniten nasa'u, i Tou nabbal᷊issa al᷊al᷊eon naungnga si mangitou.

³ Atonna Mawu, mal᷊annu masa'u; arawe i Tou lembon uataṛṛino na'oman sara isai-isai ma'ola'a pasasal᷊a sarun tawe iapaal᷊iu-Ne wuassu ṛuumanna. Suapa Mawu umattu, isudde lai rumanta tadia; su tanpa ledda-Ne uaṛṛinda, isudde awu mabbal᷊i winabbawa.

⁴ I Tou namansagu tahal᷊oangnga wuṛṛu naapamarane, al᷊awo'u sal᷊ukka niapaatti ua'ene. Wowon Karmel wuṛṛu manga wadda'a su Basan nabbal᷊i lol᷊okka wuṛṛu su Libanon tinumolangke al᷊awo'u wantin bunga.

⁵ Manga wowone mangngiladda su saruan-Ne; wuṛṛu wuidda lai nabbal᷊i niumolokka abbi. Napawe Mawu rumanta, runia mangngiladda, runia wuṛṛu anambon tumanangnge mangngindo.

⁶ Isai wotongnge maataṛṛangnga amungkangngu Mawu masa'u? Taweddu maatal᷊angnga wuassu asasa'u-Ne? I Tou napaasabbangngu asasa'u-Ne apan lukkenggamma watu naṛṛimunsa'a wuṛṛu nabbal᷊i awu su saruan-Ne.

⁷ Mawu udde mapia, i Tou uasirungnga uman-Ne sutempo i mangitou susa, i Tou uariaga taumata apan uasirungnga si Tou.

⁸ Naal᷊ihidda manawangnga wahewalla apan nangelekka, niṛṛimunsang-Nge manga seen-Ne. I mangitou apan waṛṛani lumawangnga si Tou nipuullu Mawu ringannu papate na'oman sara nate.

⁹ Al᷊awo'u hol᷊aga apan a'olaannu ipallawangnga Mawu, udde sarun tawe mariaddi. I Tou sarun tawe mabbal᷊issa al᷊al᷊eon naung-Nge ma'oman sara paarua su manga seen-Ne.

¹⁰ I'o sarun soṛṛowanna ere laṛṛami apan namarate ere aputta ṛoaanna apan uaandongnga.

¹¹ Wuassi'o, ei Niniwe, nirumantate sangkatou apan napenen hol᷊aga lal᷊eo. I tou manggol᷊aga tadea'u lumawangnga Mawu.

¹² Ne unnu Mawu su Israel, uman-Ne, “Salaiwe manga taumatan Asyur udde matohassa see manambo reenganne, arawe i mangitou sarun ṛimunsaanna see mawul᷊i. Ei walahang-Ku, i Ya'u buatte na'ola'a si yamiu uatataṛṛangnga, arawe i Ya'u tate ma'ola'a apia.

¹³ Orassa indi Ta'u insueanna taṛṛinon Asyur si yamiu, wuṛṛu Ta'u wassutanna ṛate apan uaṛṛapussa si yamiu.”

¹⁴ Eteindi inappuannu Mawu su ola'u walahannu Asyur, “I mangitou tate maasomba pallaṛṛite ipanassu walahanne. Manga paal᷊uanna sassubbanna apan sulal᷊ummu manga kuillu monganne, sarun Ta'u ṛimunsaanna. Pallabbingannu walahannu Asyur tantal᷊anna Ta'u sassaddianna, ana waugu i mangitou tawe ṛinone wiakka!”

¹⁵ Pa'ellege, sangkatou daroloṛṛanna nirumanta niumamattu manga wowone, uaapiddu watti'u al᷊al᷊uassa, watti'u auntunganna. Ei walahannu Yehuda, laghua'e allo wahewanu wuṛṛu waeṛṛete paairenu su Ruata. Wanuanu tate lai allangannu taumata lal᷊eo. I mangitou mangke niṛṛimunsa'a na'oman sara nasue.