MIKHA 6 - WUKE SUSI WATTI'U AL᷊AL᷊USASSA

Aansillu Mawu su Israel

¹ Paddaringikke apa apan niansillu Mawu su Israel. Pabbuatte, oh Mawu, wuṛṛu apira'e aalae-Nu! Wala'e wowone wuṛṛu wuidda maddaringikka apa apan sarun iwisara-Nu.

² Ei manga wowone, ei manga wantan dunia, paddaringikke aansillu Mawu! I Tou pia gatto ringannu Israel uman-Ne wuṛṛu manassu si mangitou.

³ Mawu nabbisara, “Ei uma-U, apa apan buatte Ta'u niola'a su saruanni yamiu? Sulal᷊ummu olangnge apa i Ya'u napasusan kamiu? Simbakke aiwal᷊o-U!

⁴ I yamiu buatte Ta'u niapidda sinumabbangnga wuassu Mesir, wuṛṛu Ta'u nipallossa wuassu patataṛṛuallanga; i Ya'u buatte nandolokki Musa, Harun wuṛṛu i Miryam iapapiaṛṛa'a si yamiu.

⁵ Uma-U, naungete apa apan nihol᷊agi Balak ratun Moab si yamiu, wuṛṛu apa apan nisimbakki Bileam ana'i Beor si tou. Naungete apa apan nariaddi su amatanna suwallattu paddasananna su Sitim wuṛṛu su Gilgal. Amungkangngu i yamiu maanaungnga sarangkanambone udde, i yamiu sarun maatutukka apa apan buatte Ta'u niola'a tadea'u ipanal᷊amatta siy amiu.”

Sasamba apan apaapulun Mawu

⁶ Apate apan sarun ionggolli ite su Mawu, Ruata su surga, napawe i ite rumanta mattaṛṛamawu si Tou? Ṛinone i ite mangapiddu sapi saṛṛentumuwo apan apianne maola'a sasamba itattambunna ionggolla si Tou?

⁷ Apa Mawu sarun mal᷊uassa amungkangngu i ite mangapidda ringanni Tou domba su ṛiwune ara'e lanan zaitun ete manambo-nambo? Apa ṛinone i ite mangongnggolla si Tou ana'i pahul᷊une maola'a wawaekku manga rosan kite?

⁸ Tawe! Mawu buatte napal᷊iatta'a si ite apa apan apianne. Apan raddorongan-Ne wuassi ite eteudde tadea'u i ite mabbiakka matul᷊idda, sidutu uararangngu, wuṛṛu ringannu masaṛṛionto'a mabbiakka uaaukka ringannu Ruatan kite.

⁹ Apan lembon apianne eteudde matta'uttu Mawu. I Tou nabbisara su tumana'u soa, “Paddaringikke, ei i yamiu apan uasemodda su soa!

¹⁰ Su wal᷊en manga taumata lal᷊eo pia darotongnga apan niasombanganna ringannu wawahia. I mangitou mappaattu aul᷊aanna ipallinga, sambau inolaanna apan i Ya'u iaarantinna. Taumata apan na'ola'a udde sarun i Ya'u iṛṛuumanna.

¹¹ Tawe mariaddi Ya'u mangapungnga taumata apan mappaattu aul᷊aanna apan palassu?

¹² Manga taumata ala su soanu mangngallangnga taumata asiangnga, wuṛṛu sarangkanambone taṛṛa awusu.

¹³ Orassa indi Ya'u manattakke manggesekka wuṛṛu makkimunsa'a si yamiu ana waugu manga rosanu.

¹⁴ I yamiu sarun umanna, arawe tawe mabbal᷊i mal᷊aidda – ewe'e sidutu mal᷊unussa. I yamiu sarun maṛṛuwo manga saranapa, arawe tawe maariaga. Al᷊awo'u apa apan rariaganni amia sarun Ta'u ṛimunsaanna sulal᷊ummu pangalo.

¹⁵ I yamiu sarun mangasi'u gandumma, arawe tawe mangitingnga wuane. I yamiu sarun manaṛṛitta lana wuassuwuan zaitun, arawe tawe mapapaattu lanane. I yamiu sarun mamakkan anggore, arawe tawe mappa'inumma.

¹⁶ Sarangkanambone udde mariaddi ana waugu i yamiu tuttantalongnga manga inolaanni Ratu Omri wuṛṛu anangnge apan dal᷊eo, eteudde Ratu Ahab. I yamiu mattanno manga pallal᷊aghun mangitou. Ana waugu udde i Ya'u sarun makkimunsa'a si yamiu, wuṛṛu i yamiu sarun al᷊uandahanna wuṛṛu lobbosannu al᷊awo'u walahanna.”