MIKHA 5 - WUKE SUSI WATTI'U AL᷊AL᷊USASSA

Ruata naddiandin sangkatou piaṛṛa wuassu Betlehem

¹ Mawu nabbisara, “Ei Belehem Efrata, i'o sambau soa apan aaddio'anne su Yehuda! Arawe wuassi'o sarun Ta'u iapaaranta sangkatou apan maola'a tambonannu Israel apan darantane wuassu al᷊amonane.”

² Nariaddi, Mawu sarun mamalan uman-Ne tataṛṛinoannu manga seetti mangitou ma'oman sara wawine apan tinantunna mabbal᷊i inangngu piaṛṛa'a apan manungkangngi Tou. Wua'udde manga taumata sambalahanne apan poi su pamamuanganna sarun iammulla apia ringannu walahanni mangitou.

³ Napawe piaṛṛa'a udde rumanta, i Tou sarun mamarenta uman-Ne ringannu atatohassa wuṛṛu taṛṛino wuassu Mawu Ruata-Ne sassane. Umman-Ne sarun mabbiakka ringannu matammudda, ana waugu anambon taumata su ahewallu runia sarun manga'u awawantu-Ge,

^4-5 wuṛṛu i Tou sarun mangonggollu paddarame. Napawe tantaran Asyur mamangalo wanuan kite manggohakku tanda'a watun kite, i ite sarun mandolokku manga piaṛṛa'i ite apan atohasanne iapapangalo si mangitou. Manga piaṛṛa'i ite sarun mamaddon Asyur ringannu lutangnga, wuṛṛu manal᷊amatta si ite wuassu liman mangitou.

Pamamallossa wuṛṛu ṛuumanna

⁶ Taumatan Israel apan lambene sarun maola'a ere wal᷊angngukka apan masuge wuassu Mawu hunan anambon balahanna, wuṛṛu ere uranna nangansalla su sinuananna. I mangitou sarun mangunsandakka su Ruata wuṛṛu wal᷊ine su taumata.

⁷ Taumatan Israel apan ta'e uatana'a suwallattu manga walahanna sarun ere singa su pattangngannu manga winatangnga su mahurangnge ara'e su pattangngannu ammulannu domba su wadda'u nannal᷊o. Singa udde sinumutta su pattangngannu ammul᷊annu domba udde lapiddu maṛṛinda wuṛṛu mangke nanggaissa; tadewu apan naapallossu manga domba udde.

⁸ Israel sarun mamaddon manga seenne see makkimunsa'a si mangitou sarangkanambone.

⁹ Mawu nabbisara, “Sutempo udde i Ya'u sarun manginsue anambon awal᷊onu, wuṛṛu makkimunsa'a manga keretan pangalonu.

¹⁰ Manga soa pia tanda'a watune su wanuanu sarun Ta'u ṛimunsaanna, wuṛṛu anambon ahiddu sarun Ta'u iapaṛṛa'a.

¹¹ Manga pasangkaddu sarun Ta'u iapawul᷊i wuṛṛu anambon taṛṛa si'annu sarun Ta'u limbuaṛṛanna.

¹² I Ya'u sarun makkimunsa'a manga paal᷊uannu wuṛṛu manga sassubbannu; i yamiu tate lai massubba manga saranapa inolannu limanu sassane.

¹³ Manga diṛṛin Mongannu Asyera su wunuanu sarun Ta'u iapaṛṛa'a, wuṛṛu manga soannu apan pia tanda'a watune sarun Ta'u ṛimunsaanna.

¹⁴ Sulal᷊ummu asasa'u-U apan wahewallu i Ya'u sarun mabbalissa al᷊al᷊eon anambon walahanna apan maddiri tumuṛṛutta si Ya'u.”