MIKHA 4 - WUKE SUSI WATTI'U AL᷊AL᷊USASSA

Mawu namarenta runia ringannu paddarame

¹ Su manga allo addantane wuidda, tampan Wal᷊en Duata sarun dumarisikka matul᷊idda wuṛṛu u'innuitta matanggakka nangampal᷊iu manga wowone wuṛṛu manga wuidda Anambon walahanna uawawambio inai poiaroddi.

² I mangitou sarangkanambone sarun mabbisara, “Wette i ite umawitte watukku wuiddu Mawu watukku Wal᷊en Duatan Israel! I Tou sarun manantiro si ite apa apan ṛinone olaani ite. I ite sarun tumantalongnga lal᷊an-Ne ana waugu al᷊aṛṛa'u Mawu nirumanta wuassu Yerusalem; wuassu Sion i Tou nabbisara su uman-Ne.”

³ Mawu sarun makkawessu hatton pasaseetta suwallattu manga walahanna, suwallattu manga araratuanna matohassa, apan marau ara'e lai marani. I mangitou sarun manassalla manga hal᷊elen mangitou mabbal᷊i pajeko wuṛṛu manga sambeangngi mangitou mabbal᷊i lari'a bawabbassa. Manga walahanna tate lai mapapangalo, tate lai masasaddia inai mapapangalo.

⁴ Suapan taumata sarun mabbiakka matammudda wuṛṛu mal᷊angnganna su tangngan wawail᷊annu anggore wuṛṛu wawail᷊annu alu ara; tateddu lai apan mamata'utta si tou, eteudde paairen Mawu Apan Lembontaṛṛino.

⁵ Suapan walahanna su wowon dunia massubba wuṛṛu tuttuṛṛutta su monganne sassane. Arawe i ite sarun tumuṛṛutta su Mawu Ruatan kite wuṛṛu massubba si Tou saran mal᷊annu-l᷊annu.

Israel sarun mebbelengnga wuassu pamamuangnganna

⁶ Mawu nabbisara, “Sarun a'omanna tempone i Ya'u sarun mangammullu manga taumata apan Ta'u iṛṛuumanna, eteudde i mangitou apan uatataṛṛaangnga su pamamuanganna.

⁷ I mangitou buatte niapal᷊ome wuṛṛu marau wuassu ampungnga inasungkanganne. Arawe, wuassu manga taumata apan nalambe udde i Ya'u sarun manattakku sambau pallaṛṛite apan wakku. I mangitou sarun maola'a walahanna apan wahewalla wuṛṛu matohassa. I Ya'u sarun mamarenta si mangitou su Wuiddu Sion saran mal᷊annu-l᷊annu.”

⁸ Wuṛṛu i'o Yerusalem, tampan Duata uariagga uman-Ne ere mallal᷊u'adda uataṛṛapa ammul᷊annu dombane, i'o sarun masul᷊e apia maola'a inangngu soan araratuannu ere paarorone.

⁹ Anio i'o nilumuai ete maggontol᷊anna? Anio i'o tawe uatahuanna ratu, wuṛṛu manga mananantironu natete?

¹⁰ Ei tumanana'u Yerusalem, paggaṛṛuannate wuṛṛu sasal᷊iomante ere wawine apan tantal᷊anna mangngunsiwe! Ana waugu, orassa indi i yamiu ṛinone manantangngu soa wuṛṛu matana'a su wadda'a. I yamiu ṛinone inai watukku Babel, arawe poiaroddi Mawu sarun mamallossi yamiu wuasu manga seenu.

¹¹ Manambo walahanna apan naammulle mamangalo si'o, ei Yerusalem! I mangitou nabbisara, “Yerusalem ṛinone ṛimunsaanna! I yami sarun ma'ellega soa udde mabbali winal᷊alanna!”

¹² Arawe manga walahanna udde wagga apa apan tantal᷊anna ihagol᷊agu Mawu. I mangitou tawe maatutukka manungku i mangitou buatte niammullu Mawu tadea'u iṛṛuumanna, naal᷊ihidda gandumma niammulla tadea'u wabbal᷊anna.

¹³ Mawu nabbisara, “Ei tumana'u Yerusalem, roote wuṛṛu ṛindate manga seenu! I Ya'u sarun ma'ola'a si yamiu matohassa ere sapi apan tatandungnge naal᷊ihidda atta'a wuṛṛu anuune witu'a. I yamiu sarun makkimunsa'a manambo walahanna, wuṛṛu paa'ala niasombanganni mangitou wuassu pangangaṛṛo sarun ionggolli yamiu si Ya'u, Mawu ul᷊ilin pati'uppa.”

¹⁴ Ei tumana'u Yerusalem, paddorongke ringannu atonna tadea'u Mawu matul᷊ungngu! I ite tantal᷊ana pappangaloanna! Seetta tantal᷊anna mammangalo piaṛṛa'u Israel.