MIKHA 3 - WUKE SUSI WATTI'U AL᷊AL᷊USASSA

I Mikha nanompolla manga piaṛṛa'u Israel

¹ Paddaringikke, ei i yamiu manga tembonannu Israel! Ṛinone i yamiu masingkattu apa apan matul᷊idda, arawe i yamiu ewe'e maddantinnu apapia, wuṛṛu mal᷊uassu al᷊al᷊eo. Walahangku niluussi yamiu ta'e wiakka, wuṛṛu niluatti yamiu ṛemene wuassu manga duṛṛine.

² Arawe i yamiu lembon maddantinnu apapia, wuṛṛu apapia, wuṛṛu mal᷊uassa ringannu al᷊al᷊eo. Walahangku niluussi yamiu ta'e wiakka, wuṛṛu i yamiu naṛṛaen ṛemessi mangitou manga duṛṛine.

³ I yamiu niuminassa walahangku. Pisine mangke nihesa'i yamiu wuṛṛu manga duṛṛine niṛṛimunsa'i yamiu. I yamiu mangke nanattadda si mangitou nal᷊ihidda manattadda ṛemessa itaṛṛo sulal᷊ummu urinna.

⁴ Sarun a'omanna tempone i yamiu mangintul᷊i maiontolla su Mawu, arawe i Tou maddiri sumimbaka. i Tou tawe maddaringikka manga aal᷊iomannu, ana waugu i yamiu buatte na'ola'a al᷊al᷊eo.

⁵ Walahangku niwahiannu manga nabi apan manni'attu apapia su taumata apan tawe mongonggolla. Su manga nabi aroddi, Mawu nabbisara,

⁶ “Ei nabi, temponi maraniten masue; matannallonu maraniten umattuppa. I yamiu tate lai maasomba sondappa apan mammasingkattu ṛiing-Ku. I yamiu tate lai maasi'attu manga apa.”

⁷ Manga taumata apan manni'attu allo addantane sarun masili ana waugu pani'anne nassal᷊a. I mangitou sarangkanambone sarun masili ana waugu Ruata tawe sinumimbakka si mangitou.

⁸ Arawe su ola'u watangangku indi, Mawu buatte nalloṛṛo ringannu ghaṛṛaho-Ne wuṛṛu taṛṛino-Ne. I ya'u nionggol᷊an-Ne pasasunna su ola'u atatul᷊idda, wuṛṛu lai awawaṛṛani tadea'u mapal᷊iatta'a su taumatan Israel manga rosa apan buatte niolangnge.

⁹ Paddaringikke manga wisara'u indi, ei i yamiu tembonannu Israel apan maddantinnu atatul᷊idda wuṛṛu mammal᷊elongngu apapia.

¹⁰ I yamiu namangunna Yerusalem, soan Duata, rapappakke pamamate wuṛṛu wawahia.

¹¹ Manga tembonannu soa mammarenta ringannu maasomba roitta aonggolla, manga imam mangngaṛṛa'u titan Mawu tadea'u maasomba lal᷊antakke, wuṛṛu manga nabi maddorongnga tatantiro wuassu Ruata tadea'u maasomba roitta – ana see i mangitou sarangkanambone massunna manungku Mawu uasamba'a si mangitou. I mangitou nabbisara, “Mawu udde su pattangnganni ite; i ite sarun tawe aṛṛiannu asasilaka.”

¹² Ana waugu al᷊aleonu udde, Sion sarun pajekoanna ere wawail᷊anna, Yerusalem sarun maola'a ombon winalal᷊anna, wuṛṛu wuiddu Wal᷊en Mawu mabbal᷊i mahurangnge.